JAQENAKAJJ MAYNINAKAN MUNATÄÑ WAL MUNAPJJE. Matrimonionsa, familiansa, amigonakamp sum apasiñatakisa, munasiñajj wali wakiskiriwa. Munasiñajj amuyusansa chuymasansa sum jikjjatasiñatakiw yanaptʼistu. Ukampis ¿kuna kasta munasiñatsa parlasktanjja?

Janiw chacha warmjam munasiñat parlktanti, jan ukasti jukʼamp wakiskir yaqha munasiñatwa parlasktanjja. Uka kasta munasiñan jaqejja, janiw munañapak thaqkiti, jan ukasti chuymatpachwa mayninakat llakisi. Uka munasiñajj Biblian yatichäwinakaparjamawa.

Bibliajj akham siwa: “Munasir jaqejj paciencianiwa, khuyapayasiriwa. Munasir jaqejj janiw envidiasirïkiti, janiw jachʼa jachʼa tukurïkiti, janiw wali wal tukurïkiti, janiw kunatï jan lurañäki ukanak lurkiti, janiw kunatï jupatak walïki ukak thaqkiti, janirakiw jankʼak coleraskiti. Janiw kuna jan wal luratas amjjäskiti. Kunatï jan cheqapäki ukatjja janiw kusiskiti, jan ukasti kunatejj cheqäki ukatwa kusisi. Munasir jaqejj taqe kunansa amukiw tʼaqesi, [...] taqe kun suytʼi, taqe kun aguanti. Munasiñajj janipuniw tukuskiti” (1 Corintios 13:4-8).

“Munasiñajj janipuniw tukuskiti”. Tiempompejj jukʼampiw uka munasiñajj jiltaspa. Munasir jaqejj pacienciani, khuyapayasiri, perdonasiri ukhamawa, ukatwa Bibliajj “munasiñajj wali sum mayachthapi” sasin qhanañchi (Colosenses 3:14). Ukhamasti, munasiñajj utjki ukhajj taqenimpiw sum apastanjja. Pantjasirïkstansa, kusisitaw jakastanjja. Jichhajj casarat chacha warminakat parltʼañäni.

Jesucristojj chacha warmjam sum jakasiñatakejj suma ewjjanakwa yatichäna. Jupajj akham sänwa: “‘Chachajj awkiparus taykaparus jaytjjani[wa], ukatsti warmipampiw mayachasjjarakini, panipasti mä jañchikëjjapjjaniwa’ [...]. Ukhamajj kuntï Diosajj mä yukur mayachki ukjja, jan khiti jaqes jaljtaypanti” sasa (Mateo 19:5, 6). Aka textonjja, pä suma ewjjanakaw utji.

“PANIPASTI MÄ JAÑCHIKËJJAPJJANIWA”. Matrimonionjja munasiñaw utjañapa. Chacha warminakatï munasipjjani ukhajja, janiw yaqha chachampisa ni yaqha warmimpis sarnaqapkaniti. Mä arunjja, janiw yaqha chachampisa ni yaqha warmimpis ikintasipkaniti (1 Corintios 6:16; Hebreos 13:4). Maynejj yaqhamp sarnaqki ukhajja, familiarojj jan waltʼayiwa, wawanakas wal tʼaqesipjje. Awk taykapajj janis jupanakar munasipkaspa ukhamwa amuyasipjjaspa, chuym ustʼataw jakasipjjarakispa.

‘KUNTÏ DIOSAJJ MAYACHKI UKA’. Matrimoniojj Dios nayraqatan wali qʼomawa. Chacha warminakajj ukham uñjapjje ukhajja, sum apasiñatakiw chʼamachasipjje. Jan walinak utjkipansa janiw jaljtapkiti. Niyakejjay wal munasipjjchejja, jan walinak askichañataki, sumankañataki, purapat sum uñjasiñatakiw chʼamachasipjje.

Wawanakajja, awk taykapajj purapat munasiñampi uñjasipjje ukhajj kusisitaw jakasipjje. Jessica sat mä tawaqojj akham siwa: “Awk taykajajj wali munasiñampi respetompiw uñjasipjje. Papitujajj kuns amti ukhajja, mamitajajj respetompiw istʼi, uk uñjañajj mamajat yateqasiñatakiw chʼamañchtʼitu” sasa.

Diosajj wali munasiriwa. Ukatwa “Diosajj munasiñawa” sasin Bibliajj qhanañchi (1 Juan 4:8). ‘Kusisiri Diosawa’ sasin Jupat saraki (1 Timoteo 1:11). Ukhamajj jiwasatï Diosjam munasirïñäni ukhajja, kusisitaw jakasiñäni. Efesios 5:1, 2 qellqatajj akham siwa: “Diosan munat wawanakapjamajj jupat yateqasipjjam, munasiñan sarnaqasipkakim” sasa.