La 105:1-45
105 “Nyɛɛ na Yehowa si, nyɛɛ wo e biɛ ta,Nyɛ ha nɛ a le níhi nɛ e pee ɔ ngɛ ni ɔmɛ a kpɛti!
2 Nyɛ la ha lɛ, nyɛ la yi jemi lahi* ha lɛ,Nyɛ susu e nyakpɛ ní ɔmɛ tsuo a he.*
3 Nyɛɛ kɛ e biɛ klɔuklɔu ɔ nɛ fĩa.
Nihi nɛ a ngɛ Yehowa se blɔ hlae ɔ a tsui nɛ nya.
4 Nyɛ hla Yehowa kɛ e he wami ɔ se blɔ.
Nyɛɛ ya e hɛ mi daa.
5 Nyɛ kai nyakpɛ níhi nɛ e pee ɔ,E nyakpɛ ní ɔmɛ, kɛ e kojomi ɔmɛ,
6 Nyɛ nɛ nyɛ ji e sɔmɔlɔ Abraham nina,*Nyɛ Yakob bimɛ, nɛ ji nihi nɛ e hla a.
7 Lɛ ji Yehowa, wa Mawu ɔ nɛ.
E kojomi ɔmɛ hyi zugba a nɔ tsuo.
8 E kaiɔ e somi ɔ kɛ yaa neneene,Si nɛ e wo ɔ,* e kaiɔ kɛ ya siɔ yi nɔ nɛ ji akpe,
9 Somi nɛ e kɛ Abraham so,Kɛ kita nɛ e kã Isak,
10 Nɛ́ e ma nɔ mi kaa mlaa kɛ ha Yakob,Kɛ neneene somi kɛ ha Israel,
11 Nɛ́ e de ke, “Ma ngɔ Kanaan zugba a kɛ ha moKaa nyɛ weto ní” ɔ.
12 Jamɛ a be ɔ mi ɔ, a he pi,Ee, a he pi kulaa, nɛ a ji nibwɔhi ngɛ zugba a nɔ.
13 A nyɛɛ kɛ je je ma kake nɔ kɛ ya je ma kpa nɔ,Kɛ je matsɛ yemi kake sisi kɛ ya matsɛ yemi kpahi a sisi.
14 E ha we nɛ nɔ ko nɛ wa mɛ yi mi,Mohu ɔ, e kã matsɛmɛ a hɛ mi ngɛ a he je,
15 Nɛ e de ke, “Nyɛ ko ta nihi nɛ i pɔ mɛ nu ɔ a he,Nɛ ye gbali ɔmɛ hu, nyɛ ko pee mɛ nɔ́ yayami ko.”
16 E ha nɛ hwɔ ba zugba a nɔ;E ha nɛ a niye ní se po.*
17 E tsɔ nyumu ko kɛ sɛ a hlami,Yosef, nɔ nɛ a jua lɛ kaa nyɔguɛ ɔ.
18 A bɔ e nanehi pã,*Nɛ a kɛ dade wo e kuɛ;*
19 Kɛ ya si be nɛ nɔ́ nɛ e de ɔ ba mi ɔ,Yehowa munyu ɔ ji nɔ́ nɛ tsu e he.
20 Matsɛ ɔ tsɔ nɛ a ya je lɛ,Ni ɔmɛ a nɔ yelɔ ɔ ha nɛ e ye e he.
21 E pee lɛ nyɔmtsɛ ngɛ e we ɔ nɔ,Nɔ yelɔ ngɛ e weto ní tsuo nɔ,
22 Konɛ e ye e ma nikɔtɔma amɛ a nɔ* bɔ nɛ e* suɔ,Nɛ́ e tsɔɔ e nikɔtɔma amɛ juɛmi.
23 Kɛkɛ nɛ Israel ba Egipt,Nɛ Yakob hi Ham zugba a nɔ kaa nubwɔ.
24 Mawu ha nɛ e we bi ɔmɛ a he hiɛ babauu;E ha nɛ a he wa pe a he nyɛli ɔmɛ;
25 E tsake he nyɛli ɔmɛ a tsui konɛ a nyɛ e we bi ɔmɛ,Konɛ a so e sɔmɔli ɔmɛ a yi nɔ.
26 E tsɔ e sɔmɔlɔ Mose,Kɛ Aaron, nɔ nɛ e hla a.
27 A pee e we okadi ɔmɛ ngɛ a kpɛti,E nyakpɛ ní ɔmɛ ngɛ́ Ham zugba a nɔ.
28 E tsɔ diblii kɛ ba, nɛ zugba a nɔ wo diblii;A ti si kɛ wui e munyu ɔmɛ.
29 E tsake a nyu ɔmɛ kɛ pee muɔ,Nɛ e gbe a pa mi lo ɔmɛ.
30 A zugba a nɔ hyi tɔ kɛ ovɔnɔhi,Matsɛ ɔ se tsu ɔmɛ a mi po hyi tɔ kɛ ovɔnɔhi sɔuu.
31 E fã pwɔlwɛhi konɛ a baKɛ pwɔmihi* ngɛ a zugba amɛ tsuo a nɔ.
32 E tsake a hiɔmi kɛ pee gbiɛ ngo ngu,Nɛ e tsɔ oslabai* kɛ ba a zugba a nɔ.
33 E kpata a wai tso ɔmɛ kɛ a fig tso ɔmɛ a hɛ mi,Nɛ e ku a zugba a nɔ tsohi tsuo.
34 E de ke baalɛhi nɛ a ba,Baalɛ wawi nɛ a hí kanemi.
35 A ye níhi tsuo nɛ puɛ ngɛ zugba a nɔ ɔ,Nɛ a ye zugba a nɔ niba níhi.
36 Kɛkɛ nɛ e gbe kekleekle bi fɛɛ kekleekle bi ngɛ a zugba a nɔ,Nihi nɛ a ji a fɔmi he wami sisije ɔ.
37 E ngɔ e we bi ɔmɛ kɛ je kpo kɛ ba kɛ a dɛ sika hiɔ kɛ sika tsu;Nɛ e wɛtso ɔmɛ a mi nɔ ko be nɛ e gbɔjɔ.
38 Benɛ a je ɔ, Egipt nya,Ejakaa Israel* he gbeye pue a nɔ.
39 E bli bɔku mi kɛ ha a nɔ,
Nɛ e ha mɛ la nɛ a kɛ hyɛ nɔ nyɔ mi.
40 A bi, nɛ e ha mɛ bebee;*E ya nɔ nɛ e ha mɛ niye ní* kɛ je hiɔwe nɛ a ye nɛ a tɔ.
41 E bli tɛsa nya, nɛ nyuhi je mi kɛ pue si;Nyu ɔmɛ be babaaba ngɛ nga kplanaa a nɔ kaa pa.
42 Ejakaa e kai ní klɔuklɔuhi nɛ e wo e sɔmɔlɔ Abraham he si ɔ.
43 Lɔ ɔ he ɔ, e je e we bi ɔmɛ kpo nɛ a nya,Nihi nɛ e hla mɛ ɔ kɛ bua jɔmi he ose.
44 E ngɔ je mahi a zugbahi kɛ ha mɛ;Níhi nɛ ni kpahi tsu ní wawɛɛ nɛ a ná a, a nine su nɔ kaa a weto ní,
45 Bɔ nɛ pee nɛ a kɛ e blɔ tsɔɔmi ɔmɛ nɛ tsu ní,Nɛ a ye e mlaa amɛ a nɔ.
Nyɛ je Yah yi!*
Sisi Ningmahi
^ Aloo “nyɛɛ fia la.”
^ Baiblo komɛ de ke “Nyɛɛ tu e nyakpɛ ní ɔmɛ tsuo a he munyu.”
^ Ngɛ Hebri gbi mi ɔ, “ngmɛdu.” Hyɛ Munyu Komɛ A Sisi Tsɔɔmi.
^ Ngɛ Hebri gbi mi ɔ, “Fami nɛ e fã a.”
^ Ngɛ Hebri gbi mi ɔ, “E ku a we abolo tso fɛɛ abolo tso.” Eko ɔ, a ji tsohi nɛ a toɔ abolohi ngɛ nɔ.
^ Ngɛ Hebri gbi mi ɔ, “A kɛ pã pii e nanehi.”
^ Aloo “a kɛ dade fĩ e klaa.”
^ Ngɛ Hebri gbi mi ɔ, “Konɛ e fĩ e ma nikɔtɔma amɛ.”
^ Aloo “ e klaa.”
^ Tsa pi pwɔmihi tutuutu, mohu ɔ, a ji lohwe tsɔwitsɔwi komɛ nɛ a ngɛ kaa pwɔmihi nɛ a pɔ he ngɛ blema Egipt.
^ Aloo “la lilɛhi.”
^ Ngɛ Hebri gbi mi ɔ, “a.”
^ Aloo “hɔne.”
^ Ngɛ Hebri gbi mi ɔ, “abolo.”
^ Aloo “Haleluyah!” “Yah” ji biɛ Yehowa a kpiti pomi.
