Di luat Montreal di huta na pogos do ahu tubu. Tingki marumur onom taon marujung ngolu ma bapakku. Dunghon i holan omakku ma mangurus keluarga nami. Ahu ma siampudan sian ualu na marhahamaranggi.

Dung lam magodang ahu, marnarkoba, marjuji, martumbuk, dohot mangulahon angka hajahaton. Dung marumur sampulu taon ahu, huurupi ma angka boruboru na so hasea, dohot angka na paanakhon hepeng. Jotjot hian do ahu margabus jala mansai las do rohangku molo boi huotootoi halak. Ndang boi hupaso na mangotootoi i.

Tingki marumur 14 taon ahu, lam malo ma ahu mangotootoi. Umpamana, hutuhor ma godang jom, golang dohot tintin na marlampis sere (mas). Dunghon i, hugorga ma disi hata 14 karat. Hugadis ma i, di topi dalan manang di inganan parparkiran di mol. Las hian rohanghu ala muramura do ahu mandapot hepeng. Hea do di bagasan sadari dapotan pangomoan 10.000 dolar AS!

Dung marumur 15 taon ahu, dipakaluar ma ahu sian singkola ni dakdanak na jugul. Ndang adong jabungku, alani i, modom di dalan ma ahu, di taman, manang di jabu ni dongan.

Jotjot do ahu ditangkup polisi ala mangotooti. Alai ndang dipamasuk tu bagasan hurungan ahu, alana ndang barang na hutangko na hugadis i. Nang pe songon i, didando do ahu ala manipu, mangotootoi, jala ndang marsurat tigatigangku. Huhut do ahu gabe sipartagi utang alana ndang mabiar ahu tu manang ise pe. Jea do on, alani i ma sipata huboan senjata. Ahu pe hea do pigapiga hali karejo dohot punguan ni parjahat.

Parjolo sahali ahu manjaha Bibel tingki marumur 17 taon. Tingki i, sajabu ahu dohot hallethu na marsiajar dohot Sitindangi Ni Jahowa. Alai, ndang lomo rohangku tu aturan ni  Bibel. Alani i, hutinggalhon ma ibana. Dung i, rap tinggal ma ahu dohot hallethu na asing.

Muba ma ngolungku tingki hallethu na sada on mulai marsiajar Bibel dohot Sitindangi Ni Jahowa! Lam holong ma rohangku tu ibana alana lam lambok jala marlambas ni roha ibana. Ro ma ahu tu inganan parpunguan Sitindangi Ni Jahowa. Burjuburju do nasida jala dijanghon do harorongku. Tung marimbar do nasida sian angka halak na hutanda saleleleng on! Saleleng on, dibolonghon keluargaku do ahu; ndang hea huhilala holong dohot halambohon sian na metmet. Alani i, holong na dipatudu Sitindangi Ni Jahowa on boi hona tu rohangku. Tingki ditogihon nasida asa marsiajar Bibel ahu, pintor hujanghon.

Aha na huparsiajari sian Bibel paluahon ngolungku. Marsangkap hian do ahu laho mangarampok rap dohot dua donganku. Molo marhasil boi hugarar utangku na lobi sian 50.000 dolar AS. Tuani ma ndang dohot ahu! Donganku na dua i laho do mangarampok. Ujungna, sada sian nasida tartangkup jala sada nai dibunu.

Ala torus ahu marsiajar Bibel, godang ma hamubaon na hubaen di ngolungku. Umpamana di 1 Korint 6:10 (Bibel Siganup Ari), didok Bibel, ”Panangko manang na hisap manang parmabuk manang paroaroahon manang panipu,” ndang manean Harajaon ni Debata. Tumatangis ma ahu tingki hujaha i, tarsunggul ma ahu nunga sala hape ahu saleleng on. (Rom 12:2) Saleleng ngolungku holan na roa do kaluar sian pamanganhu jala parmurukmuruk do ahu, saleleng ngolungku holan gabus do huulahon.

Huparsiajari do muse molo na burju do Jahowa jala olo manesa dosa. (Jesaya 1:18) Sai martangiang ma ahu tu Jahowa mangido pangurupion asa boi muba ahu. Pangurupion na hujalo sian Jahowa boi manguba ngolungku. Alani i na parjolo huulahon, huoli ma hallethi, jala hupasurathon ma parsaripeon nami.

Nunga mangoli jala tolu gelengku tingki marumur 24 taon ahu. Saonari, ingkon hulului ma parkarejoan. Alai ndang adong singkolangku jala ndang adong na hutanda na boi mangurupi ahu mangalului parkarejoan. Marsitutu ma ahu martangiang tu Jahowa. Dung i hulului ma karejongku. Tingki diwawancarai ahu, hupaboa ma na giot do rohangku muba jala na olo do ahu burju karejo. Sipata, hupaboa ma na marsiajar Bibel do ahu jala lomo rohangku gabe sahalak na burju. Tung pe songon i godang do na so manjalo ahu. Ujungna di sada wawancara husaritohon ma ngolungku na uju i tu na laho gabe tokeku. Didok ibana, ”Ndang huboto alani aha, alai huhilala ingkon hujalo do ho.” Porsea do ahu alus ni tangianghu do on. Ujungna ahu dohot tunggani borungku tardidi gabe Sitindangi Ni Jahowa.

Mangolu do pe ahu sahat tu sadari on ala mangulahon na didok ni Bibel. Jala i ma na gabe dalan ni ngolungku. Keluargangku pe gabe martua ma. Jala ias panggora ni rohangku ala pos do rohangku nunga disesa Jahowa angka dosangku.

Nunga 14 taon ahu gabe perintis laho mangurupi halak marsiajar Bibel. Ndang sadia leleng dope, dohot do tunggani borungku gabe perintis. Saleleng 30 taon na parpudi on, nunga adong 22 halak dongan sakarejongku na huurupi asa manomba Debata Jahowa. Saonari, lao dope ahu tu mol, alai ndang na laho mangotootoi halak. Na laho patuduhon panghirimon taringot tano na imbaru na so adong be angka pangotootoi.—Psalmen 37:10, 11.