Quiñe peñi bengali dunguquelu feipi: “¡19 tripantu esperaniefuiñ!”. ¿Chem am esperaniefui? Ñi tripayal ti Traducción del Nuevo Mundo de las Escrituras Griegas Cristianas quisu tañi quehun mu. Fentren che feipiquei tüfachi peñi reque tripan mu ti Traducción del Nuevo Mundo quisu tañi quehun mu. Huelu ¿chumngechi rulpadungungequei ca deumangequei tüfachi Biblia?

 Hune dullingequei quiñeque peñi ca lamngen ñi rulpadunguafiel Biblia, fei engün adnieyu ti Troquiñche adcünuquelu ñi huirintucungeal fillque papel. ¿Tunten tiempo duamfali ñi rulpadungungeal ta Biblia? Peñi Nicholas Ahladis cüdauquei tati Troquiñche Quelluquelu ti Rulpadungun Cüdau mülelu Warwick huaria mu (Nueva York). Fei feipi: “Com rulpadungun trürlai tunten tiempo ñi nentungeal. ¿Tunten pu peñi ca lamngen rulpadunguaingün? ¿Rume cüdaungei ti quehun dungun? Papeltualu ti rulpadungun, ¿quimniefingün chumlequefel ta mongen ñi huirintucungen mu ta Biblia? Caque lof mu, ¿caquerumequei ti quehun dungu? Quiñe equipo quiñe cam cüla tripantu alüñmayafui ñi rulpadunguafiel ti Griego Huirintucun, ca meli tripantu alüñmayafui ñi com rulpadunguafiel ti Biblia. Ñi rulpadungungeal seña quehun dungu duamfali doi alün tiempo”.

 Ñi rulpadungungeal Biblia, duamfal-lai re rulpadunguquelu müten, ca mülei quiñeque peñi ca lamngen papeltuquelu ti rulpadungun. Fei engün feipiquefi pu rulpadunguquelu “fau mülefui ñi cümelcacünungeal”. Tüfachi pu peñi ca lamngen cofraquelaingün ñi quellun mu. Dullingequei pu peñi ca lamngen caquerume mongen nieingün ca fill tuhun nieingün. Ñi quellun mu tüfa engün, doi adümfalngei ti rulpadungun Biblia. Quiñe peñi Sudáfrica mülelu quimeltuquefi pu peñi ñi rulpadunguafiel Biblia. Fei feipi: “Pu rulpadunguquelu ayünieingün ñi püramyengeal ta Jehová. Quimnieingün ñi rulpadungun ñi rume papeltungeal, feimu rume falintuquefi ñi cüdau engün”.

 Deu deulu ti rulpadungun, mülei ñi deumangeal ta Biblia. ¿Chem pünengequei ñi deumangeal? Papel, tinta, tapa, pünangepeyüm, quiñe huilüf pintura, cinta ñi marcacünungeam quiñeque versiculo, quiñe carton ca quiñe tela com ñi trapümnieafiel ti hoja. ¿Tunte fali tüfa ñi pünengequeel tañi deumangeal ta Biblia? 2019 tripantu mu müten, pünengei 20 millon dolar com ñi ngillangeam tüfa. Ca femngechi pu peñi, pu lamngen cüdahuingün doi 300.000 hora ñi deumangeal ta Biblia ca ñi huercüngeal com huall Mapu mu.

 ¿Chumngelu pünengequei rume fentren plata tüfachi cüdau mu? “Fillque lifru ta deumaqueiñ, huelu iñchiñ doi rume falintuquefiyiñ ta Biblia”, pi taiñ peñi Joel Blue, fei cüdauquei ti Troquiñche adcünuquelu ñi deumangeal lifru com Mapu mu. Ca feipi taiñ peñi: “Ayünieiñ Biblia tañi rume cümelcaleal, fei ñi püramyengeal ta Chau Ngünechen ca taiñ doi cüme lloungeal ta amuldungun mu”.

 Huelu quiñeque che pepi papeltuquelafi tati Biblia ñi doi deumangequeel. Quiñe ejemplo, quiñeque che puuquintuquenolu duamniei ñi deumalelngeal Biblia engün braille huirintucun mu. Traducción del Nuevo Mundo braille huirintucun mu papeltungeafui 10 quehun dungu mu. Puhuafui pura hora ñi deumangeal quiñe Biblia braille huirintucun mu. Niei fentren tomo, com trahulngele, 2,3 metro puhuafui. Cafei, quiñeque carcel mu, pu preso eluñmangequelai ñi nieal lifru nielu yafüchi tapa. Feimu deumaqueiñ Biblia re papel tapa nielu müten.

 Traducción del Nuevo Mundo rume cümelcaquefi pu che papeltufiel mu. Inaduamaiñ ñi rupan ti trahunche kiluba dunguquelu mülelu La Tombe huaria mu (República Democrática del Congo). Feichi huaria mülei 1.700 kilometro peno capital mu. Feichi trahunche mu pu peñi niefuingün quiñe Biblia müten. Feiti Biblia huirintucungefui fütra cuifi chumngechi ñi dunguquefel pu che, feimu nehue adümngequelafui. Pu peñi hueluconque areluuquefuingün ti Biblia ñi pepicahual trahun mu engün. Huelu agosto 2018 tripantu mu, tripai ti Traducción del Nuevo Mundo kiluba dungun mu. Tüfa huirintucungei chumngechi ñi dunguquen pu che fachantü, ca quisuque pu peñi ca lamngen niei ñi Biblia engün feula.

 Ti Traducción del Nuevo Mundo aleman quehun mu huiño inaduamngei ti rulpadungun. Fei quiñe lamngen feipi: “Cuifi papeltuquefuiñ ta Biblia quimnielu am iñche ñi femafel. Huelu feula raquiduamcülen müten tañi papeltuafiel”. Quiñe huentru carceltuculelu feipi: “Elungen quiñe Traducción del Nuevo Mundo, fei petu cümelcacünuñmatueneu tañi mongen. Caquelu Biblia tañi papeltufiel mu, nehue cüme quimquelafuiñ. Huelu tüfa rume cüme quimeltueneu. Ayünien tañi doi cüme quimafiel ta pu Dunguquelu Ineingen Jehová, fei ayünien ñi quimal chumngechi ñi conal fei engün mu”.

 Papeltuquefilu ti Traducción del Nuevo Mundo rume mañumcüleingün ñi rulpadungungen mu ca deumangen mu tüfachi Biblia. Deumangequei tüfachi cüdau hulngequeelchi plata mu ñi llouqueel taiñ troquiñche. Tati pagina donate.mt711.com mu pengelngequei chumngechi hulngequei tüfachi plata. Mañumniehuiyiñ tamün hulün tamün plata com tamün piuque mu.