Delfin, nu di mpôdôl mu nkwel bisu, a bé nôgda le nduña yé i bé tinde nye i lihuia. Bibel i nsôñga bé i nyo maok ni héga, ndi i nkal le: “U yén bañ i ti banyo wai.” (Bingéngén 23:20) Ba nléba le, lihuia li nlona makon, li mbôk maada tole li ñôbôs mo, li mboñ ki le hiki nwii, ngandak bôt i wo mpuhge nyemb. Bôt ba bé le ba sembba bikuu bi gwobisôna, balebo ba bi nôñôl maéba ma pék ma Bibel.

Hala nyen Delfin a bi boñ. Nano, a nkal le: “Me bi nok le maok ma nla bé héya nduña yem. Me bi nôñôl maéba ma kaat Filipi 4:6, 7, i i nkal le: ‘Ni tôñ bañ inyu jam jo ki jo, ndi yiha Nyambe mam ni nsômbôl, . . . ni yemhe nye.’ Hiki kôkôa, i ngéda mahoñol mabe ni nduña bi bé bet me i ñem, me bé yemhe Yéhôva. Me bé kal yaga nye i ni i, me bé nôgda, hala wee, hiun, njôghe, ni yubda; me bé soohe nye inyu kôs mahôla le me nok loñge. Bikegla, me bé boñ biliya le i mahoñol mabe ma, ma lo ha bañ. Masoohe ma bi hôla me i bok mahoñol i mam me gwé, he i mam me gwé bé. Me kit le, me ga nyo ha bé maok. Masoohe ma bi lona me nsañ, u u bééne me mahee kiyaga, jon me bé sômbôl bé nimis wo.”

Nyega malal i yé ikété bilem bibe bi bisu, bi bi mbéna lona bikuu kiki bo ngoo, ni makon  ma ñem. Ndi matiñ ma Bibel ma nla hôla bés i keñgle i nya bikuu i, inyule ma ntihba tén béba yomede​—kiki hihéga, ma nhôla inyu jam li ntjaga u minjôha, ni li béñge bititii bi malal. Samuel, mañge wanda, a nkal le: “I tjak mut inyu minjôha, i bé lédél bé me. Ngim mangéda to ngim hingonda hi bé lémél bé me, ndi me me tehe le, hio hi nla gwés me​—hala a bé tinde me i bôdôl tjak nye ndik inyu jôha.” Ba bi ôm Samuel nsohi le a gwé lem i tjak dingonda inyu minjôha​—yak i ngéda a bééna bé i mahoñol ma​—jon a bi kit le, a nhéñha bé, ni ki le a mbôdôl toi mintjaga inyu minjôha. Ndi liboñok li, li bé tééñga nye. Nano, a nkal le: “Hala a bé béba jam, inyule li nhôlôs ngôñ yoñ i tôñ ndigi wemede.”

Samuel a bi añ nkwel wada i jw.org, u u bi tilba inyu boñge bawanda. A bi soñda bibañga bi Bingéngén 20:11, bi bi nkal le: “Ndék mañge i nyiba inyu bibôñôl gwé, too liboñok jé li mpôp, too li yé ki sép.” Lelaa hala a bi hôla nye? Samuel a bi nok le, lem ntjaga inyu minjôha i mpôp bé, i téé bé to sép. Hanano a nkal le: “Me bi sôk ki nok le, i mañge wanda nu a ntjak bape ndik inyu minjôha a ta bé le a ba loñge sobiina. Me bôdôl badba le, ibale me nsômbôl bii ngim hingonda, ndi a yi le me ntjak hingonda hipe, ndik inyu minjôha, lelaa a yé le a nôgda mu ñem? Me bi sôk nok le, hala a ta bé jam li minjôha. Ibale i jam li li ntomb, hala a nsômbôl bé kal le li téé.” Samuel a bi héñha. Likeñgle mintjaga inyu minjôha, li bi hôla nye i keñgle i kwo i nyega malal.

Antôniô, nye a bé bebee ni kwo i nyega malal: A bé nkol u bititii bi malal. A bé gwés nwaa ngandak, ndi to hala, hiki ngéda a bé nun ndigi bititii bi malal, nun ni nun. A nkal le, i soñda bibañga bi 1 Pétrô 5:8 i bi hôla nye kiyaga. Bi nkal le: “Ni ambak manyuu, ni yénak ki péé, inyule nkolba nan le Nsohop a nhiôm kiki mbondo njéé le i nkônd, a yéñék i nwet a mil.” Antôniô nye: “Bititii bi malal bi yé homa nyensôna munu nkoñ isi unu, bititii bi, bi nla ki adbe mahoñol ni ngui. U nlôñ kaat unu, u bi hôla toi me i nok hee homa manoodana mana ma nlôl. Me bé lama tééda i mahoñol le, bititii bini bi nlôl ni Satan. Nano, me nyi le Yéhôva nyetama nyen a nla hôla me ‘i amb nyuu, ni i yén ki péé,’ kayéle me la kolba bini gwom bi noode me ikété mahoñol mem, ñem wem ni libii jem.” Antôniô a bi kôs mahôla a bééna ngôñ, a sôk a pam ki i tjôô lem yé ibe. Yon i bi hôla nye i keñgle bikuu bibe kiyaga bi bé le bi lôl mu.

Ñ, Bibel i gwé maéba ma ma nla hôla bés i keñgle bikuu bikeñi. Ndi i ba ni le, bilem bini bi mal o minkañ, ndi bi let ki, lelaa di nla boñ? Di béñge lelaa Bañga i Nyambe i nla hôla bés i yémbél i nya jam i.