Isaías 42:1-25
42 ¡Uñtapjjam, jupaw nayan servirijajja,+ juparuw nayajj apoyta!
¡Jupajj nayan ajllitajawa,+ nayajj wal jupat kusista!+
Juparuw nayajj espirituj churta,+jupaw markanakatakejj kunatï cheqapäki uk apanini.+
2 Jupajj janiw arnaqaskaniti ni jachʼatsa parlkaniti,janirakiw callensa arup istʼasiykaniti.+
3 Janiw pʼakit cañsa jukʼamp pʼakjkaniti,janirakiw jewqʼeskiri micha pawilsa jiwaykaniti.+
Jupajj jan jaytjasirïniwa, justicia apanirakini.+
4 Oraqen justicia uttʼayasiñapkamajja, jupajj janiw aynachtʼkaniti ni desanimaskanisa.+
Islanakajj jupan leyipwa* suytʼasipki.
5 Cheqpach Jehová Diosajj akham siwa,mä arunjja alajjpachanak Luriri, alajjpachanak janatatiri Jachʼa Diosajja,+oraq luriri, oraq achoqayiri,+oraqen jakirinakar saman churiri,+oraqen sarnaqerinakar espíritu churir Diosajj akham siwa:+
6 “Naya Jehová Diosaw kunatï cheqapäki uk lurañatakejj jumar jawssma,amparamatwa kattʼaraksma.
Nayaw jarkʼaqäma, markankir jaqenakatakejj mä pactökasmas ukhamwa churäma,+markanakan qhanapäkasmas ukhamwa churäma,+
7 ukhamat jumajj juykhunakan nayranakap jistʼarañamataki,+preso katuntat jaqer calabozot apsuñamataki,chʼamakan qontʼatäsipki ukanakar carcelat apsuñamataki.+
8 Nayaw Jehová Diosätjja, ukaw nayan sutijajja,naya saparukiw adorasiñapa,* janiw khitir adorasiñap permitkäti,*naya saparukiw jachʼañchasiñapa, janiw idolonakar jachʼañchasiñap permitkäti.+
9 Uñtapjjam, kunanaktï nayajj nayra tiempotpach sisjjayäta ukanakajj phoqasjjewa,jichhajj kunanakatï machaqäki ukanakwa yatiyapjjsma.
Janïr ukanak paskipanwa nayajj ukanakat yatiyjjapjjsma”.+
10 Lamar qotnam viajirinaka, taqe kunanakatï ukan utjki ukanaka,islanaka, uka islanakan jakirinaka,+mä machaq canción Jehová Diosar cantapjjam,+oraqen thiyanakapatpach* jupan alabanzap cantapjjam.+
11 Wasarasa markanakapasa arnaqasipjjpan,+Quedar+ markajj jakki uka lugaranakas arnaqasipjjpan.
Jachʼa qarqa* lugaranakan jakirinakajj kusisiñat arnaqasipjjpan,qollunak patjjatpach arnaqasipjjpan.
12 Taqe jupanakajj Jehová Diosar jachʼañchapjjpan,islanakajj jupan jachʼañchäwipat yatiyapjjarakpan.+
13 Jehová Diosajj wali chʼamani guerran nuwasir mä jaqjamaw mistuni.+
Guerrar sarañ wal muniri mä jaqer uñtasitäniwa.+
Arnaqasiniwa, jïsa, guerrar saririnakjamaw arnaqasini,enemigonakapat sipansa jukʼamp chʼamanïtapwa uñachtʼayani.+
14 “Walja tiempow nayajj amukiyätjja.
Amukiyätwa, janirakiw kamskayätsa.
Ususir warmjamawnayajj ayqöjja, samaqëjja, phusasirakëjja.
15 Qollunaksa jiskʼa qollunaksa qʼal tʼunjäjja,taqpach chʼojjña alinakapwa wañsuyarakëjja.
Jawiranaksa islanakaruw tukuyäjja,cañanakampi phoqantat jiskʼa qotanaksa wañtʼayäwa.+
16 Juykhunakarojj jupanakan jan uñtʼat thaknamaw irpäjja,+jan uñtʼat thakinakwa taktʼayarakëjja.+
Jupanak nayraqatanjja chʼamakarojj qhanaruw tukuyäjja,+jan sarnaqañjam oraqjja plano oraqeruw tukuyäjja.+
Jupanak laykojj ukanakwa nayajj luräjja, janiw jupanakarojj apanukkäti”.
17 Khitinakatï idolonakar confiyapki ukanakarojja,munkir jan munkirwa kuttʼayapjjani, qʼala phenqʼachataw uñjasiyapjjani,jïsa, khitinakatï metalat lurat idolonakarojj “jumanakaw nanakan diosanakajäpjjtajja”+ sasin sapki ukanakajj ukhamaw uñjasipjjani.
18 Oqaranaka, jumanakajj istʼapjjam,juykhunaka, jumanakajj uñtapjjam, uñjapjjarakim.+
19 ¿Khitis servirij-jam juykhojja?
¿Nayajj khitkta uka yatiyirjam khitis jukʼamp oqarajja?
¿Khitis pago katoqerjam jukʼamp juykhojja?
¿Khitis Jehová Diosan serviripjam jukʼamp juykhojja?+
20 Jumajj waljanakwa uñjtajja, ukampis janiw atención usktati.
Jumajj jiñchunakanïtawa, ukampis janiw istʼktati.+
21 Cheqapar uñjirïtap laykojja,Jehová Diosajj leyir* jachʼañchasa kʼajkirir tukuyasajj kusisiwa.
22 Ukampis aka markajj qʼala saqueysutawa, lunthatsutarakiwa,+taqe jupanakajj pʼiyar jaltʼasaw katuntat uñjasipjje, carcelanakan jistʼantataw uñjasipjjaraki.+
Jan khiti salvirin qʼala saqueysutaw uñjasipjje,+apataw uñjasipjje, janiw khitis jupanakat “¡kuttʼayanipjjam!” siskiti.
23 ¿Khitis jumanak taypit uk istʼani?
¿Khitis atención uskuni, istʼarakini, ukhamat jutïrit beneficio apsuñataki?
24 ¿Khitis Jacoburojj kunanakatï saqueysutäki ukanakarjam apjjaruyi?
¿Khitis Israelarojj saqueysur jaqenakar apjjaruyi?
¿Janit jiwasanakajj Jehová Dios contra juchachasktanjja?
Jupanakajj janiw Diosan thakinakapan sarnaqañ munapkänti,janirakiw leyipar* istʼañsa munapkänti.+
25 Ukhamasti Diosajj jupanakatakejj wal colerasïna,guerran tʼaqesipjjañapatakiw jaytarakïna.+
Colerasitapajj kunanakatï jupa muytpachankkäna taqe ukanakwa nakhantäna, ukampis janiw istʼapkänti.+
Walpun jupanak contrajj colertʼasïna, ukampis jupanakajj janiw yäqapkänti.+
Notanaka
^ Jan ukajja, “yatichäwipwa”.
^ Jan ukajja, “yupaychasiñapa”.
^ Jan ukajja, “nayar jachʼañchasiñapäki uk janiw khitimpis compartkäti”.
^ Variante: “qawayanakapatpach”.
^ Variante: “jaqhe”.
^ Jan ukajja, “yatichäwir”.
^ Jan ukajja, “yatichäwipar”.
