Pichiñma mu, com pu che cüme feleai ca quiñeucüleai Ngünechen ñi Gobierno mu. Salmo 72:7 feipi: “Fentren cüme felen müleai”. Huelu Chau Dios ñi Gobierno, ¿chumül ngünenieafi Mapu? ¿Chumngechi femai tüfa? Ca, ¿chumafuiñ taiñ cümelcayaeteu?

Epe puule ñi acual Ngünechen ñi Gobierno, Biblia feipicünui fentren dungu ñi rupayal Mapu mu. Taiñ antü mu müleal ta hueichan (aucan) huall Mapu mu, ngüñün ca cutran, fütraque nüyün, ca doi huesalcaletuai pu che (Mateo 24:3, 7, 12; Lucas 21:11; Apocalipsis 6:2-8).

Biblia ca feipi: “Epe puucülele ñi afal mapu müleyechi dungu, müleai cüdaungechi dungu ca cuñihun-ngeai ta mongen. Tati pu che quisutu piuqueyehuai, rume diñmatuafi ti plata, [...] allcütulayafingün tañi fütaqueche, quim mañumlayai, quisucünuafi engün tañi chafche. Piuqueyelayafi engün quisu tañi pu che, pilayai ñi cümelcautual caquelu che engün, dallucafengeaingün, quim ngünenieulayai engün, rume illcufengeaingün, piuqueyelayafi ti cümeque dungu engün. [...] Rume mallmangeaingün, doyümnieafingün tañi cüme rupaleal müten, huelu doyümlayafingün ta Chau Ngünechen” (2 Timoteo 3:1-4). Afquentu femngechi femquei quiñeque che piafuiñ. Huelu fantepu mu, doi fentren che femngechi femquei.

Feichi 1914 tripantu ta fantepu mu, com tüfachi dungu femtripaquei. Fei quiñeque historiador, politico ca pu che ngüneduamlu ñi rupan Mapu mu, feipiqueingün ñi fente caletun ti dungu 1914 tripantu mu. Quiñe quimche Peter Munch pingelu, nütrami chem ñi rupan 1914 tripantu mu. Quisu feipi: “Rupalu hula ti Primera Guerra Mundial caletui ti dungu. Petu ñi rupanon tüfa, pu che cümelequefui ca maneluuquefui ñi doi cüme felerpual. Huelu feula mülei ta llican, üdehun ca cüme felehuelai ta pu che”.

Femngele rume, maneluhuafuiñ taiñ cüme felerpual. Com huesaque dungu ruparupangelu pengeli ñi fülcülepan Chau Dios ñi Gobierno, ¡müna cüme dungu ta tüfa! Jesús nütrami ti afaelchi antü mu “tati cümeque dungu Chau Dios ñi ngünenietual ta mapu amuldungungeai huall mapu püle, femngechi com troquiñche ñi quimal engün. Fei hula afai mapu meu müleyechi dungu” (Mateo 24:14).

Pu Dunguquelu Ineingen Jehová müna nütramcachequei feichi cüme dungu mu. Feimu tañi doi quimngeelchi chillca feipilei Ti Huerquen. Quimeltumequei Chau Jehová ñi Gobierno. Tüfachi chillca ngüneduamquei ñi chumal Chau Ngünechen ñi cümelcayafiel pu che ca ti Mapu.

Taiñ quimal tüfa, ngüneduamaiñ meli dungu:

1. Chem politico no rume coneltulayai tüfachi Gobierno mu.

2. Pu politico pilayai tañi müntuñmangeal ñi loncolen, feimu hueichayafi engün ta Chau Dios tañi Gobierno, huelu refalta femaingün (Salmo 2:2-9).

3. Chau Dios tañi Gobierno apümcayafi pu che ñi gobierno (Daniel 2:44; Apocalipsis 19:17-21). Feimu müleai quiñe fütra hueichan, Armagedón pingei (Apocalipsis 16:14, 16).

4. Armagedón mu Chau Dios cuñiutucuafi com pu eluulu ñi ngünenieaeteu. Fei cüme elcünungetule chi Mapu, cüme feleaingün. ¿Tunten che montulngeai? Biblia feipi “quiñe fütra troquiñche”, alün millon che peno (Apocalipsis 7:9, 10, 13, 14).

Taiñ cümelcayaeteu Chau Dios ñi Gobierno duamfali taiñ nieal quimün. Feimu Jesús feipifi tañi Chau: “Ñi nieal engün rumel mongen, mülei tami quimaeteu engün, tati quiñen rüfngechi Ngünechen, ca ñi quimafiel ta Jesucristo, eimi tami huercüfiel” (Juan 17:3).

Cüme quimniefiliyiñ ta Chau Jehová, doi cümelcaletuaiñ. ¿Chumngelu? Hunelu mu, doi maneluhuaiñ Chau Dios mu. Feimu duamfali taiñ quimal ñi femtripan com tañi feipicünuel Chau Dios. Fei tüfa quelluaiñmu doi feyentual quisu ñi pürüm ngünenieafiel Mapu (Hebreos 11:1). Ca epu, doi piuqueyenieafiyiñ ta Chau Dios ca taiñ pu chafche. Fei piuqueyefiliyiñ ta Ngünechen, com piuque mu eluhuaiñ taiñ allcütuafiel. Ca piuqueyechefengeliyiñ, inanieaiñ tüfachi ngülam ñi feipiel Jesús: “Chumngechi ayüqueimün tamün femngeal, ca femngechi femafimün ta caquelu che” (Lucas 6:31).

Quiñe cüme chau reque, taiñ Huenu Chau ayüniei iñchiñ taiñ cüme feleal. Quisu eluaiñmu “tati rüfngechi mongen” (1 Timoteo 6:19). ¿Chem am ta tüfa? Feichi “rüfngechi mongen” trürlai chumngechi ñi mongelequen pu che fachantü. Fentren che müna cutrancauquei, fei ngünam mongelen piqueingün. Fei taiñ quimal chumletual iñchiñ, ngüneduamaiñ chumai Chau Dios ñi Gobierno taiñ cümelcayaeteu.