Polonia markankir mä jiskʼa markanwa nasiwayta, Alemania marka jakʼana. Ukan animalanak wal uywapjje ukat qoqanakas waliw utjaraki, ukhaman jakasiñajj wali sumänwa. Awk taykajajj wali munasirïpjjänwa, ukatwa jupanakajj suma jaqëñajataki, jachʼa yateqañ utar sarañajatak chʼamañchapjjetäna.

Wroclaw markan jikjjataski uka jachʼa yateqañ utaruw abogadoñatak sarayäta, ukhaw jan walinak lurañ qalltawayta. Ukanjja, jan walinak lurir jaqenakampiw chikachasiyäta. Nayarojj pelot anatañajj walsa gustkchitänjja, jan wali amigonakampi chikachasitaj laykuw ukar sint chuym uchjjayäta. Equipojajj Varsovia markatänwa, sapa seman tukuyaw kawkhantï anatkäna ukar jan qheparas sarirïta. Uka viajenakanjja, wal umjasipjjerïta, droganakanamp qolljasipjjerïta ukat awisajj mayni equipor chʼamañchapki ukanakampiw nuwasipjjerïta. Ukanak lurañajj jan walïtap yatkchiyätsa, awisajj policiach katjkitani sasaw ajjsarayasiyäta, ukampis ukanak lurañajj jan sinti llakisiñatakiw yanaptʼitu sasaw amuyayäta.

Amigonakajampi chikajja, thoqoñ utanakaruw sarapjjerïta, ukan sapa kutiw jaqenakampi nuwasipjjerïta. Walja kutiw policiamp katuntayasiyäta, ukampis carcelar jan llawintayasiñatakejja, awisajj policianakar qollq chilltirïta. Wali sumsa jakaskirista ukham amuyasiyäta, ukampis kuntï lurkayäta ukajj chuyma manqhajan janiw sum jikjjatasiykitänti, ukatwa sum jikjjatasiñatakejj sapa domingonak iglesiar sarirïta.

Khä 2004 maranjja, Jehová Diosan Testigonakapaw utajar visittʼapjjetu, ukat jupanakampiw Bibliat yatjjatañ amtawayta. Mä cheqpach cristianojj kunjamsa sarnaqañapa uk Bibliat yatjjatasajja, chuyma manqhajan janiw sum jikjjatasjjayätti. Ukatwa umañsa, droganakamp qolljasiñsa jaytjjañajäna ukat Bibliarjam jan sarnaqapki uka jaqenakatsa jitheqtjjañajänwa. Ukhamarus janiw qhoru jaqëjjañajänti. Ukanak yatkasasa, jan walinak luraskakiyätwa.

Mä arumajja, kimsaqallqo jaqenakampiw nuwasta, jupanakajj thakiruw niya jiwat jaqtapjjetäna, ukhampacharus nuwjasipkakitänwa ukat pʼeqet takintapjjetäna. Jiwpachäyäwa sasaw amuyayäta, ukatwa akham sasin Diosar mayista: “Jehová,  Arumar jan istʼatajat walpun pisayasta, mirä ampsuma pampachita, jakaskakï ukhajja, Testigonakampiw Bibliat yatjjatä ukat jan walinaksa jaytjjarakïwa” sasa. Ukham nuwjatpachasa jakaskakiyätwa. Ukatwa Bibliat yatjjatañ qalltawayta.

Inglaterra markaruw 2006 maran sarjjta. Ukanjja, qollqe jikjjatañ munayäta, ukhamat Polonia markar kuttʼañataki, ukat abogadjam jukʼampi yatjjatañataki. Bibliat yatjjatkasajja, mä jiskʼa tʼaqaw chuymar purtʼitäna. Ukanjja apóstol Pablojj akham sasaw qellqatayna: “Taqe kunatejj nayan utjkitu ukanaksti chhaqatäkaspas ukhamwa amuyta, Cristo Tatitojjar uñtʼañajj mä jachʼa askïtap layku. Cristo laykuw taqe kunsa apanukta. Taqe kunsa mä jan kunatak servir tʼunäkaspas ukhamwa uñjta Cristor jikjjatañ layku” sasa (Filipenses 3:8). Pablojja, nayjamarakiw leyinak toqet yatjjatatayna, ukhamarus wali qhoru jaqerakïnwa (Hechos 8:3). Ukampis Diosar serviñasa, Jesusar arkañas wali askïtap amuyäna. Pablon sarnaqäwipat lupʼisajja, qollqe jikjjatañasa, qhoru jaqëñas janiw kusisit jakasiñatak yanaptʼkitaniti sasaw amuyawayta. Pablojj nayra jakäwip jaytänwa, nayajj jupjam jaytañ amtawayarakta. Ukatwa Inglaterra markan qheparañ amtayäta, ukat janiw jachʼa yateqañ utar sarjjayätti.

Jehová Diosar jukʼamp uñtʼjjasajja, wal Jupar munasjjayäta. Diosajj taqe chuyma arrepentisipki ukanakar perdonatap yatiñajja, chuymajaruw purtʼitäna (Hechos 2:38). Cheqas 1 Juan 4:16 qellqatanjja, “Diosajj munasiñawa” sasaw qhanañchi, uka toqet lupʼisajja, kunatsa Diosajj qhoru jaqenakar uñisi uk amuyta.

Jehová Diosan Testigonakapajj wali munasirïpjjewa, ukajj ukhamarakiw chuymajar purtʼitäna. Jupanakajj Biblian aski yatichäwinakaparjam sarnaqañatakiw chʼamachasipjje. Ukatwa nayajj jupanak taypinkañ munjjayäta. Wali chʼamachasisa ukhamarak jan walinak jaytasajja, 2008 maranwa Jehová Diosan Testigopjam bautisasjjayäta.

 Nayrajj wali qhoru, droganakamp qolljasiri, maynitakik kuns muniri, anatañar chuym churiri ukhamäkchiyätsa. Bibliajj mayninakar wali kusisit Diosan Arup yatichañatakiw yanaptʼawayitu. Pelot anatañajj gustaskakituwa, ukampis ukajj janiw jakäwijan nayrankjjeti.

Esther sat tawaqompiw jaqechasiwayta, jupasti wali munasiriwa. Jupampejj Inglaterra inti jalantat alay toqenwa Bibliat yatiyasipkta, polaco aru parlir jaqenakaru. Jichhajj wali kusisitaw jakasjjta, chuymajansa sumakirakiw jikjjatasjjta.