Alai adong do piga-piga na suami istri, alani handphone gabe . . .

• dang adong be tikki ni nasida lao padua-dua.

• sai torus karejo, hape dang tikkina be ikkon karejo.

• curiga tu pasanganna jala boi mambahen gabe dang setia.

DI TIKKI RAP HAMU

Si Michael mandok, “Sipata tikki rap au dohot istriku, huhilala hira na so adong do ibana di labbungku. Alana, sai lalap do ibana holan na marhandphone. Jala jotjot do didok ibana, ‘Sian nakking, dang hubukka dope handphoneku. Jadi hubukka ma jo.’” Sahalak suami na margoar si Jonathan mandok, molo songon i do situasina, “nang pe rap suami dohot istri, alai hira na so rap do nasida”.

PIKKIRHON MA: Tikki rap hamu dohot pasanganmuna, sering do hamu mangangkat telepon, mambalas pesan manang mangida pemberitahuan na masuk tu handphonemuna?—EPESUS 5:33.

TIKKI KAREJO HAMU

Adong do piga-piga halak na ikkon mangangkat telepon manang ikkon mambalas email sian karejona, nang pe nungnga di jabu nasida. Na asing muse, adong do na sai torus karejo hape dang tikkina be i ikkon karejo. Sahalak suami na margoar si Lee mandok, “Tikki rap au dohot istrikku, sae naeng do huida handphoneku, atik boha adong telepon manang pesan na masuk sian karejokku.” Sahalak istri na margoar si Joy mandok, “Ala karejo sian jabu do au, gabe sai torus do hukarejohon karejokki. Gabe maol do huhilala mambagi tikkiku tu karejo dohot tu keluarga.”

PIKKIRHON MA: Diparrohahon hamu do pasanganmuna tikki makkatai nasida tu hamu?—LUKAS 8:18.

ASA SETIA TU PASANGANMUNA

Godang do halak mandok, gabe marbadai do nasida dohot pasanganna ala curiga tu postingan na dibahen pasanganna i. Adong do piga-piga pasangan na mambahen pengaturan di handphonena, asa unang boi diida pasanganna aha na diposting ibana di media sosial.

I do alana, godang do halak mandok molo media sosial i boi do “gabe racun di rumah tangga” jala boi do i mambahen nasida “gabe selingkuh”. Godang do pengacara na mandok, alani media sosial on ma sada na mambahen godang halak gabe marsirang.

PIKKIRHON MA: Sip-sip do hamu berkomunikasi tu halak na so pasanganmuna?—PODA 4:23.

ULAHON MA DIA NA UPPETTING

Asa boi tetap sehat sasahalak, ikkon dilehon do tikkina lao mangan. Suang songon i ma na suami istri, ikkon dilehon do tikkina tu pasanganna asa boi tetap denggan rumah tangga ni nasida.—Epesus 5:28, 29.

Pillit ma akka saran na di toru on, manang surat ma aha na lao diulahon hamu asa unang targanggu hamu alani handphone tikki rap hamu dohot pasanganmuna.

• Rap mangan dohot pasanganku apala sahali sadari

• Unang marhandphone tikki rap dohot pasanganku

• Mangatur tikki asa boi padua-dua dohot pasanganku

• Hupamate handphoneku tikki lao modom

• Ganup ari, ikkon makkatai dohot pasanganku apala 15 menit jala dang paloasson handphone mangganggu hami nadua

• Manottuhon andigan dang marinternet di bagasan sadari