Cara Asa Bahagia jala Merasa Puas tu na Adong di Hita
Sude hita, naung menikah manang na so menikah, naposo manang na matua, lomo do rohatta asa bahagia ngolutta jala merasa puas. Debata pe, lomo do rohana asa bahagia hita jala merasa puas tu na adong di hita. Alani i, dilehon Ibana do nasehat tu hita.
Ringgas ma Karejo
“Alai ringgas ma ibana mangulahon karejo na denggan asa boi urupanna halak na porlu diurupi.”—EPESUS 4:28.
Lomo roha ni Debata asa ringgas hita karejo. Boasa? Molo ringgas sasahalak karejo, pasti bahagia do ibana. Alana, boi ma dipenuhi ibana kebutuhanna dohot kebutuhan ni keluargana, jala boi do ibana mangurupi halak na asing. Asing ni i, bosna pe pasti diargai ma ibana. Jadi halak na ringgas karejo, pasti diargai ibana do karejona. Dipaboa di Bibel, “silehon-lehon ni Debata do” sude akka na denggan.—Parjamita 3:13.
Jujur ma
“Pos do rohanami na ias panggora ni rohanami jala lomo do rohanami asa jujur di saluhutna.”—HEBER 13:18.
Molo jujur hita, gabe adong ma harga diritta, dang khawatir be hita, jala boi ma hita tabo modom. Asing ni i, gabe porsea ma halak tu hita jala diargai ma hita. Alai molo halak na so jujur, dang boi dihilala ibana songon i. Olo do muse sai merasa bersala ibana jala mabiar gabe tarboto gabusna i tu halak na asing.
Unang ma Hepeng na Uppetting di Ngolutta
“Unang ma holan hepeng na dipikkiri hamu di ngolumuna, alai las ma rohamuna tu akka na adong di hamu.”—HEBER 13:5.
Porlu do di hita hepeng lao manuhor sipanganon dohot akka kebutuhanta na asing. Alai bahaya do molo gabe hepeng na uppetting di ngolutta. Alana molo hepeng do na gabe uppetting di sasahalak, boi do gabe habis tikkina dohot gogona holan mangalului godang hepeng. Asing ni i muse, boi do gabe sursar keluargana, dang adong be tikkina tu ianakkonna, jala ibana pe boi do gabe marsahit. (1 Timoteus 6:9, 10) Jala, halak na mambahen hepeng na uppetting di ngoluna, olo do gabe dang jujur. Sahalak bawa na bijak mandok, “Manang ise na setia, dapotna ma godang pasu-pasu. Alai manang ise na naeng hatop mamora, pasti mangulahon na sala.”—Poda 28:20.
Mamillit Pendidikan na Terbaik
“Toktong ma ho marbisuk jala sai manat ma ho marpikkir.”—PODA 3:21.
Pendidikan na denggan, boi do mangurupi hita asa gabe halak na lam denggan jala gabe natua-tua na bertanggung jawab. Alai pendidikan sian sikkola, dang gabe jaminan lao mambahen ngolutta gabe bahagia. Jadi molo lomo rohatta asa marhasil sude na taulahon, ikkon tapillit do pendidikan na terbaik, i ma marsiajar taringot Hata ni Debata. Alana didok di Bibel, halak na manangihon Debata, “Sai marhasil do sude na niulana.”—Psalmen 1:1-3.
