PINGKIRHON ma molo hamu halak Kristen na mangolu di abad na parjolo. Dijahahon ma surat sian si Paulus di huriamu. Tingki dijahahon surat i, diboto hamu ma si Paulus mangenet godang ayat sian ”surat na badia”, i ma Angka Buku Heber. (2 Timoteus 3:15) Ra sungkunsungkun do rohamu, ’Ayat na dia do na dienet ni si Paulus on?’ Ndang mura mangalului i. Boasa?

Parrohahon ma songon dia ”surat na badia” di tingki ni si Paulus. Sada sian i, dipatudu do di gambar, i ma bagian ni buku Jesaya di Gulungan Laut Mati. Aha do na diida hamu? Domu do sude na disurat disi! Ndang adong tanda baca. Jala ndang adong bindu manang ayat songon na tapangke saonari.

Angka panurat ni Bibel ndang mambahen isi ni Bibel mamangke bindu manang ayat. Holan manurathon Hata ni Debata do nasida. Alani i, ingkon sude do isi ni sada buku dijaha, ndang boi sasabagian. Songon dia do molo dapotmu surat sian halak na dihaholongi hamu? Tontu dijaha hamu do sude isi ni suratna i.

Alai, gabe adong do hahuranganna molo ndang adong bindu dohot ayat. Umpamana, tingki mangenet ayat si Paulus, ibana mandok na dienetna i ”hombar tu na tarsurat” manang ”songon naung sinurirangkon ni si Jesaya”. (Rom 3:10; 9:29) On ma na mambahen maol mangalului ayat na dienet, tarlumobi ala ndang somal hita manjaha ”surat na badia”.

Bagas do isi ni parbinotoan na adong di ”surat na badia”. Alani i, di ujung ni abad na parjolo M, dibahen ma Bibel gabe 66 buku! Gabe ummura ma hita mangalului hatorangan di Bibel ala nunga adong bindu dohot ayatna. Umpamana, taringot angka ayat na dienet ni si Paulus.

Alani i, sungkunsungkun do ra hamu, ’Ise do na mambahen bindu dohot ayat di Bibel?’

Sahalak pangula ni huria di Inggris na margoar Stephen Langton, Uskup Agung di Canterbury, mambahen angka bindu di Bibel. Ibana mangulahon on di mula ni abad 13 M, tingki mangajar dope di University of Paris di Prancis.

Andorang so di tingki ni si Langton, angka panulingkit mambahen marragam isara laho mambahen Bibel gabe sasabagian marhite bindu. Ummura do mangalului hatorangan di Bibel molo nasida manjaha sada bindu sian manjaha sada buku, umpamana buku Jesaya isina 66 bindu.

Alai, adong do muse hahurangan ni on. Ndang dos isara na dipangke ni ganup panulingkit. Umpamana, buku Markus dibahen gabe 50 bindu, ndang 16 bindu songon saonari. Di Prancis di tingki ni si Langton, godang do angka parsiajar na ro sian godang negara mamboan Bibel di  bahasa nasida sandiri. Alai, angka dosen dohot parsiajar on, ndang mamboto songon dia patorangkon sada ayat domu tu ayat na asing. Boasa? Ala ndang dos pambagian ni bindu di Bibel ni nasida.

Alani i, dibahen si Langton ma isara na baru. The Book—A History of the Bible mandok, ”Dihalomohon angka panurat dohot na manjaha do isara ni si Langton on, jala tarsar ma i di Eropa.” On ma isara na dipangke mambagi bindu di godang Bibel saonari.

Di abad 16, hirahira dung 300 taon, sahalak pencetak buku na tarbarita, i ma si Robert Estienne, mambahen Bibel lam mura diparsiajari. Na tinujuna, i ma asa lomo roha ni halak marsiajar Bibel. Diboto ibana do na ringkot mambahen bindu dohot ayat.

Alai, ndang si Estienne na parjolo mambahen ayat di Bibel. Nunga adong halak na asing na mangulahon i. Alana, angka panalin Jahudi nunga mambahen ayat di Angka Buku Heber, na jotjot tagoari Padan na Robi, alai ndang dibahen nasida dope binduna. Songon pambagian ni bindu najolo, isara mambagi ayat pe marasingasing.

Dibahen si Estienne ma nomor ni ayat di Angka Buku Junani Kristen na jotjot digoari Padan na Imbaru, jala dipadomu ma i tu Angka Buku Heber naung adong ayatna. Di taon 1553, dipabinsar ibana ma Bibel na parjolo (edisi bahasa Prancis) na mamangke bindu dohot ayat songon Bibel na tapangke saonari. Alai, ndang satolop sude halak tu ulaonna i. Didok nasida do on mambahen tarbagi isi ni Bibel, jala ndang denggan sisongon i. Nang pe songon i, torop do halak maniru ulaon ni si Estienne on.

Gabe mura ma hita manjaha Bibel ala nunga adong bindu dohot ayatna. On songon ”alamat” manang kode pos. Tutu do, pambagian ni bindu dohot ayat ndang na sinihathon ni Debata, jala sipata olo do songon na janggal pambagian ni bindu dohot ayat. Alai, ulaon ni nasida on ma na mangurupi hita asa mura mangalului hatorangan di Bibel. Sarupa ma i songon tingki hita manurat hatorangan na laho taingot di sada buku.

Nang pe denggan adong bindu dohot ayat, alai ringkot do taantusi sude isi ni Bibel, ndang holan sasabagian. Tapasomal ma manjaha Bibel mangihuthon konteksna, unang ma holan sadasada ayat. Molo taulahon on, lam tangkas ma taantusi isi ni ”surat na badia i, na margogo pabisukkon”.—2 Timoteus 3:15.