БӘЗИЛӘРИ «ЈОХ» ДЕЈӘ ҸАВАБ ВЕРИР. Бир һәкимин фикринҹә, бу ҝүн мәсләһәт үчүн Төврат, Зәбур вә Инҹилә мүраҹиәт етмәк мүасир дөврдә кимја фәннини 1920-ҹи илләрин дәрслији илә кечмәјә бәнзәјир. Бир башгалары буну јени нәсил компүтери көһнә модел компүтерин тәлимат китабчасы илә ишләтмәјә бәнзәдир. Бир сөзлә десәк, Мүгәддәс Китабын һәдсиз көһнәлдијини дүшүнән бир сыра инсан вар.

Ҝөрәсән, технолоҝијанын инкишаф етдији бир дөврдә бу гәдими китабын бизә нә фајдасы ола биләр? Бу ҝүн сајсыз-һесабсыз вебсајт вә блогларда ән сон төвсијәләр, ҹүрбәҹүр мәлуматлар һәр ан јениләнир. Телевизија програмларында савадлы психологларын, дин хадимләринин, јазычыларын мүхтәлиф мәсләһәтләри тәгдим олунур. Китаб мағазаларында сатылан сајсыз-һесабсыз мәсләһәт китаблары чохмилјардлыг бир сәнајени тәшкил едир.

Ән сон мәлуматлары асанлыгла әлдә етмәјин мүмкүн олдуғу бир дөврдә ики мин ил бундан әввәл јазылмыш бир китаба мүраҹиәт етмәјә ҝәрәк вармы? Бәлкә, бу гәдими китаба үз тутмағы көһнә модел компүтерин тәлимат китабчасындан, јахуд көһнә кимја дәрслијиндән истифадә етмәјә бәнзәдәнләр һаглыдыр? Тәбии ки, «хејр», чүнки бу инсанлар ваҹиб бир мәгамы нәзәрдән гачырыр. Елм вә технолоҝија сүрәтлә дәјишир, бәс ејни шеји инсан тәбиәти барәдә демәк олар? Инсанлар һәлә дә һәјатын мәнасыны тапмаг, хошбәхт вә тәһлүкәсизликдә олмаг, јахшы аиләјә вә әсл достлара саһиб олмаг арзусундадыр.

Төврат, Зәбур вә Инҹил гәдими олмасына бахмајараг, инсанларын бу вә диҝәр тәләбатларыны өдәмәјә гадирдир. Бу китаблар Јараданымыз тәрәфиндән назил олуб, һәјатымызын бүтүн саһәләринә даир рәһбәрлик верир вә истәнилән чәтинлијин өһдәсиндән ҝәлмәјин јолларыны өјрәдир (2 Тимутијә 3:16, 17). Ән әсасы исә бу мәсләһәтләр һеч вахт көһнәлмир — һәмишә актуалдыр! Кәламда јазылыб: «Аллаһын сөзү ҹанлы вә гүдрәтлидир» (Ибраниләрә 4:12).

Мүгәддәс Китабын бу сөзләри нә дәрәҹәдә һәгигәтдир? Ҝөрәсән, о, актуаллығыны итириб, јохса әксинә, ән практики мәсләһәтләрин јер алдығы «ҹанлы» китабдыр? «Ҝөзәтчи гүлләси»нин хүсуси бурахылыш силсиләсинин илк сајынын мәгсәди сизә бу суалларын ҹавабыны тапмагда көмәк етмәкдир.