Kaat Matéô 15:1-39
15 Ha nyen Farisai ni bayimbén+ ba lo yak Yésu, ba lôlak i Yérusalem, ba kal le:
2 “Inyuki banigil boñ ba noñ bé bilem bi bôt ba ngéda kôba? Kiki hihéga, ba njôwa* bé moo map i ngéda ba nsômbôl je.”+
3 A timbhe bo le: “Inyuki yak bé ni mbôk mbén Nyambe inyu bilem bi loñ nan?+
4 Kiki hihéga, Nyambe a bi kal le: ‘Ti isoñ bo nyuñ lipém,’+ ni le: ‘I mut a nleñ isañ tole nyañ bibuk bibe,* a nlama nôla.’+
5 Ndi bé ni nkal le: ‘Nu ni nu a nkal isañ tole nyañ le: “I gwom gwobisôna me gwé, bi me bak le me gwélél inyu hôla we, me nkébél gwo Nyambe,”+
6 a gwé bé le a ti isañ lipém to ndék.’ Hala nyen ni bi yilha bañga i Nyambe yañga inyu bilem bi loñ nan.+
7 A bé bôt ba bihéñba, maliga mon Yésaya a bi bôk pot inyu nan i ngéda a kal le:+
8 ‘I litén lini li nti me lipém ni bibép, ndi miñem nwap mi yé yaga haa ni me.
9 Yañga yaga nyen ba nke ni bisu i bégés me, inyule ba niiga mambén ma bôt ba binam wengoñle ma yé mambén ma Nyambe.’”+
10 Ha nyen a sébél limut ipañ yé, a kal jo le: “Emblana, ni tibil ki nok:+
11 I yom i njôp mut i nyo, yo bé yon i nhindis nye, ndi i yom i mpémél mut i nyo, yon i nhindis nye.”+
12 I mbus, banigil ba lo, ba kal nye le: “Baa u nyi le Farisai i ñunup* i ngéda i nok i yom u mpot?”+
13 A timbhe bo le: “Hiki bebela Tata wem nu ngii a mbel bé, b’a nup yo.
14 Nwaha bo. Ba yé baéga ba ba yé ndim. Ndi, ibale mut ndim a ñéga mut ndim, ngo bo iba ba ga kwo ikété bee.”+
15 Pétrô a kal le: “Toñle le bés hihéga u bak u yoñ.”
16 Ha nyen a kal le: “Baa to bé ni yé ngi tibil nok?+
17 Baa ni nyi bé le hiki yom i njôp mut i nyo, i ntagbe i minla, ndi i sôk i luk?
18 Ndi hiki yom i mpam mut i nyo i nlôl i ñem; i mam ma mon ma nhindis mut.+
19 Kiki hihéga, mu ñem nyen bipék bibe bi nlôl:+ Manola, ndéñg, malal ma nyega,* wip, mbôgi bitembee, liôbôs Nyambe jôl.
20 I mam mana mon ma nhindis mut; ndi i je ngi jôwa* moo i nhindis bé mut.”
21 Ndi i ngéda a bi nyodi ha, Yésu a ke i nkoñ u Tir ni u Sidôn.+
22 Ndi nuna-ki, muda Fénikia wada nu a bé lôl mu nkoñ u, a lond le: “Kon me ngoo, a Nwet, a Man David. Ngond yem i nok njôghe iloo hihéga inyule mbuu mbe u ntééñga nye ngandak.”+
23 Ndi a bi timbhe bé nye to buk. Jon banigil bé ba bi lo, ba bôdôl soohe nye, ba kalak le: “Kal nye le a kenek, inyule a nwaa bé lond i mbus yés.”
24 A timbhe le: “Ba ñom bé me inyu hôla matén momasôna, ndik minimlak mi mintômba mi ndap Israel.”+
25 Ndi muda a lo, a ti nye lipém,* a kal le: “A Nwet, hôla me!”
26 A timbhe nye le: “I ta bé loñge i yoñ bret bi boñge inyu leñ gwo bon ba ngwo.”
27 Muda a kal le: “Ndi yak bon ba ngwo ba nje yaa minluñ mi nkwo isi téblé i bet bap.”+
28 Ha nyen Yésu a kal nye le: “Éé, a muda, hémle yoñ i yé ikeñi; i bôña we kiki u nsômbôl.” Ibôdôl ha ngéda i, ngond yé i mbôôp.
29 I ngéda a bi nyodi ha, Yésu a ke bebee ni tuye Galiléa,+ kiki a mbet hikôa, a yén ’isi.
30 Ha nyen mamut makeñi ma tiige nye bebee, ma lona bibôk bi bôt, bôt ba nlem, bôt ba ndim, bôt ba mbuk ni ngandak bakokon ipe; ba niñi bo i makôô mé, a mélés makon map.+
31 Jon limut li bi hel i ngéda li bi tehe bôt ba mbuk ba mpot, yak bôt ba nlem ba témbék mbôô, bibôk bi bôt bi kenek, yak bôt ba ndim ba tehnaga, ha nyen ba bégés Nyambe nu Israel.+
32 Ndi Yésu a sébél banigil bé ipañ yé, a kal le: “Me nkon i limut lini ngoo,+ inyule, nano a yé dilo daa le li yé ni me, ndi li gwé bé yom i je yo ki yo. Me ngwés bé le ba témb njal,* tiga le ba kwo i njel.”+
33 Ndi banigil ba kal nye le: “Hee d’a yôñôl bret munu ñoñ, le bi kola i nya limut li bôt likeñi ini?”+
34 Ha nyen Yésu a bat bo le: “Ni gwé bret gwañen?” Ba timbhe le: “Bisaambok, ni ndék bon ba tjobi.”
35 I mbus, a kal limut le li yén ’isi,
36 a yoñ bret bisaambok ni tjobi; kiki a nti mayéga, a bek gwo, a bôdôl ti gwo banigil, yak banigil bé ba ti gwo mamut.+
37 Bôt bobasôna ba je, ba nuu, ba bada ki bikét bi bi yégle, bi yon ikété bisel bikeñi* bisaambok.+
38 Ndi ba ba bi je ba bé 4 000 di bôlôm, handugi bôda ni boñge batitigi.
39 Sôk i nsôk, i ngéda a bi mal huuha mamut, a jôp i môñgô, a ke i nkoñ u Magadan.+
Ndoñi
^ Hala wee, ibabé pubus moo inoñnaga ni bilem bi base i Lôk Yuda.
^ Tole “bisol.”
^ Ni hop Grikia, “i mbaage.”
^ Ni hop Grikia, “pornéia.” Béñge Ndoñi bibuk.
^ Hala wee, ibabé pubus moo inoñnaga ni bilem bi base i Lôk Yuda.
^ Tole “a ôôp i bisu gwé.”
^ Tole “ba témb ba ma sôga je.”
^ Tole “minkwe.”
