Wawaskäyät ukhajja, wali kusisitaw Francia markan awk taykajampi jakasiyäta. Awkijajja, anatañajatakejj mä columpio lurarapitäna ukat jardinan tʼijnaqañas walpun gustitäna. Ukat 1966 maranjja, Jehová Diosan Qhanañchirinakapaw visittʼapjjetu. Awkijajj walj kutiw jupanakamp parlirïna ukat paqallqo phajjsitjja, Jehová Diosan Qhanañchiripäñ amtjjäna. Qhepatjja, mamajajj ukhamarakwa amtjjarakïna. Cheqas wali munasir familianwa jilsuwayta.

Niyakejjay awk taykajajj España markatäpjjchïnjja, uka markaruw kutʼjjapjjayäta. Ukat mä qawqha tiempotjja, kayu moqonakajas amparanakajas wal usjjetäna. Ukatwa qollayasiñatakejj walja doctoranakan ukar pä maranak sarkasin reumatología toqet yatjjatat mä doctorar jikjjatapjjta, jupajj wali uñtʼatänwa. Ukat qhana arumpiw awk taykajar akham säna: “Janiw wawamajj qollasjjaspati” sasa. Uk istʼasajj mamajajj wal jachäna. Kunattejj ‘artritis crónica siski uka usuniw wawamajja, cuerpo manqhan jan walinakat jarkʼaqañapäki uka pachpaw cuerpopar aynachtʼayaski, ukarakiw chʼakha moqonakap pʼusutatayaski ukat wal usuyaski’ sasaw awk taykajar säna. Nayajj 10 maranikïskayätwa, kuntï doctorajj siskäna uk janiw sum amuykayätti, ukampis jan walïtapjja amuyayätwa.

‘Wawanakar qollapki ukaruw qollasiñapatak jaytapjjañama’ sasaw doctorajj awk taykajar säna. Ukanjja wali llakisiñjamänwa, ukampis sojjta phajjsiw ukan qheparta, niyapuniw jiwarakta. Ukanjja, taqe kunas sum phoqañänwa. Monjanakajj ñikʼut mururapjjetäna ukat mä jan wali isimpiw isthapiyapjjetäna. “Kunjamakirak akan jakästi” sasaw chuymajan sirïta.

Niyakejjay awk taykajajj Jehová Diosar serviñ yatichapjjchitojja, kuntï monjanakajj iglesiapan luräwinakap lurapjjerïkäna ukanakjja janiw lurirïkti. Ukampis kunatsa ukanak jan lurkäyät ukjja, janiw istʼañ munapkitänti. Ukatwa, Jehová Diosar yanaptʼa mayisiyäta, ukat amparapampi qhomthapisas ukanakat jarkʼaqkitaspa ukham  amuyasiyäta. Kunjamtï mä awkejj wawapar wali munasiñampi qhomantʼkejja ukhama.

Qollayasiñ utanjja, sabadonakakiw familiaranakajj mä rat visittʼapjjañapäna, ukatwa awk taykajajj Diosat jan jitheqtañajatakejj Bibliat apstʼat qellqatanak uka urojj apanirïna. Monjanakajj janiw khitin libronïñapsa munapjjerïkänti, ukampis nayarojj janiw jarkʼapjjerïkituti. Ukatwa Bibliajas utjitäna ukat sapüruw liyirïta. Wawa masinakajarojja, ‘aka Oraqen jan usuntasa wiñayataki mä paraison jakasiñaw utjkani’ sasaw parlirïta (Apocalipsis 21:3, 4). Llakita ukat saparstʼata ukhamas awisajj uñjaschiyätjja, Jehová Diosarojj jukʼamp confiyasiyäta.

Sojjta phajjsinakatjja, doctoranakajj utaruw khitjjapjjetäna. Kutʼjjasajj kusisitäjjayätwa ukampis usutakïskayätwa. Cuerpojan chʼakhanakapas jukʼampikiw wejjruptaskäna ukat sapa kutiw jukʼamp usjjetäna. Ukham usutäkasasa, Jehová Diosar taqe chʼamajampi serviñ amtta. Ukatwa 14 maranïkasajj bautisasta. Awisajj wali aynachtʼata jikjjatasisajja, akham sasaw Jehová Diosar mayisirïta: “¿Kunatsa nayajj akham usutätjja? ¡Mirä amp suma qolltʼasita! ¿Janit tʼaqhesitaj uñjkista?” sasa.

Tawaqetäjjayät ukhajj llakkañaw jakasiyäta. Kunattejj jan waliptirjamäsajj jukʼamp llakisiyäta, amiganakajar kʼumara, kusisita uñjasajj jupanakjamäñ wal awisajj munirïta. Jan jupanakjamäsajja, janis kunatak servkirista ukham amuyasiyäta ukat janiw khitimpis parlañ munjjayätti. Ukhamäkchïnsa, familiajasa, amigonakajas janipuniw armasipkitänti. Alicia amigajat amtasipuntwa, jupajj nayat 20 maranak jilïrinwa. Jupaw usujat jan sinti llakisiñatak yanaptʼitäna. Usujat llakisiskañat sipansa, mayninakat llakisiñatakiw yanaptʼitäna.

Ukat 18 maranïkayät ukhajj jukʼamp usutäjjayätwa. Cristianjam tantachasipkta ukar sarasas qaritakiw kuttʼanjjerïta. ‘Utankaskirïta’ ukhajja, Bibliat sum yatjjatañatakiw chʼamachasirïta. Job ukat Salmo libronak Bibliat liytʼasajja, jichhürunakan Jehová Diosajj ajay toqet jukʼamp yanaptʼirïtapwa yateqta. Diosar sapa kuti mayisiñaw wali chʼamañchtʼitäna, ukhamatwa chuymajansa sumaki jikjjatasirakta (2 Corintios 4:7; Filipenses 4:6, 7).

Ukat 22 maranëjjayät ukhajja, silla de ruedatakwa sarnaqjjañajäna. ‘Jichhajj silla de ruedan wali usutakwa uñj-jjapjjetani’ sasaw wal llakisiyäta. Ukampis kuntï amuykayät ukajj janiw ukhamäjjänti, antisas mä bendicionäjjänwa. Isabel sat amigajajja, phajjsin 60 horanak jupamp chika Diosan arunakap yatiyañajatakiw chʼamañchtʼitäna.

Qalltanjja janjakiw uk phoqkiristi sasaw amuyayäta, ukampis Diosaruw yanaptʼa mayiyäta, ukat familiaranakajan, amigonakajan yanaptʼapampejj kuntï amtkayät uk phoqawaytwa. Uka phajjsejj jan kunakiw pasjjäna, janirakiw asjjarayasjjayätti. Ukham irnaqtʼañajj askipunïnwa, ukatwa 1996 maran precursor regularjam irnaqtʼañ qalltawayta, sapa phajjsejj 90 horanak yatiyañajänwa. Precursorjam serviñ amtatajajj Jehová Diosar jukʼamp jakʼachasiñatakiw yanaptʼawayitu ukat mä jukʼa usujat waliptañatakis yanaptʼarakituwa. Yatiyir sarasajj waljaniruw Diosan arunakapat parlta. Ukat Diosan amigopäpjjañapatakis yanaptʼaraktwa.

Ukat 2001 maranjja, automp usuchjayasisaw kayunakaj pʼakjasta. Ukat hospitalan ikiñankkasajj jan aguantʼañjampuniw wal usutäna, ukatwa Jehová Diosar akham sasin chuymajan mayisiyäta: “Jehová Dios tata, mirä amp suma qolltʼasita” sasa. Ukat ukhapuniw uka cuarton yaqha usut warmejj akham sasin jisktʼitu: “¿Jehová Diosan Qhanañchiripätati?” sasa. Ukhajj janipuniw jupar jaysañatakis chʼamajj utjkitänti, ukatwa pʼeqe onjjtayasak jaysta. Ukatsti jupajj akham situwa: “¡Jumanakarojj uñtʼapjjsmawa! Revistanakamjj liytʼapuntwa” sasa. Uka arunak istʼasajj chuymas qhanjtitänwa. Wali usutäkasinsa Jehová Diosat yatiyaskakïyätwa. Ukajj nayatakejj wali askipunïnwa.

Mä jukʼa waliptjjasajja, hospitalan jukʼampi Diosat parlañ amtta. Kayunakajajj yesompi uskutäskänwa, ukampis mamajaw silla de ruedat nuknaqetäna. Sapa uruw mä qawqha usutanakar visittʼapjjerïta, ukat ‘kunjamäsipktasa’ sasaw jisktʼapjjerïta, ukatjja Bibliat apstʼat mä qawqha  qellqatanak churapjjerïta. Jaypʼurojj wali qaritäjjerïtwa, ukampis Jehová Diosaw chʼam churitäna.

Aka qhepa maranakanjja, jukʼamp usutakëjjtwa, tatajan jiwatapatsa, jukʼamp llakisirakta. Ukhamäkchisa jan sinti llakisiñatakiw chʼamachasta. Chʼamanïkt ukhajja, familiajampïñataki amigonakampïñatakiw wal chʼamachasta, ukhamatwa jan sinti llakiskti. Sapakïkt ukhajja, kuns liyipuntwa, Bibliats yatjjataraktwa ukat telefonotsa jaqenakar Diosan arunakap yatiyaraktwa.

Ukhamaraki, thayan thaytʼanitapatsa ukat suma panqaranak muktʼasasa kusisitaw jikjjatasta. Taqe ukanakaw Jehová Diosar yuspärañatakejj yanaptʼitu. Lartʼasiñas wal yanaptʼarakitu. Mä urojja, yatiyasipkayät ukhaw amigajajj qellqtʼañataki silla de ruedjja mä rat saytʼayi. Ukañkamasti, mayakwa silla de ruedat jalawayjjta ukat mä auto sayaskän ukaruw moqentta. ¡Walpun sustjasipjjta! Ukampis jan sinti jan wali utjatap uñjasajja, walpun larusipjjta.

Kunanaktï jan lurirjamäkta ukarojja, “inamay amtatanakaja” sasaw sutichta. Ukat chʼirmthapisaw Diosajj kuntï paraison lurkani ukanak “ventan” jistʼarasin niyas uñjkirista ukham amuyirïta (2 Pedro 3:13). Ukat ukan wali kusisitas kʼumaraki uks aksa sarnaqkirista ukham amuyasirïta, ukhamjja walja kutiw lurirïta. David chachan arunakapat amtasipuntwa, jupajj akham sänwa: “[Jehová Dios] ¡Tatitur confiasim! ¡Chuymamanjja chʼamanchasim, janirak mayjtʼasimti! ¡Jisa, Tatitur confiasim!” sasa (Salmo 27:14, Aymar Biblia). Cuerpojajj urut urutjam jukʼamp aynachtʼaski, ukarjamaw Jehová Diosajj chʼam churarakitu. Cheqas usutpachasa, chuymajanjja wali chʼamaniw jikjjatasta.