ENOC chachajj 365 maranakaw jakäna, uk amuyañajj inas jiwasatak chʼamakïchi. Jichhürunakanjja janiw ukham jakjjtanti. Ukha maranejja Enoc chachajj janiw jilïr jaqëkänti. Uka tiempon jakir jaqenakajja, mä arunjja 5000 maranak nayrajj walja maranakaw jakapjjerïna. Adán chachajj 600 jila maranëjjäna ukhaw Enoc chachajj nasïna, uka qhepatjja Adanajj 300 jila maranakampiw jakaskäna. Adanat jutir yaqhep jaqenakajj jukʼamp maranakaw jakapjjäna. Ukhamasti Enoc chachajj 365 maranejj waynakïskpachänwa, walja maranakampiw jakaskaspäna. Ukampis janiw walja maranakamp jakjjänti.

Amuyatajja Enoc chacharojj jiwayañ munapjjäna. Diosan arunakapat yatiykäna uka jaqenakat escapkasajj colerat ajanunakap janiw armkänti. Uka jaqenakajj Diosarusa Enocarus wal uñisipjjäna, Diosan arunakapsa janiw istʼañ munapkänti. Jehová Diosarojj janiw kamachirjamäpkänsa, ukatwa Enocar jiwayañ munapjjäna. Ukhaman uñjasisajj inas akham jisktʼaschïna: “¿Familiajarojj wasitat uñjaskpachayätti?” sasa. Ukham sasinjja inas esposapata, phuchanakapata, Matusalén yoqapata jan ukajj Lamec allchhipat lupʼiskchïna (Génesis 5:21-23, 25). ¿Jiwayatat uñjaspachäni?

Enoc chachatjja janiw sumpach qhanañchaskiti, jupatjja kimsa cheqanakwa Biblian parli (Génesis 5:21-24; Hebreos 11:5; Judas 14, 15). Ukhamarus ukanakajja, Enoc chachajj kunjamsa Diosar confiyäna uk amuytʼañatakejj yanaptʼistaspawa. ¿Familiamar sum uñjañatakit chʼamachasiskta? Jan ukajja, ¿Biblian cheqa yatichäwinakap arjjatañatakit chʼamachasiskta? Ukhamächi ukhajja, Enoc chachajj kunjamsa Diosar confiyäna ukaw yanaptʼiristam.

Enoc chachan urunakapanjja, jaqenakajj kunayman jan walinak lurapjjäna. Enocajj Adanat jutir jaqenakat paqallqorïnwa, ukhamajja Adanampi Evampejj wiñay jakañ aptʼasipkäna ukatjja janiw sinti jayankapkänti, ukatwa jaqenakajj walja maranak jakapjjäna. Ukhamäkchïnsa, jaqenakajj janiw Dios chuymäpkänti ni Diosatakjamas sarnaqapkänti, jan ukasti jan wali lurir jaqenakakiw utjaskäna. Ukanakajja Caín chachajj Abel jilapar jiwaykäna ukhat aksaruw qalltäna. Amuyatajja Cainat jutir mä chachajj walpun mä jaqer jiwayasajj jachʼañchasïna. Uka qhepatjja yaqha jan waliw utjarakïna, jaqenakajj Diosan qʼoma sutipjja, jan wali amtampi jan respetompiw aytañ qalltapjjäna (Génesis 4:8, 23-26).

Uka tiemponjja, Diosar jan cheqaparjam yupaychirinakajj taqe cheqanwa utjäna. Enoc chachajja, alajjpacha aka Oraqe lurir Diosarut servini, jan ukajj tiempopan jakir jaqenakjamach jan walinak lurani uk amtañapäna. Abel chachat yateqasajj walpun chuym chʼalljjtayaspachäna, jupajj Diosar servitapat jiwayataw uñjasïna. Enoc chachajj Abel chachjamarakiw Jehová Diosar serviñ amtäna. Génesis 5:22 qellqatajj siwa: “Enocasti Diosan munañaparjamapuniw sarnaqäna” sasa. Jan wali jaqenak taypinjja Enoc chachajj Dios chuymaw sarnaqäna, ukwa uka arunakajj uñachtʼayistu. Diosampi  sarnaqer jaqenakatjja, Enoc chachaw nayrirïna sasaw Bibliajj qhanañchi.

Matusalén wawapajj naskäna uka qhepatjja, Enocasti Diosamp sarnaqaskakïnwa sasaw Génesis 5:22 qellqatajj qhanañchaskaki. Ukhamasti niya 65 maranirojj wawanëjjänwa, Bibliajj janiw warmipan sutipsa, ‘qhawqha yoqanakanïnsa phuchanakanïnsa’ uk qhanañchkiti. Familiani, wawani awkinakatï Diosampi sarnaqañsa familiapar sum uñjañsa munapjjchi ukhajja, kunjamtï Diosajj munki ukarjamaw familiapar uñjapjjañapa. Enocajj uk sum amuyäna, ukatwa warmipampiki sarnaqäna (Génesis 2:24). Wawanakaparu Jehová Diosat yatichañatakisa wal chʼamachaspachäna. ¿Kunsa ukham luratapat katoqäna?

Bibliajj uka toqet janiw kamskisa. Enocan Matusalén yoqapajj Diosar confiyänti janicha uksa janiw qhanañchkarakiti. Matusalenajj taqe jaqenakat sipansa walja maranakaw jakäna, Uma Juicio purinkäna ukhakama, wawapasti Lamec satänwa. Lamec chachajj patak jila maranakaw Enoc achachilapampejj pachpa maranakan jakäna. Uka chachajja, qhawqhsa Diosar munasïna uk uñachtʼayañatakiw jilsüna. Lamecarojj Noé yoqapat mä profecía parlañapatakiw Jehová Diosajj amuytʼayäna, uka profeciajj Uma Juicio qhepatwa phoqasïna. Noé chachajja, awkipan achachilapjamarakiw Diosampi sarnaqerit uñtʼatäna. Janis Enocar uñtʼkchïnjja, Lamec awkipampi, Matusalén achachilapampiw Enocat yatichapjjpachäna, jan ukajj Enocan Jared awkipaw yaticharakpachäna. Noé chachajj 366 maranïkäna ukhaw Jared chachajj jiwjjäna (Génesis 5:25-29; 6:9; 9:1).

Enoc chachampita Adanampit amuytʼañäni. Adanajj jan pantjasirïkchïnsa Jehová Dios contraw juchachasïna, ukatwa wawanakapajj jan walin uñjasipjjäna, janirakiw yateqaskayäkänti. Ukampisa Enocajj pantjasirïkchïnsa Diosar confiyasaw sarnaqäna, wawanakapatakis yateqaskayarakïnwa. Enocajj 308 maranïkäna ukhaw Adanajj jiwjjäna. Adanajj jupatakik taqe kuns munir jaqënwa, ukhamajja ¿jiwjjäna ukhajj familiaranakapajj jupat jachapjjpachänti? Janiw yatktanti. Ukhamäkchïnsa ‘Enocajj Diosan munañaparjam sarnaqaskakïnwa’ (Génesis 5:24, NM).

Jumatï familiamar sum uñjañatak chʼamachasiskstajja, Enoc chachan Diosar confiyatapatwa yateqasisma. Familiar sum uñjañajj wakisirïkchisa, Diosar servipjjañapataki yanaptʼañaw jukʼamp wakiskirejja (1 Timoteo 5:8). Awkinaka, Diosar servipjjañapatakejj wawanakamar sarnaqatanakamampiw yanaptʼapjjañama. Jumanakatï Enoc chachjama Diosamp sarnaqañ amtapjjäta ukhajja, mä arunjja Diosan ewjjanakaparjam sarnaqapjjäta ukhajja, wawanakamatakejj wali yateqaskayäpjjätawa.

Diosar jan yupaychir jaqenak taypin jakasajja, Enoc chachajj sapakïkaspas ukhamaw amuyaspachäna. Ukampis Diosajj ukham amuyatap yatïnwa. Ukatwa Enocampi mä urojj parläna, kunsa uka tiempon jakir jaqenakar lurani uk yatiyañapataki. Ukhamatwa Enocajj nayrïr profetar tuküna, arunakapas Bibliaruw qellqasirakïna. Ukjja  Jesusan Judas jilapaw qhanañchistu, juparusti walja maranak qhepatwa Enocan profecianakap qellqañapatak Diosajj yanaptʼäna. *

¿Kunsa Enoc chachajj profetisäna? Jupajj sänwa: “Uñjtwa Tatitur jupanakankirinakampi waranqa waranqanakampi jutaskiri, taqenir taripañataki, ukhamarak taqe jan wali luririnakarus juchañchañataki, ukhamarak taqe kunatejj ñanqha arunak jupataki arsupki uka jan wali juch luririnakarusa” sasa (Judas 14, 15). Uka profeciajj pasïr urunakatsa parlkaspa, niyas phoqasjjaspa ukham qellqatawa. Qhepat qellqaskäna uka yaqha profecianakasa uka profeciar uñtataw qellqasirakïna. Ukham qellqasajja, uka profeciajj cheqapuniw phoqasini sañwa Enocajj munaskäna, mä arunjja phoqasjjaspasa ukhamänwa Enoc chachatakejja (Isaías 46:10).

¿Kunjamakïpachänsa taqe jaqenakaru uka profecianak yatiyañajja? Uka arunakajj janiw aleq arunakakïkänti. Jan wali jaqenakan luräwinakap juchañchañatakejja akham sasaw qellqasïna: ‘Jan wali luririnaka’, ‘ñanqha arunak jupataki arsurinaka’, ‘jan wali juch luririnaka’ sasa. Uka arunakajj taqe jaqenakatakïnwa, Adanampi Evampejj Edén jardinat jaqsutapkäna uka qhepatjja akapachajj sinti jan walinakampi phoqantatäjjänwa. Jehová Diosajj “jupankirinakampi”, mä arunjja angelanakapampiw aka oraqjja qʼal tʼunjañapäna. Uksti Enoc chachajj jan ajjsarasaw jaqenakar sapaki yatiyäna, ukham luratapjja Lamec allchhipajj uñjpachänwa.

Enoc chachan Jehová Diosar confiyatapajja akham jisktʼasiñasatakiw yanaptʼistu: “¿Kunjamtï Diosajj akapachar uñjki ukhamti nayajj uñjaraktjja?” sasa. Kuntï Enocajj yatiykäna ukajj jichha tiempompachatakiwa. Noé chachan urunakapanjja, Diosajj Enocan arsutaparjamaw Uma Juicio apanïna. Uka Uma Juiciojja, kuntï Jehová Diosajj akapachar lurkani ukaruw uñtayi (Mateo 24:38, 39; 2 Pedro 2:4-6). Kunjamtï Jehová Diosajj nayra tiempon lurkänjja, ukhamarakiw “jupankirinakampejj” aka jan wali pacharojj cheqaparu juzgani. Ukhamasti kuntï Enocajj yatiykäna ukanakwa jaqenakar yatiyañasaraki. Ukham luratasatjja inas amigonakasasa familiaranakasas jiwasat jitheqtapjjchini, awisajj inasa sapaki uñjasirakchiñäni. Ukampis kunjamatï Diosajj Enocar jan jaytanukkänjja, ukhamarakiw servirinakaparojj jan jaytanukkaniti.

Kunjamsa Enoc chachajj jiwäna ukajj janiw yatiñjamäkiti. Génesis qellqatajj akham sakiwa: “Enocajj Diosan munañaparjam sarnaqatapatjja, mä uruw chhaqtjjäna, Diosarakiw juparojj [apjjäna]” sasa (Génesis 5:24). Yaqhep Biblianakanjja, Diosaw Enocarojj alajjpachar irpasjjäna sasaw Hebreos 11:5 qellqatanjj qhanañchi. Ukajj janiw cheqäkiti, Biblianjja Jesusakiw nayraqatajj alajjpachar makatäna sasaw qhanañchi (Juan 3:13).

Yaqhep Biblianakanjja, Enoc chachajj jan jiwañ uñjañapatakiw apatäjjäna sasaw Hebreos 11:5 qellqatanjj qhanañcharaki. ¿Kunsa uka arunakajj sañ muni? Enocajj janiw tʼaqesiyat jiwkänti, Jehová Diosaw jan tʼaqesiñapatakejj jarkʼaqäna. Jupajj janïr jiwkasaw ‘Diosar kusisiyatap’ yatisïna, ¿kunjamsa uk yatispachäna? Diosatwa mä visión katoqpachäna, inas uka visionanjja mä paraíso uñjchïna, ukhamatwa Diosajj suma jaqet uñjatap  uñachtʼayäna. Uka visión uñjkasaw Enocajj jiwañan iktʼjjpachäna. Diosat jan jitheqtas sarnaqeri Enoc chachampita yaqha chachanakampita warminakampita qellqasajja, Pablojj akham sänwa: ‘Diosar confiyasaw taqe jupanakajj jiwapjjäna’ sasa (Hebreos 11:13, NM). Qhepatjja inas enemigonakapajj jiwat cuerpop thaqapjjchïna, ukampis “janiw mayamps jikjjatkjjapjjänti”. Jehová Diosaw Enocan jiwat cuerpopjja chhaqtayjjpachäna, ukhamat jaqenakajj jan yupaychapjjañapataki ni jan wali amtampis jan apnaqapjjañapataki. *

Yatjjataniwayktan ukarjamajja, Enocajj akhamwa jiwpachäna sañäni: Enoc chachajj wali qaritaw escapaski, enemigonakapajj Diosan arunakap yatiyatapatwa wali colerata qhepap arktasipki. Enocajj mä pʼiyaruw imantasi, ukanwa mä jukʼa samartʼaraki, ukampis janiw ukanjja jaya tiempo imantaskaniti, uksti jupajj yatiskiwa. Niyaw enemigonakapajj jiwayapjjani. Uka pʼiyan samartʼkasajja Diosaruw mayisiski, ukaw jan sinti llakisiñatak yanaptʼi. Ukatjja mä visionanwa mä paraíso uñjaraki, ukankkaspas ukham amuyasisajj wali jaya cheqar apataw uñjasi.

Kunanaktï uka visionan uñjkäna ukanakjja janiw kunapachas uñjirïkiti. Uka cheqajja Edén jardinar uñtasitänwa, ukampis ukanjja janiw querubín angelanakajj jarkʼjjapjjeti, taqeniw uka paraisorojj mantasipkaspa. Chachanakasa warminakas janiw usutäpkiti ni chʼama qaritäpkarakisa, taqeniw wali sumaki jakasipjje. Janirakiw uñisisiñasa, Enocar Diosar yupaychatap layku arknaqapkäna ukham arknaqañas utj-jjeti. Visionan taqe ukanak uñjasajja, qhawqhsa Jehová Diosajj munasi, yanaptʼañsa munaraki ukwa Enocajj amuyi. Jupajj ukanwa jakasini, utapas ukankarakiniwa, Enocajj uk sum yati. Uka visión uñjkasajja janipuniw kunatsa llakisjjeti, ukatjja nayranakap chʼirmthapisajj jiwañanwa iktʼawayjje.

Ukhat jichhakamaw Enocajj jiwañan iktʼaski. Diosajj janipuniw jupat armaskaniti, kunjamatï Jesusajj walja maranak qhepat siskänjja, horasajj purininiwa taqe jiwatanakasti Criston arup istʼasajj Paraisonwa jaktapjjani, ukanjja taqe kunas wali sumäjjaniwa janirakiw nuwasir jan wali jaqenakas utj-jjaniti (Juan 5:28, 29).

¿Jumajj ukan jakasiñ munarakismati? Enoc chachar uñtʼañajj wali kusiskañapunïniwa. Taqe kunwa juparojj jisktʼañäni, aka yatichäwin yatjjatawayktan ukhampunit jiwpachäna janicha uksa yatiyarakistaniwa. Ukampis ukankañasatakejj jichhaw kuntï Enocajj yatkäna ukanak yateqañatakejj chʼamachasiñasa. Enocat parlasinjja, Pablojj akham sänwa: ‘Diosar jan confiyasajj janiw kunapachas Jupar kusisiyksnati’ sasa (Hebreos 11:6, NM). Ukhamajj Enoc chachan Diosar confiyatapat yateqasipjjañäni.