Ngolo Kop pa Lubanga tika Ginyuto ni Lubanga Cwinye Col?

ME GAMO lapeny man, kong wanenu wiye wiye labol aryo ma ginonge i Baibul, ma ginyuto ngolo kop pa Lubanga​—Pii Aluka me Kare pa Nua ki dok jwero jo Kanaan.

PII ALUKA ME KARE PA NUA

GIN MA DANO GIWACO: “Lubanga onyuto ni en cwinye col i kare ma ocwalo pii aluka wek otyek dano ducu kono do Nua ki jo me ode keken.”

GIN MA BAIBUL WACO: Lubanga owacci: “Cwinya pe bedo yom me neno ka latim marac to, ento amito en onguti owek timo bal ci olokke odwog bota wek obed kwo.” (Ejekiel 33:11) Man nyuto ni tyeko lutim maraco ma Lubanga otyekogi i kare  pa Nua-ni pe oyomo cwinye wacel. Ci dong, pingo otimo en otyekogi?

Baibul gamo ni Lubanga ongolo kop i kom jo maraco i kare macon pien en onongo tye ka weko “lanen bot jo ma pe bilworo Lubanga i kare me anyim.” (2 Petero 2:5, 6) Man pwonyowa gin ango i kom Lubanga?

Mukwongo, Lubanga onyuto atir ni kadi bed pe yomo cwinye me neko dano, en neno jo ma cwinygi col ma giweko jo mukene gideno can dok bingolo kop i wigi pi jami ma gutimo. I anyim, en bigiko ngolo kop alenga kacel ki peko ma dano gitye ka denone-ni.

Me aryo, lanen ma Lubanga oweko wacon moko botwa ni en poyo wi dano i yo me mar ma pud peya ongolo kop. Nua obedo latit kwena me kit ma atir, ento pol pa dano gubedo ki cac i kome. Baibul wacci: “Pe gumedo ki ngeyo gin mo nio ka pii aluka opong, ci omologi woko ducu.”​—Matayo 24:39.

Lubanga tika pud timo kumeno? En pud timo. Me lapore, en opoyo wi jone ma gin Luicrael ni, ka gucako timo jami maraco calo rok murumo ka ngetgi-ni, ci ebimiyo lumerokgi gibino gilwenyo i komgi kun gibalo ganggi madit, Jerucalem; ci giterogi i opii. Luicrael gucako timo jami maraco​—calo tyero lutino. Jehovah tika otimo gin mo? Ada otimo, ento kong ooro lunebine teretere me poyo wi jone wek gulok kitgi ma cawa pud tye. En bene owacci: “Rwot Lubanga pe timo gin mo, labongo yabo munge bot luticce ma lunebi.”​—Amoc 3:7.

KIT MA MAN GUDI KWEDE: Lanen ma Jehovah oweko ma lubbe ki kit ma en ongolo ki kop i kare macon miniwa gen. Watwero bedo ki tekcwiny ni i anyim Lubanga bingolo kop i wi jo ma cwinygi col ma giweko dano deno can. Baibul wacci: “Lutim maraco gibityekogi woko . . . Ento jo mamwol aye gibicamo lobo; gibibedo ki yomcwiny pi lonyo madwong ma gibilimo.” (Jabuli 37:9-11) Itamo ningo i kom ngolo kop ma laro dano ki i deno can? Tika man nyuto col cwiny kece kica?

JWERO JO KANAAN

GIN MA DANO GIWACO: “Tyeko jo Kanaan obedo turo cik me lweny, ma kitwero porone ki nek lumuku i kare-ni.”

GIN MA BAIBUL WACO: “En [Lubanga] ngolo kop atir i yone ducu. Lubanga ma lagen ma pe ngolo kop alenga.” (Nwoyo Cik 32:4, NW) Pe kitwero poro jwero dano ma Lubanga ojwero-ni ki lweny ma dano adana gilwenyo. Pingo? Pien en pe tye calo dano, Lubanga twero neno gin mukanne i cwiny dano.

Me lapore, i kare ma Lubanga ongolo kop i kom boma me Codom ki Gomora ki dok omoko tamme me jwerogi, laco ma lagen Abraim onongo mitine tye me nenone ni Lubanga ongolo kop matir. En onongo pe twero ye ni Lubangane ma ngolo kop atir-ri ‘bityeko jo ma kitgi atir kacel ki jo maraco.’ Lubanga odiyo cwinye kun wacce ni pe Ebityeko boma me Codom ka jo apar ma kitgi atir gitye kunnu. (Acakki 18:20-33) Ada, Lubanga ongiyo cwiny jo magi ci oneno kit ma balgi dit kwede.​—1 Tekwaro 28:9.

I yo acel-li, Lubanga ongolo kop i wi jo Kanaan ni kitgi raco, ci omiyo rukca ni myero kijwergi woko. Jo Kanaan onongo cwinygi col ma pe wacce, mumiyo gutimo jami mogo calo wango lutinogi makwo me gityer. * (2 Luker 16:3) Jo Kanaan onongo gingeyo ni Jehovah ociko jo Icrael me leyo ngom ducu. Jo ma guyero me dong i ngomgi ki dok me lweny onongo pe gitye ka jemo i kom Luicrael keken ento bene i kom Jehovah, ma onyuto ka maleng ni etye ka konyo jone.

Medo i kom meno, Lubanga onyuto cwiny me kica bot jo Kanaan mogo ma guweko kwogi maraco, ci gujolo rwom me kwo matir pa Jehovah. Me lapore, kilaro Rakab dako ma lakwele-ni kacel ki jo me ot pa wonne. Ki bene, i kare ma jo Gibeon ma gibedo i boma me Kanaan gukwayo kica, pe kineko gin ki lutinogi.​—Yocwa 6:25; 9:3, 24-26.

KIT MA MAN GUDI KWEDE: Watwero nongo pwony ma pire tek ki i kop ma kingolo i kom jo Kanaan. Watye ka nyikke cok adada ki “nino me ngolo kop ki tyeko dano ma pe gilworo Lubanga.” (2 Petero 3:7) Ka wamaro Jehovah, wabinongo  adwogi maber ka dong en olaro dano ki i deno can kun jwero jo ma gikwero locce.

Jehovah poyo wiwa i yo me mar ni tam ma lunyodo gimoko gudo lutinogi. Lok pa Lubanga wacci: “Wuyer kwo wek wun ki likwayowu wubed makwo, ma kun wumaro Rwot Lubangawu, wuworo doge ci wumoko i kome matek.” (Nwoyo Cik 30:19, 20) Lok magi tika Lubanga ma cwinye col aye owaco kece Lubanga ma maro dano dok mito ni gumok tam matir?

[Lok ma tye piny]