Di noñ biniigana bi Bibel bas bas ngéda di ntégbaha Bilôp bi nwet, bi ba nsébél ki le ‘Mbigda nyemb Yésu’, tole ‘je tata’. (1 Korintô 11:20) Maselna ni bés, ngandak biniigana ni maboñog ma bibase bipe inyu Bilôp bi nwet bi nkiha bé ni Bibel.

 Nseñ u Bilôp bi nwet u yé le di bigda Yésu, ni le di ti ki mayéga inyu sesema a bi ti inyu yés. (Matéô 20:28; 1 Korintô 11:24) Bilôp bi nwet bi ta bé sakramen tole ngim sai, tole liboñog li base li li nlona mam kiki bo karis ni nwéhél i bibéba. a Bibel i niiga le bibéba gwés bi nla nwéhlana, ha ni njel sai i ngim base bé, ndi ndigi ni njel hémle di nhémle Yésu.​—Rôma 3:​25; 1 Yôhanes 2:​1, 2.

 Yésu a bi ti banigil bé oda le ba tégbaha Bilôp bi nwet, ndi a bi kal bé ngélé yañen ba bé lama tégbaha gwo. (Lukas 22:19) Bahogi ba nhoñol le Bilôp bi nwet bi nlama tagbe ngélé yada hiki sôñ, bape ba boñok gwo hiki sonde, hiki kel, tole ngandak ngélé ikété ngim kel. Bape ba nhoñol yak le, mut a nla boñ gwo hiki ngéda a nôgda ngôñ i boñ hala. b Ndi, di béñge ngim biniigana di nlama bana mu i jam li.

 Yésu a bi téé Bilôp bi nwet nlélém kel ni ngand i Pasa i Lôk Yuda, a bi wo ki nlélém kel. (Matéô 26:​1, 2) Mam ma bi bôña bé hala yañga. Bitilna bi nhégha sesema i Yésu ni sesema i man ntômba i ba bé ti i ngand Pasa. (1 Korintô 5:​7, 8). Ngand Pasa i bé tagbe hiki ñwii ngélé yada. (Manyodi 12:​1-6; Lôk Lévi 23:5) Nlélém ni hala, bikristen bi hiai bisu bi bé boñ Mbigda nyemb Yésu ngélé yada hiki ñwii, c yak Mbôgi Yéhôva i noñ nlélém ndémbél u nlôl ikété Bibel.

 I ndémbél Yésu a bi yék, i nhôla ndik bé bés i nyi ngélé yañen di nlama tégbaha Mbigda i nyemb Yésu, ndi yak kel ni ngeñ. A bi téé Bilôp bi nwet i hilo 14 hi sôñ Nisan i ñwii 33 N.Y., inoñnaga ni kalénda i Lôk Yuda. Hiañgaa hi bé hi ma nañal yokel. (Matéô 26:18-​20, 26) Yak bés di nke ni bisu i boñ bilôp bi nwet hiki ñwii, mu nlélém hilo, inyu noñ lem i bikristen bi hiai bisu. d

 To hala kii hilo 14 hi sôñ Nisan, i ñwii 33 N.Y. hi bé ngwa koo, mbigda i nyemb Yésu i nla kwo hilo hipe hi sonde hiki ñwii. Inyu léba hilo hi i kalénda yés, di nsoñgol dilo nlélém kiki ba bé boñ ha ngéda i Yésu, ilole di noñ kalénda i Lôk Yuda i len ini. e

 Inyu téé ngand mondo le Bilôp bi nwet, Yésu a bi gwélél koga i ngi séñha ni wai bi bi yégle i ngéda ba mal je ngand Pasa. (Matéô 26:26-​28) Inyu noñ ndémbél yé, yak bés di ngwélél koga i i gwé bé séñha to yom ipe yo ki yo, lôñni bañga wai i ba nkônde bé bombo, to liumb, to bikulé bipe. Di ngwélél bé ki to binene bi matam ma nkôô wai.

 Ngim bibase i ngwélél koga i i gwé séñha, ndi Bibel i mbéna gwélél séñha kiki yimbne i béba. (Lukas 12:1; 1 Korintô 5:​6-8; Galatia 5:​7-9) Jon, ndik koga i i gwé bé séñha, to bikulé bipe, yon i kôli ba yimbne i nyuu Yésu i i gwé bé béba yo ki yo. (1 Pétrô 2:​22) Liboñog lipe li li nlôl bé ikété Bibel li yé i héñha wai lôñni binene bi matam ma nkôô wai. Ngim bibase i boñ hala inyule bi nsôña le mut a nyo liumb, ndi Bibel i nkal bé hala.—1 Timôtéô 5:​23.

 I koga i ngi séñha ni wai ba ntégbaha i Bilôp bi nwet bi yé biyimbne, ha matjél to minsôn mi Kristô nwomede bé. Hélha jam i mbôña bé kayéle bi yila tole bi pôdna lôñni minsôn to matjél momede bé, kiki ngandak i nhoñol. Béñge biniigana bi Bibel bi ntinde bés i kal hala.

•   Ibale Yésu a ti banigil bé oda le ba nyo matjél mé, ki a bé tinde bo i bôk mbén Djob i i nsôña le mut a je matjél. (Bibôdle 9:4; Minson mi Baôma 15:28, 29) Ndi, Yésu a bé bé le a tinde bôt bape i bôk mbén Djob inyu libak li pubhaga li matjél.​—Yôhanes 8:​28, 29.

•   Baôma ba bé bé le ba nyo matjél ma Yésu yokel inyule a bé a ngi yii i niñ, a bak mbôô. Matjél mé ma bé ngi kuba.​—Matéô 26:28.

•   Sesema i Yésu i bi bôña “ngélé yada” inyu ngélé yosôna. (Lôk Héber 9:​25, 26) Jon, ibale koga ni wai bi yé bi yila toi minsôn nwé ni matjél mé i Bilôp bi nwet, wee i bet ba nje ni nyo, ba ntiimba sesema i hiki ngéda.

•   Yésu a kal le: “Boña hala, ni hoñlege me mu,” ndi a bi kal bé le “ni semek me mu.”​—1 Korintô 11:24.

 I bôt ba nhémle le koga ni wai bi yé bi yila toi nyuu ni matjél ma Yésu, ba ngwélél ngim minlôñ mi Bibel inyu nit biniigana bi. Kiki hihéga, ikété ngandak ngobol i Bibel, i yé ntilga le Yésu a bi kal inyu wai le: “Matjél mem mana.” (Matéô 26:28) Ndi, bibuk bi Yésu bi nla ki koblana le: “Yimbne i matjél mem ini,” tole “Ini i yé kiki matjél mem.” f Kiki a bé béna boñ, Yésu a bé gwélél hihéga inyu niiga.​—Matéô 13:34, 35.

 I ngéda Mbôgi Yéhôva i nlôôs Bilôp bi nwet, ndik ndék bôt yon i nje koga, i nyok wai. Inyuki?

 Matjél Yésu a bi kôp mon ma bi lédés “malômbla ma yondo” ma ma bi héñha malômbla ipôla Yéhôva ni nlômbi litén li Lôk Israél. (Lôk Héber 8:​10-​13) I bet ba yé ikété malômbla ma yondo, bon ba nlama je koga ni nyo wai. I jam li, li ta bé inyu bikristen gwobisôna, ndi ndigi i “bôt ba yé nséblaga” ni Djob i nya tôbôtôbô. (Lôk Héber 9:​15; Lukas 22:20) I bôt ba, ba ga énél i ngii ni Kristô. Bibel i nkal le, ndik 144 000 bôt bon ba nkôs bisai bi.​—Lukas 22:28-​30; Masoola 5:​9, 10; 14:​1, 3.

 Mahéñha ni “bémba titigi,” i bôt b’a ke i énél i ngii ni Kristô, libim li bôt ikété yés li gwé botñem i ba i nsoñgi u “limut li bôt likeñi” li li ga bana niñ boga hana isi. (Lukas 12:32; Masoola 7:​9, 10) To hala kii i bôt ba gwé botñem i niñ hana isi ba nje bé koga to nyo wai, yak bés di nkodba inyu ti mayéga inyu sesema Yésu a bi boñ inyu yés​—1 Yôhanes 2:2.