¿Inei pingei ti rüfngechi Ngünechen? Biblia feipi, Jehová pingei. Quisu com deumai (Apocalipsis 4:11). Cuifi mu, mülequefui che poyequefilu ta Jehová: Abrahán, Moisés ca Jesús (Génesis 24:27; Éxodo 15:1, 2; Juan 20:17). Felei llemai, com pu che mülelu Mapu meu, poyeafui ta Jehová (Salmo 47:2).

 Biblia feipi Chau Dios Jehová pingei (Éxodo 3:15; Salmo 83:18). ¿Chem cüpa feipi tañi üi? Quiñeque quimche feipiqueingün Chau Dios ñi üi hebreo quehun meu cüpa feipi: “Iñche Feman Chem tañi Ayüqueel ñi Femal”. ¿Chem quimeltueiñmu tüfa? Chau Jehová itrocom dungu deumafi ca chem tañi feipicünuel rumel huechunenturpuquei (Isaías 55:10, 11). Biblia quimeleiñmu ñi chumngen ta Chau Dios ca pengeleiñmu quisu piuqueyen mu femquei com dungu (Éxodo 34:5-7; Lucas 6:35; 1 Juan 4:8).

 Hebreo quehun meu Chau Dios tañi üi femngechi huirintucungei: יהוה (YHWH), fei tüfa Tetragramaton pingei. Nehue quimngequelai chumngechi ñi dungungequefel. Huelu huincadungun meu, tüfachi üi femngechi rulpadungungei: Jehová. Mapudungun meu fentren che ca femngechi feipiquei. Tati Biblia Ngünechen ñi Neyüntükumuyümchi Chillka pingelu, Chau Dios tañi üi 18 troquiñ meu tripai, tüfachi Biblia mapudungun meu entungei 1901 tripantu meu.⁠ a

Quimngequelai chumngechi feipingequeel Chau Dios ñi üi

 Cuifi mu hebreo quehun dungu meu, huirintucungelafui chem vocal no rume (a, e, i, o, u). Fei ti che petu entulu tañi papeltun, quisu dungulquefui femngechi letra. Huirintucungelu hula com ti hunen troquiñ Biblia Hebreo quehun meu, Antiguo Testamento pingelu, quiñeque judio eluhuingün ñi inayal quiñe coila huimtun: feipihuelaingün Chau Dios tañi üi. Nehuentu papeltulu engün, “Ñidol” ca “Dios” feipiquefuingün. Ñochiquechi doi che eluhuingün ñi inayal tüfachi coila huimtun, fei rupan mu ta tripantu ngoimangerpui chumngechi feipingequefui Chau Dios ñi üi ellaca meu.⁠ b

 Quiñeque che raquiduamquei Chau Dios ñi üi “Yahweh” (“Yahvé”) pingequei. Mar Muerto troquiñ mapu mu pengei quiñe chumpol lifru huirintucungelu quiñe troquiñ Levítico pingechi lifru meu, griego quehun meu huirintucungei ca tripai Chau Dios ñi üi, tüfa mu feipi: “lao”. Caquelu che huirintucuniequefulu griego quehun meu, raquiduamquefuingün ñi femngechi huirintucungeal Chau Dios ñi üi: “Iaé”, “Iabé” cam “Iaoué”. Huelu petu quimngequelai ñi femngechi feipingequefel Chau Dios ñi üi hebreo quehun mu.⁠ c

Caque coilaque dungu ñi raquiduamqueel ta che Chau Dios ñi üi meu

 Quiñeque che ñi feyentuquen: Quimngequelai chumngechi feipingequefui Chau Dios ñi üi Hebreo quehun meu. Feimu ngelai ñi huirintucungeal Biblia meu.

 Ti rüf dungu: Tati pu che femngechi feipiquelu, raquiduamquei Chau Dios ayüquei com pu che feipial tañi üi chumngechi feipingequefui cuifi hebreo quehun meu. Huelu Biblia pengeli cuifi meu, pu poyequefilu ta Chau Dios caquerume quehun dunguquefui, feimu calequefui chumngechi feipiquefel caque üi.

 Raquiduamnge chumngechi huirintucungei Biblia meu Josué tañi üi. Tüfachi juez mülerquefui Israel meu. Pu hunenque cristiano hebreo dunguquefulu “Yeshúa” piquefuingün chi, huelu pu griego dunguquelu “lesous” piquefuingün chi. Tati Biblia griego quehun meu, mülei tüfachi üi chumngechi feipingequefel griego quehun meu, huelu hebreo quehun meu mülelai. Fei tüfa pengeli pu hunenque cristiano feipiquefui fillque üi chumngechi ñi dungulngeel quisuque tañi quehun meu (Hechos 7:45; Hebreos 4:8).

 Ca femngechi Chau Dios tañi üi caquerumei chumngechi ñi feipingequen fillque quehun meu. Feimu llemai, rume falin-ngei ñi tripayal Chau Dios tañi üi Biblia meu, quimnoliyiñ rume chumngechi ñi feipingequefel cuifi mu.