KIMELÜN 2
¿Iñi am Chaw Dio?
1. ¿Chemu wenupüramabiiñ Chaw Dio müten?
Chaw Dio dewmay itrokom mülelu. Moll (umel) müleki ka tañi mongen abkelay (Salmo 90:2). Kidu mu küpay tati kümeke dungu mülelu Biblia mu (1 Timotew 1:11). Chaw Dio am taiñ eluetu mongen, beymu wenupüramabiiñ Kidu müten. Papiltunge Apokalipsi 4:11.
2. ¿Chumngi Chaw Dio?
Iñi no ume pekelabi Chaw Dio, kiñe püllü ngelu am. Beymu müna doyküli iñchiñ mu, Mapu mu mülelu iñchiñ (Juan 1:18; 4:24). Welu, kintul-liiñ ka rakiduamliiñ tañi dewmal kidu, doy küme kimabüiñ tañi chumngen. Kiñe dungu: Chaw Dio dewmay billke bün ka chichiken (rayen), tüba pengelki taiñ piwkeyeetu ka alün kimün tañi niel. Pu bentren wangülen tañi niel tati wenu mapu, pengelki Kidu tañi müna newen-ngen. Papiltunge Romanu 1:20.
Papiltuliiñ Biblia, doy kimabüiñ Chaw Dio tañi chumngen. Tüba eypikeiñmu Kidu chumkebi tati pu che, chem dungu ayüki ka chem ayükelay, ka chumki upalele billke dungu. Papiltunge Salmo 103:7-10.
3. ¿Nii Chaw Dio kiñe üy?
Jesu eypi: “Taiñ Chaw Ngünechen wenu mapu mülelu, yamnegepe tami üy” (Matew 6:9). Chaw Dio tukulelngeki billke üy, welu nii kiñe üy müten. Billke kewün dungu mu, beychi üy kakewmi tañi üytungen. Chedungun mu, Jewba pingeki, kabey Jehová pingeabüy. Papiltunge Salmo 83:18 (82:19 kiñeke Biblia mu).
Bentren Biblia mu, Jewba tañi üy welukünongi kake üy mu: Ngünechen, Señor kam Dios üytungeki. Welu kuybi wirintukungelu Biblia, Chaw Dio tañi üy mülekebüy relge warangka mu. Kimelkebilu pu che Chaw Dio mu, Jesu mübükechi pünekebüy beychi üy. Papiltunge Juan 12:28.
Pebinge tati video ¿Nii Chaw Dio kiñe üy?
4. ¿Duamneiñmu Chaw Dio?
Chaw Dio ayüki taiñ kümelkaleal, tübachi piwkeyechi chaw reke
Rüb piwkeyeiñmu Jewba ¿chemu bemkünoki kutrankawün? Kiñeke che rakiduamki Kidu kutrankakeiñmu pengelal taiñ bemabel. Welu tüba rüb ngelay. Papiltunge Santiaw 1:13.
Chaw Jewba eluiñmu kidutu ngümintual taiñ rüpü mongen mu. Beymu ngümintual taiñ poyeabel Kidu, doy kümi (Josué 24:15). Alün pu che ngümintuy tañi wedalkaal, beymu müli bentren kutrankawün. Welu Chaw Jewba pebilu taiñ kutrankawün, kabey Kidu kutrankawi. Papiltunge Génesis 6:5, 6.
Jewba piwkeyeiñmu ka ayüki taiñ ayüwün-ngechi mongen nieel, beymu püchün upa mu apümabi kutrankawün ka wedake dungu. Kidu küme kimni chemu bemkünoki kutrankawün. Kimelün 8 mu kimelngeay tüba. Papiltunge 2 Pedro 2:9, ka 3:7, 13.
5. ¿Chumngechi inabülkonabüiñ Chaw Dio mu?
Jewba eypieiñmu taiñ ngillatuabel taiñ inabülkonal Kidu mu. Duamneiñmu kiduke iñchiñ (1 Juan 5:14). Küpa ulpakünol taiñ yabkan ka balintubi taiñ poyeabel Kidu, küdawngele ume. Bemngechi, weniyeabüiñ may, yabkachengeliiñ ume. Papiltunge Salmo 103:12-14, ka Santiaw 4:8.
Kidu elueiñmu mongen, beymu doy piwkeyeabiiñ kake che mu (Marku 12:30). Doy kimliiñ Kidu mu ka mupituliiñ tañi werkün dungu, pengelaiñ taiñ piwkeyebel. Bemngechi doy inabülkonaiñ Kidu mu. Papiltunge 1 Timotew 2:4, ka 1 Juan 5:3.
