O bi ɔ hɛ dɔɛ ngɛ sukuu yami he. E kase we ní, nɛ ke a ha lɛ ní tsumi kɛ je sukuu ɔ kɛ ba we mi hu ɔ, e pee we. Mɛni je mi kɛ ba? E buɛ mɔde ngɛ sukuu ɔ, nɛ e jemi bami hu ngɛ puɛe. Mɛni o ma nyɛ maa pee kɛ ye bua o bi ɔ konɛ e bɔ mɔde ngɛ sukuu?

•  Nɔ́ nɛ e sa nɛ o le

•  Nɔ́ nɛ o ma nyɛ maa pee

 Ke o nyɛ e nɔ ɔ, o ma puɛ sane ɔ kulaa. Ke o ngɛ o bi ɔ nɔ nyɛe kaa e sa nɛ e bɔ mɔde ɔ, lɔ ɔ be hae nɛ e ná bua jɔmi ngɛ sukuu ɔ kɛ we ɔ mi tsuo! Ke e ba jã a, eko ɔ, e ma bɔni lakpa yemi, ke e ngma ka ngɛ sukuu ɔ nɛ e bɔɛ mɔde ɔ, e maa ngɔ kɛ laa aloo e be sukuu tsu ɔ mi yae, nɛ lɔ ɔ ma puɛ sane ɔ kulaa.

 Nike ní nɛ o ma ha lɛ ɔ be yi mi tomi ɔ he ní tsue. Bitsɛ ko nɛ a tsɛɛ lɛ ke Andrew de ke, “Ke wa biyo ɔ ngma ka ngɛ sukuu nɛ e bɔ mɔde ɔ, wa keɔ lɛ ní konɛ lɔ ɔ nɛ wo lɛ he wami. Se lɔ ɔ ha nɛ e ngɔ e juɛmi kɛ ma nike ní ɔ nɔ mohu. Ke e ngma ka ko nɛ e bɔɛ mɔde ɔ, e dɔɔ lɛ kaa e nine be nike ní ko nɔ sue mohu pe nɛ e maa dɔ lɛ kaa e bɔɛ mɔde ngɛ ka a mi.”

 Ke o piaa tsɔɔli ɔmɛ ɔ, lɔ ɔ be jokuɛ ɔ ye buae. Eko ɔ, jã nɛ o maa pee ɔ ma ha nɛ o bi ɔ ma susu kaa e he hia we nɛ e mia e hɛ mi loko e maa bɔ mɔde ngɛ sukuu. Eko ɔ, lɔ ɔ mohu ma ha nɛ e pia ni kpahi ke e tɔ̃, nɛ e maa hyɛ blɔ kaa ni kpahi nɛ a tsu e nyagbahi a he ní ha lɛ. Ngɛ e kpiti pomi mi ɔ, o bi ɔ be nyɛe maa kase nɔ́ ko nɛ he hia nɛ maa ye bua lɛ ke e wa, nɛ ji kaa, nɛ e maa kplɛɛ nɔ́ nɛ maa je e ní peepeehi a mi kɛ ba a nɔ.

 Moo nu o tsui. Ke o mi mi fu ɔ, mo hla be kpa konɛ o kɛ o bi ɔ nɛ susu mɔde nɛ e bɔɛ ngɛ sukuu ɔ he. Bitsɛ ko nɛ a tsɛɛ lɛ Brett ɔ de ke, “I kɛ ye yo ɔ wa yɔse kaa wa tsui si nɛ wa to, kɛ wa bi ɔ he nɛ wa susuɔ ɔ wo yiblii kpakpa.”

 Mo yɔse nɔ́ tutuutu nɛ ji nyagba a. Behi fuu ɔ, nɔ́ he je nɛ jokuɛwi buɛ mɔde ngɛ sukuu ɔ ji kaa, a waa mɛ yi mi ngɛ sukuu, a pɔɔ sukuu tsakemi, a yeɔ gbeye ke a ngɛ ka ngmae, a hwɔ we si mla, a tui blɔ nya, a pee we totooto, kɛ weku mi nyagba hulɔ. Koo mwɔ sane nya kaa o bi ɔ pee ɔ hejɔ.

 Hla he ko kpakpa ha o bi ɔ nɛ e hi kɛ kase ní. Moo to be kɛ ha o bi ɔ nɛ e kɛ tsu ní tsumihi nɛ a haa lɛ kɛ jeɔ sukuu ɔ he ní, kɛ be nɛ e kɛ maa kase ní kpahi. Mo hla he ko nɛ sa kɛ ha o bi ɔ nɛ e hi kɛ kase ní konɛ nɔ́ ko (kaa tiivi aloo mobile fon) nɛ ko je e juɛmi kɛ je ní kasemi ɔ nɔ. Ha nɛ be nɛ e kɛ ma tsu ní tsumihi nɛ a haa lɛ kɛ jeɔ sukuu ɔ nɛ pee kpiti konɛ e nyɛ nɛ e ngɔ e juɛmi kɛ ma ní kasemi ɔ nɔ nɛ e juɛmi ko hi si kpae. Bitsɛ ko nɛ e ngɛ Germany nɛ a tsɛɛ lɛ ke Hector de ke, “Ke e be kɛe nɛ ye bi ɔ maa ngma ka ngɛ sukuu ɔ, daa ligbi ɔ, wa kaseɔ níhi nɛ a kase kɛ be ɔ bɔɔbɔɔbɔɔ. Wa mlɛ we nɛ be ɔ nɛ su haa loko wa bɔni ní ɔ kasemi.”

 Moo wo lɛ he wami konɛ e kase ní. Ke o bi ɔ le se nami nɛ ngɛ sukuu nɛ e maa ya amlɔ nɛ ɔ he ɔ, lɔ ɔ maa wo lɛ he wami nɛ e maa kase ní. Kaa nɔ hyɛmi nɔ́ ɔ, akɔtaa nɛ e maa kase ngɛ sukuu ɔ maa ye bua lɛ nɛ e ma nyɛ maa to e sika he blɔ nya saminya.

 Ga womi: Ke a ha o bi ɔ ní tsumi kɛ je sukuu ɔ, moo ye bua lɛ nɛ e kɛ pee, se koo ngɔ ngɛ e dɛ nɛ o pee ha lɛ. Andrew de ke, “Wa biyo ɔ hyɛɛ blɔ kaa waa ngma heto ɔmɛ ha lɛ, se lɛ nitsɛ lɛɛ e bɔɛ e he mɔde ko kulaa.” Moo tsɔɔ o bi ɔ nɛ e le bɔ nɛ lɛ nitsɛ e ma plɛ kɛ tsu ní tsumihi nɛ a haa lɛ kɛ jeɔ sukuu ɔ he ni ha.