Yohane Sane Kpakpa a 7:1-52
7 Ngɛ enɛ ɔ se ɔ, Yesu tsa e blɔ hiami* ɔ nɔ kɛ ya kpa Galilea, se akɛnɛ Yuda bi ɔmɛ ngɛ hlae kaa a maa gbe lɛ he je ɔ, e sume kaa e maa pee jã ngɛ Yudea.
2 Se Yuda bi ɔmɛ a Bo Tsuhi A Mi* Himi Gbijlɔ ɔ su ta.
3 Enɛ ɔ he ɔ, e nyɛminyumu ɔmɛ de lɛ ke: “Jee hiɛ ɔ nɛ o ya Yudea konɛ o kaseli ɔmɛ hu nɛ a na níhi nɛ o ngɛ pee ɔ.
4 Ejakaa nɔ nɛ e suɔ kaa a le lɛ ngɛ ma hɛ mi ɔ, e pee we nɔ́ ko ngɛ laami mi. Ke o ngɛ ní nɛ ɔmɛ pee ɔ, lɛɛ mo je o he kpo kɛ tsɔɔ je ɔ mɔ.”
5 Ngɛ anɔkuale mi ɔ, e nyɛminyumu ɔmɛ he we lɛ yi.
6 Enɛ ɔ he ɔ, Yesu de mɛ ke: “Ye be ɔ sui lolo, se nyɛɛ lɛɛ be fɛɛ be hi ha nyɛ.
7 Nɔ́ ko be nɛ je ɔ maa da nɔ kɛ nyɛ nyɛ, se imi lɛɛ e nyɛɔ mi, ejakaa i yeɔ odase kɛ siɔ lɛ kaa e ní tsumi ɔmɛ ji ní tsumi yayamihi.
8 Nyɛɛ lɛɛ nyɛɛ ya gbijlɔ ɔ; imi lɛɛ i be gbijlɔ nɛ ɔ yae lolo, ejakaa ye be ɔ sui lolo.”
9 Enɛ ɔ he ɔ, benɛ e de mɛ ní nɛ ɔmɛ se ɔ, e tlɔ Galilea.
10 Se benɛ e nyɛminyumu ɔmɛ je kɛ ho gbijlɔ ɔ ya a, lɔ ɔ se ɔ, lɛ hu e pue nɔ kɛ ho, se e ha we nɛ nihi nɛ a na lɛ.
11 Enɛ ɔ he ɔ, Yuda bi ɔmɛ bɔni lɛ hlami ngɛ gbijlɔ ɔ sisi, nɛ a ngɛ bie ke: “Jije jamɛ a nyumu ɔ ngɛ?”
12 Nɛ asafo kuu ɔmɛ tu e he munyu kusikusi fuu. A ti ni komɛ de ke: “E ji nɔmlɔ kpakpa.” Ni komɛ hu de ke: “Pi nɔmlɔ kpakpa ji lɛ. E ngɛ asafo kuu ɔ sisie.”
13 Ngɛ anɔkuale mi ɔ, nɔ ko nɔ ko nyɛ we nɛ e tu e he munyu ngɛ ma hɛ mi, ejakaa a ngɛ Yuda bi ɔmɛ gbeye yee.
14 Benɛ a ye gbijlɔ ɔ kɛ su kpɛti ɔ, Yesu kuɔ kɛ ya sɔlemi we ɔ nɛ e ya bɔni ní tsɔɔmi.
15 Nɛ Yuda bi ɔmɛ a nya kpɛ a he, nɛ a bi ke: “Mɛni blɔ nɔ nɛ nyumu nɛ ɔ gu kɛ le Ngmami* ɔ kikɛ nɛ ɔ be mi nɛ e kase we ní ngɛ sukuu ɔmɛ* a mi ɔ?”
16 Se Yesu he nɔ nɛ e de mɛ ke: “Nɔ́ nɛ i ngɛ nyɛ tsɔɔe ɔ, pi ye nɔ́, mohu ɔ, nɔ nɛ e tsɔ mi ɔ nɔ́.
17 Ke nɔ ko suɔ kaa e maa pee Mawu suɔmi nya ní ɔ, jamɛatsɛ ɔ maa le kaa tsɔɔmi ɔ je Mawu ngɔ aloo imi nitsɛ lɛ i to ye yi mi kɛ ngɛ munyu tue.
18 Nɔ fɛɛ nɔ nɛ e toɔ lɛ nitsɛ e yi mi kɛ tuɔ munyu ɔ ngɛ lɛ nitsɛ e hɛ mi nyami hlae; se nɔ fɛɛ nɔ nɛ e hlaa hɛ mi nyami kɛ haa nɔ nɛ e tsɔ lɛ ɔ, jamɛatsɛ ɔ ji anɔkualetsɛ, nɛ nɔ́ yayami ko be e mi.
19 Tse Mose ha nyɛ Mlaa a, aloo e ha we nyɛ? Se nyɛ ti nɔ kake po yi Mlaa a nɔ. Mɛni he je nɛ nyɛ ngɛ hlae kaa nyɛ maa gbe mi ɔ?”
20 Asafo kuu ɔ he nɔ ke: “Daimonio ngɛ o mi. Mɛnɔ ngɛ hlae kaa e maa gbe mo?”
21 Yesu ha mɛ heto ke: “Nɔ́ kake pɛ nɛ i pee, nɛ e pee nyɛ tsuo nyakpɛ.
22 Enɛ ɔ he je nɛ Mose ha nyɛ nɔ pomi ɔ nɛ—pi Mose ngɔ nɛ e je, mohu ɔ, e je nɛmɛ ɔmɛ a ngɔ—nɛ nyɛ poɔ nɔ ngɛ he jɔɔmi ligbi nɔ.
23 Ke a poɔ nyumu ngɛ he jɔɔmi ligbi nɔ konɛ a ko tɔ̃ Mose Mlaa a, anɛ e sa kaa nyɛ mi mi nɛ fu mi wawɛɛ kaa i tsa nɔ ko ngɛ he jɔɔmi ligbi nɔ lo?
24 Nyɛ kpa níhi nɛ hɛ ngmɛ naa a nɔ dami kɛ kojo, mohu ɔ, nyɛɛ kojo dami kojomi.”
25 Yerusalɛm bi ɔmɛ a ti ni komɛ bɔni bimi ke: “Tse nyumu nɛ ɔ nɛ a ngɛ hlae kaa a maa gbe lɛ ɔ nɛ, aloo pi lɛ?
26 Se kɛ̃ ɔ, hyɛ! e ngɛ munyu tue ngɛ ma hɛ mi nɛ a de we lɛ nɔ́ ko. Anɛ nɔ yeli ɔmɛ ba ná nɔ mi mami kaa lɛ ji Kristo ɔ lo?
27 Se wa le he nɛ nyumu nɛ ɔ je; se Kristo ɔ lɛɛ ke e ba a, nɔ ko nɔ ko be nɛ e maa le he nɛ e je.”
28 Jehanɛ ɔ, benɛ Yesu ngɛ ní tsɔɔe ngɛ sɔlemi we ɔ, e wo e gbi nɔ kɛ de ke: “Nyɛ le mi nɛ nyɛ le he nɛ i je. Nɛ i bɛ ngɛ imi nitsɛ ye he wami nya, mohu ɔ, Nɔ nɛ e tsɔ mi ɔ ngɛ nitsɛnitsɛ, nɛ nyɛ li lɛ.
29 I le lɛ, ejakaa i ba kaa e nane mi dalɔ, nɛ jamɛ a Nɔ ɔ lɛ e tsɔ mi.”
30 Enɛ ɔ he ɔ, a bɔni blɔ nɛ a maa gu nɔ kɛ nu lɛ ɔ hlami, se nɔ ko nɔ ko tɛ e he, ejakaa e ngmlɛfia a sui lolo.
31 Se kɛ̃ ɔ, asafo kuu ɔ mi nihi fuu ná hemi kɛ yemi ngɛ e mi, nɛ a ngɛ dee ke: “Ke Kristo ɔ ba a, tse e be okadihi fuu pee pe nɔ́ nɛ nyumu nɛ ɔ pee ɔ, aloo?”
32 Farisi bi ɔmɛ nu nɛ asafo kuu ɔ ngɛ e he munyu nɛ ɔmɛ tue kusikusi, nɛ osɔfo nikɔtɔma amɛ kɛ Farisi bi ɔmɛ tsɔ tsɔli konɛ a ya nu lɛ.
33 Kɛkɛ nɛ Yesu de mɛ ke: “I kɛ nyɛ maa hi si be bɔɔ loko ma je kɛ ho Nɔ nɛ e tsɔ mi ɔ ngɔ ya.
34 Nyɛ ma hla mi, se nyɛ be mi nae, nɛ he nɛ i ngɛ ɔ, nyɛ be nyɛe maa ba lejɛ ɔ.”
35 Enɛ ɔ he ɔ, Yuda bi ɔmɛ bi a sibi ke: “Jije nyumu nɛ ɔ to kaa e maa ya nɛ lɔ ɔ he ɔ, wa be lɛ nae ɔ? Anɛ e to kaa e maa ya Yuda bi ɔmɛ nɛ a gbɛ fĩa Hela bi ɔmɛ a kpɛti ɔ a ngɔ konɛ e ya tsɔɔ Hela bi ɔmɛ ní lo?
36 Mɛni e ngɛ tsɔɔe benɛ e de ke, ‘Nyɛ ma hla mi, se nyɛ be mi nae, nɛ he nɛ i ngɛ ɔ, nyɛ be nyɛe maa ba lejɛ ɔ’ ɔ?”
37 Ngɛ nyagbe ligbi ɔ, nɛ ji gbijlɔ ɔ we ligbi ngua a nɔ ɔ, Yesu te si kɛ da si nɛ e wo e gbi nɔ kɛ de ke: “Ke kuma ngɛ nɔ ko yee ɔ, e ba ye ngɔ nɛ e ba nu nyu.
38 Nɔ fɛɛ nɔ nɛ e náa hemi kɛ yemi ngɛ ye mi ɔ, kaa bɔ nɛ ngmami ɔ de ɔ: ‘Pahi kɛ a mi wami nyu maa hia babaaba kɛ je e mi tɔɔ.’”
39 Se e tu munyu nɛ ɔ kɛ kɔ mumi ɔ nɛ e be kɛe nɛ nihi nɛ a ná hemi kɛ yemi ngɛ e mi ɔmɛ a nine maa su nɔ ɔ he; jamɛ a be ɔ mi ɔ, mumi ko be, ejakaa a wui Yesu hɛ mi nyami lolo.
40 Benɛ asafo kuu ɔ mi ni komɛ nu munyu nɛ ɔmɛ ɔ, a bɔni demi kɛ: “Niinɛ, Gbalɔ ɔ ji nɛ ɔ nɛ.”
41 Ni kpahi ngɛ dee ke: “Kristo ɔ ji nɛ ɔ nɛ.” Se ni komɛ hu ngɛ dee ke: “Anɛ Galilea nɛ Kristo ɔ maa je kɛ ba lo?
42 Anɛ ngmami ɔ de we ke Kristo ɔ maa pee David nina, nɛ e maa je kɔpe nɛ David hi mi, nɛ ji Bɛtlehɛm ɔ mi kɛ ba lo?”
43 Enɛ ɔ he ɔ, asafo kuu ɔ mi gba ngɛ e he.
44 E ngɛ mi kaa a ti ni komɛ ngɛ hlae nɛ a maa nu lɛ mohu lɛɛ, se nɔ ko nɔ ko tɛ e he.
45 Kɛkɛ nɛ tsɔli ɔmɛ kpale a se kɛ ho osɔfo nikɔtɔma amɛ a ngɔ ya, nɛ Farisi bi ɔmɛ bi mɛ ke: “Mɛni he je nɛ nyɛ ngɔɛ lɛ kɛ bɛ ɔ?”
46 Tsɔli ɔmɛ ha mɛ heto ke: “Adesa ko tui munyu kaa kikɛ nɛ ɔ hyɛ.”
47 Farisi bi ɔmɛ hu bi mɛ ke: “Anɛ nyɛ hu a sisi nyɛ lo?
48 Anɛ nyɛ na kaa nɔ yeli ɔmɛ kɛ Farisi bi ɔmɛ a ti nɔ ko ná hemi kɛ yemi ngɛ e mi lo?
49 Se asafo kuu nɛ ɔ nɛ li Mlaa a ji nihi nɛ a gbiɛ mɛ.”
50 Nikodemo nɛ be ko nɛ be ɔ, e ba Yesu ngɔ, nɛ lɛ hu e piɛɛ Farisi bi ɔmɛ a he ɔ bi mɛ ke:
51 “Ke a nui nɔ ko nya mi munyu nɛ a le nɔ́ nɛ e pee ɔ, tse wa Mlaa a tsa bui lɛ fɔ, aloo?”
52 A ha lɛ heto ke: “Anɛ mo hu pi Galilea no ji mo lo? Mo ya hla mi, nɛ o maa na kaa gbalɔ ko be si tee ngɛ Galilea.”*
Sisi Ningmahi
^ Aloo “nyɛɛmi.”
^ Aloo “Gbahi A Sisi.”
^ Hela, “níhi nɛ a ngma.”
^ Nɛ ji rabi ɔmɛ a sukuu ɔmɛ.
^ Kuku 53 kɛ ya si yi 8 kuku 11 ɔ be blema womi kpohi nɛ a kɛ nine ngma nɛ nihi he ye kaa a mi munyu ɔmɛ da a mi.