Mishel: Kamisaki, vecinonakamampiw aka tratadot parltʼaskayäta. Akham pʼeqeñchäwiniwa ¿Kunatï chiqäki uk yatiñ munasmati?, akajj jumatakiwa.

Sofía: ¿Religionatti parli?

Mishel: Jïsa. Akanjja, sojjta jisktʼanakaw utji. ¿Kawkïr jisktʼatsa yatjjatañ...?

Sofía: Janiw kuns yatiñ munkti, nayampejj tiempok aptʼasïta.

Mishel: ¿Kunats ukham sista?

Sofía: Qhana arunjja, nayatakejj janjamakiw Diosajj utjkiti.

Mishel: Walik ukham qhana arumpejj sistajja, ukampis ¿ukhampunt nayratpach amuyayäta?

Sofía: Janiwa, wawäkasin iglesiarojj sarapuniriyätwa, ukampis jaya maranakaw jan sarjjti.

Mishel: Ukhamajj jaya maranakat jan sarjjta. Janirakis sum aruntasktantejjä, nayajj Mishel satätwa. ¿Jumasti?

Sofía: Nayajj Sofía satätwa.

Mishel: Waliki, ukhamajj uñtʼasiñäniwa.

Sofía: Walikiwa.

Mishel: Nayajj janiw kuntï Dios toqet amuykta uk munkir jan munkir nayjam amuyañamatak jutkti, ukampis may jisktʼañ munsma. ¿Kunas Diosan utjatapat pächasiytamjja?

Sofía: Mä kutejj mamajaw mä chijir purtʼasiwayi ukhat jichhakamajj 17 maranakäjjewa.

Mishel: ¡Ukajj wali llakkañarakisä! Ukat ¿sintti usuchjasiwayi?

Sofía: Ukhat jichhakamajj janiw sartirjamäjjeti.

Mishel: Ukhamajj wali chuyma ustʼataw jikjjataspachätajja.

Sofía: Jïsa. Ukatpï Diosat pächastjja. ¿Kunatsa Diosajj jan walinak utjaypacha? ¿Kunatsa tʼaqhesiyistu?

Mishel: Ukham jisktʼasiñajj janiw jan walïkiti. Maynejj tʼaqhesiski ukhajj ¿kunatsa ukham tʼaqhesiñanakajj utjpacha?, sasaw jisktʼasispa. Biblia qellqaskän uka tiempon jakiri taqe chuyma Diosar servirinakatjja, yaqhep chacha warminakajj ukhamanwa uñjasipjjarakïna.

Sofía: Ukhamajj ¿walikïskiti?

Mishel: Jïsa, uka toqet sum amuytʼañatakejj ¿kunjamsa mä profetajj jikjjatasïna uk yatjjatañ munasmati?

Sofía: Muniristwa.

Mishel: Jupajj Habacuc satänwa, ukat mä kutejj akham sasaw Diosar jisktʼatayna. Ukatakejj Biblia liytʼañäni Habacuc 1 jalja 2, 3 jiskʼa tʼaqanaka, ukan akham siwa: “Dios Tatay, ¿Kunapachkamasa arnaqasëjja yanaptʼama mayisajja, jumasti janirak istʼkitätati? ¿Kunapachkamasa arnaqasëjja aka tʼaqhesiñanakanjja, jumatejj jan nanakar qhespiyir jutkät ukkhajja? ¿Kunatsa ukataq llakisiñanaka, tʼaqhesiñanaka uñjayista?” sasa. ¿Uka pachpa jisktʼanak jisktʼasirïtati?

Sofía: Jïsa.

Mishel: Habacuc chachan ukham satapat Diosajj janiw coleraskänti, ni jukʼamp iyawsäwinïñamawa sasins siskänsa.

Sofía: Ukajj muspharkañarakisä.

Mishel: Kunjamsa tʼaqhestan uk Diosajj uñjiwa ukat llakisirakiwa sasaw Bibliajj yatichi.

Sofía: ¿Kunjamarak llakisisti?

 Mishel: Uk sum amuyañatakejj Biblia uñjjattʼañäni Éxodo 3:7 jiskʼa tʼaqa. ¿Liytʼasmati?

Sofía: Akham siwa: “Ukat Tatitojj sarakïnwa: Nayajja sumwa uñjta, kunjamtejj markajjajja, Egipton tʼaqhesipki ukjja. Ukhamarak uka wali munañani jaqenak causa arnaqasipjjatanakapsa istʼaraktwa, ukampis nayajj sum yatta jupanakan tʼaqhesitanakapjja”.

Mishel: Yuspära. Aka qellqatarjamajj ¿jaqenakan tʼaqhesitanakap Diosajj uñjpachati?

Sofía: Amuyatajj ukhamjamakiwa.

Mishel: Ukhamawa, ukampis janiw aleq ukhamak uñtankiti, jan ukasti kunjamtï niya tukuyarojj siskejja: “Nayajj sum yatta jupanakan tʼaqhesitanakapjja” sasaw qhanañchi. ¿Mä jan sinttʼasiri jan ukajj jan yäqasir Diosajj ukham saspati?

Sofía: Janjamakiw ukham siskaspati.

Mishel: Jïsa, maynir tʼaqhesiskir aleqak uñjañampi ukat uñjasin sinttʼasiñampejj janiw kikpäkiti ¿janich ukhamäki?

Sofía: Ukhamäskapuniwa.

Mishel: Janipun uk armasimti. Jichhajj kunjamsa markapar tʼaqhesiskir uñjasajj jikjjatasïna uk uñjarakiñäni. Ukatakejj Salmo 106:44 liytʼañäni, ukanjj akham siwa: “Ukampis Tatitojj ayqopjjatap uñtanïna, arnaqasitanakaparuw istʼäna” sasa. Ukhamajj ukham markapar tʼaqhesiskir uñjasajj ¿Diosajj chuym usuyaspachänti?

Sofía: Jïsa, chuymas ustʼataw jikjjataspachäna.

Mishel: Ukhamawa, Diosajj jiwasanakat wal llakisi ukat janiw tʼaqhesiskir uñjañ munkistuti. Jaqenakar tʼaqhesir uñjasajj Jupajj tʼaqhesirakiwa.

Mishel: Akamp yatjjatawaysnastï.

Sofía: Walikiwa.

Mishel: Diosajj qawqha chʼamanis uk Bibliajj akham qhanañchtʼi, amp suma ¿Jeremías 10:12 jiskʼa tʼaqa liytʼasmati?

Sofía: Walikiwa, akham siwa: “Tatitojj chʼamapampiw aka oraqe luri, amuytʼapampirakiw aka oraqsa saytʼayi, chʼikhi kankañapampiw alajjpachsa uskuraki.”

Mishel: Yuspära. Jichhajj mä jukʼa amuytʼañäni, ¿qawqha chʼamsa Diosajj alajjpacha ukat ukan utjki ukanak lurañatakejj wakispachäna?

Sofía: Wali chʼamaw munaspachäna.

Mishel: Jïsa taqe ukanak lurañatakejj Diosajj chʼamaniwa, ukhamajj ¿janit kuna jan walinakatï utjki ukanak tukjañataki jan ukajj chhaqtayañataki chʼamanïkarakpacha?

Sofía: Chʼamaniw sarakisä.

Mishel: Jichhajj mamamat amtañäni. ¿Kunatsa jupar tʼaqhesir uñjasajj wal chuym usuyasta?

Sofía: Kunattejj mamajawa ukat wal juparojj munasirakta.

Mishel: Jumatï añchhitpach qollañatak chʼamanïsma ukhajj ¿qollasmati?

Sofía: ¡Kun janisti!

Mishel: Ukhamajj ak sum amuytʼañäni. Diosajj tʼaqhesitas uñjiwa ukat ukham tʼaqhesiskatasat wal chuym ustʼayasi sasaw Bibliajj yatichi, ukat wali chʼamanirakiwa sasaw qhanañcharaki, ukhamajj Diosajj taqe jan walinak wal tukjañ munaski, ukampis mä suma amtanïtap laykuw jan jankʼak tukjkiti.

Sofía: Janipuniw kunapachas ukham amuyirïkatätti.

Mishel: Ukhamajj ¿kunatsa taqe jan walinak jan jankʼak tukjkpacha? *

Sofía: Janiw kuns kamskiristi.

Mishel: ¿Janit uka toqet sum amuytʼañatakejj mayan kuttʼankirista? Celularamaw wawariski.

Sofía: Walikïspawa. *