Yérémia 17:1-27
17 “Béba i Yuda i yé ntilga ni saô kei.*
I yé ki nkédlak ni saô i diamañ i libam li miñem nwap,ni i bitoñ bi muu map ma bisesema,
2 bon bap ba mbigda muu map ma bisesema ni mbiñ yap ipubhaga,*+bi bi bé bebee ni bie bikeñi, i bahoma ba nyôgi,+
3 ni i dikôa di di yé haa ni bitison.
Me ga boñ le bôt ba kadal nkus woñ+ ni masôô moñ ma nkus momasôna,yak ni bahoma boñ ba nyôgi, inyule béba yoñ i nyon ni minkoñ nwoñ nwominsôna.+
4 Wemede nyen u ga tjôô ngababum me bi ti we,m’a nyégsa we i gwélél baoo boñ i loñ u nyi bé,+inyule u mboñ le hiun hiem hi kala kiki hié.*+
Hi ga loñ i boga ni boga.”
5 Yéhôva a nkal le:
“Tiihe tiihe ni mut* nu a mbôdôl bôt ba binam ñem,+nu a mbôdôl ngui mut binam ñem,*+ni nu a nkôm Yéhôva mbus.
6 A ga yila kiki e i i yé yotama i ñoñ.
A ga tehe bé mam malam,ndi a ga yééne i bahoma ba ñoñ ba ba yé minumuk,i nkoñ u gwé bas, i het mut nye ki nye a nla bé yééne.
7 Ndi i mut* a mbôdôl Yéhôva ñem a yé nsaibak,nu a mbii botñem yé yak Yéhôva.+
8 A ga ba kiki e i i mbéla ipañ malép,minkañ nwé mi nke i homa lép u yé.
A ga nok bé lék to i ngéda hiañgaa hi nai,ndi tjai tjé di yé yômi ngéda yosôna.+
I nwii u sép, a ga bana bé nduña yo ki yo,a ga waa bé to num matam.
9 Ñem u yé malôga* iloo mam momasôna, u yé ñôbak.*+
Baa mut a nla yi wo?
10 Me Yéhôva, me nwan miñem,+me nwan ki mahoñol ma kétékété,*inyu ti hiki mut nsaa inoñnaga ni maboñok mé,inoñnaga ni minson nwé.+
11 I mut a nkôhna nkus ni malôga,*+a yé kiki hikwaa* hi hi nkôhle matjee le u bi nye bé.
A ga nimis nkus u, a bak a ngi yii i niñ,sôk i nsôk, bijôñ gwé bi ga nene.”
12 Yééne ane i lipém i Nyambe i nyôgi ibôdôl i bibôdle,ha nyen témpel yés i yé.+
13 A Yéhôva, a botñem i Israel,i bôt bobasôna ba ntjôô we ba ga kon hison.
I bôt ba nkôm we* mbus, môl map ma ga séha kiki matila le ba ntila i biték,+inyule ba ntjôô Yéhôva, nu a yé lingen li malép ma niñ.+
14 A Yéhôva, ibale u ntibil me, ha nyen me ga mbôôp.
Ibale u ntohol me, ha nyen me ga tohlana,+inyule wen me mbégés.
15 Ngim bôt i nkal me le:
“Inyuki lipôdôl li Yéhôva li yé ngi yon?+
Li yonok ni!”
16 Ndi me, me bi nwas bé nson wem u ntééda mintômba, me bi waa bé noñ we,me bi gwés bé to le kel njiiha i loo.
U nyi mam momasôna bibép gwem bi bi pot;momasôna ma bi bôña i bisu gwoñ!
17 U kônha bañ me woñi.
U yé lisolbene jem i kel ndutu.
18 Wéha i bôt ba ntééñga me nyuu,+ndi u wéha bañ me nyuu.
Kônha bo woñi,ndi u kônha bañ me woñi.
Boñ le bikuu bi kwél bo,+bép bo, u tjé bo tjagda.*
19 Yéhôva a bi kal me le: “Ke telep i nwemel u bôt ba litén, i het bikiñe bi Yuda bi njubul, bi pémlak; telep ki i manwemel ma Yérusalem momasôna.+
20 U nlama kal bo le: ‘Emblana lipôdôl li Yéhôva, a bikiñe bi Yuda, a bôt ba Yuda bobasôna, yak ni bôt bobasôna ba nyééne i Yérusalem; a bé ba ni njubul munu manwemel mana.
21 Haana nyen Yéhôva a mpot: “Yoña yihe, ni begee bañ mbegee yo ki yo i kel sabat, to jôbna yo i manwemel ma Yérusalem.+
22 Ni nlama bé pémés mambegee i mandap manan i kel sabat; ni nlama bé to sal bôlô yo ki yo.+ Kel sabat i nlama ba kel ipubhaga inyu nan, kiki me bi kal basôgôlsôgôl+ banan.
23 Ndi ba bi emble bé, ba bi sédi bé to maôô, ba bi nai ni ndok,* ba bi neebe bé to le me kodol bo.”’+
24 “‘“Ndi, ibale ni ntibil nôgôl me,” hala nyen Yéhôva a mpot, “ni jôbna bé mambegee i manwemel ma tison ini i kel sabat. Ibale kel sabat i yé kel ipubhaga inyu nan, ni sal bé bôlô yo ki yo i kel i,+
25 bikiñe ni baane ba ba nyén i yééne ane i David+ ba ga jubul munu manwemel ma tison ini, ba bak i ngii bikak bi gwét ni i ngii bihosi. Ba ga jôp lôñni baane ba litén, bôt ba Yuda ni bôt ba nyééne i Yérusalem;+ ha nyen i tison ini i ga yon ni bôt i boga ni boga.
26 Bôt ba ga lôl i bitison bi Yuda, i mambai ma yé ipañ Yérusalem, i nkoñ u Benyamin,+ i mbok i yé isi dikôa,+ i mbok dikôa, i Négeb;* ba ga lona bisesema bi ntul i hié,+ bisesema bipe,+ makébla ma bijek,+ binunumba, ni bisesema inyu ti mayéga; ba ga lona gwo i ndap Yéhôva.+
27 “‘“Ndi ibale ni nôgôl bé me, ni yoñ bé to kel sabat kiki hilo hipubhaga; ibale ni mbegee mambegee, ni jôbna mo i manwemel ma Yérusalem i kel sabat, me ga ha manwemel ma Yérusalem hié,+ hi ga ligis minkum nwé mi mandap, hi ga lém bé.”’”+
Ndoñi
^ Tole “éña.”
^ Béñge Ndoñi bibuk.
^ I nla ki ba, “inyule kiki hié, hiun hiem hi nkuye we.”
^ Tole “mut ngui.”
^ Ni hop Lôk Héber, “nu a nyilha minsôn woo wé.”
^ Tole “mut ngui.”
^ Tole “u nliibana.”
^ I nla ki ba, “u nla bé mbôôp.”
^ Tole “matihil ma miñem.” Ni hop Lôk Héber, “ditam.”
^ Tole “a nkôhna nkus, ndi ni telepsép bé.”
^ Tole “hikwayi.” I hinuni ba mpôdôl hana, hion ba nsébél ni hop Pulasi le perdrix.
^ Ni hop Lôk Héber, “me,” i nene le Yéhôva nyen ba mpôdôl hana.
^ Tole “tjé bo ngélé iba.”
^ Ni hop Lôk Héber, “ba bi lédés joo jap.”
^ Tole “nwelmbok.”
