Mayninakat sinttʼasiñasawa
¿Kunatsa?
Mayninakajj kunanakansa jiwasanakat mayjäpjje uk sinti uñchʼuksna ukhajja, jupanakan mayjäpjjatapajj jan walïkaspasa ukhamwa amuyjjsna. Ukham amuyasajj jupanakar jiskʼachañwa qalltjjaraksna. Kunapachatï ukham amuyjjtan ukhajj jupanakat sinttʼasiñas chʼamäjjaspawa, mä arunjja, kunjamas jikjjatasipjje uk janiw amuyjjsnati. Jan sinttʼasirïñajj mayninakar yaqhachañaruw apistaspa.
¿Kunjamsa Bibliajj yanaptʼistaspa?
“Khitinakatï kusisipki ukanakampejj kusisipjjam. Khitinakatï jachapki ukanakampejj jachapjjarakim” (ROMANOS 12:15).
¿Kunsa ukajj yatichistu? Uka textojj mayninakat sinttʼasiñwa yatichistu. Ukatakejj mayninakajj kunjamäsipkisa ukwa amuyañasa.
¿Kunjamsa sinttʼasiñajj yanaptʼistu?
Mayninakat sinttʼastan ukhajj jupanakjamätaswa amuyastanjja. Jupanakas jiwasjam jikjjatasipjjatapa, jiwasjam kusisipjjatapa, jiwasjam llakisipjjatapwa amuytanjja. Sinttʼasiñajj taqenis mä igualakïtas amuyañatakiw yanaptʼistu. Mayninakampejj kunanakansa igualakïtan uk amuyañatak chʼamachasiñäni ukhajja, janiw jupanakat jan walinak jankʼak amuykañäniti.
Sinttʼasiñajj mayninakar respetañatakiw yanaptʼistani. Senegal markankiri Anne-Marie warmejj yaqhachat mä qhawqha jaqenakarojja, jaqenakan yaqhachapjjatap laykojj yaqhacharakirïnwa. ¿Kunjamsa sinttʼasiñajj yanaptʼäna? Jupajj akham siwa: “Uka jaqenakan wal tʼaqesipjjatap uñjasajja, ‘jupanakjam uñjasirista ukhajj kunjamakis jikjjatasirista’ sasaw amuyayäta. Nayajj jupanakat jan jilankatajwa amuyasiyäta, janirakiw jilankañatakejj kuns lurkayätti” sasa. Jiwasatï mayninakajj kuna jan walinakansa uñjasipjje uk amuyañatak chʼamachasiñäni ukhajja, jupanakat sinttʼasiñäniwa, janirakiw jan walinaks parlkañäniti.
¿Kunsa lursna?
Mä qhawqha jaqenakar yaqhachstan ukhajja, kunanakansa jupanakjamätan uk amuytʼañasawa. Akham amuytʼañäni, yaqhachktan uka jaqenakajja:
Sinttʼasirïñajj taqenis mä igualakïtas amuyañatakiw yanaptʼistu.
¿Familiapamp manqtʼasisajj kunjamakis jikjjatasipjje?
¿Jornälpach trabajisajj kunjamakis jikjjatasipjje?
¿Amigonakapamp chikäsajj kunjamakis jikjjatasipjje?
¿Jupanakar wal gustki uka music istʼasajj kunjamakis jikjjatasipjje?
Jiwasas jupanakäksna ukham amuytʼasajj akham jisktʼasiñäni:
‘¿Janis kunatak sirvkirista ukham maynejj amuyayitaspa ukhajj kamachiristsa?’.
‘¿Jan sum uñtʼkasin jan walinak nayat parlapjjaspa ukhajj kunjamakis jikjjatasiristjja?’.
‘Nayatï yaqhachat jaqenakat maynïrirïsta ukhajj ¿kunjam uñjatäñsa muniristjja?’.
Akanakajj inas gustarakiristam
YATIYAÑATAKI
¿Diosajj jumat sinttʼaspachati?
Diosajj jiwasat sipansa jukʼamp sum uñtʼistu. Kunjamanakansa uñjastan, kunas chuymasan utji, kunjamäsktansa taqe ukanakwa yati sasaw Bibliajj yatichi.
¡SARTAPJJAÑÄNI!
Sum jakasiñataki: Familiampi amigonakamp sum apasiña
Mayninakamp sum apasiñatakejja, katoqañat sipansa churañasawa.
