Dipaksa Saksi Jahowa do Ianakkonna Asa Mangihutton Agama ni Nasida?

PANGOLU

Daong. Alana, marhak do ganup halak lao mamillit agama na lao diihutton ibana. (Rom 14:12) Diajarhon Saksi Jahowa do poda ni Bibel tu ianakkonna. Alai molo dung magodang ianakkonna i, ibana sandiri do na ikkon mamillit lao gabe Saksi Jahowa ibana manang na dang.—Rom 12:2; Galatia 6:5.

Dos songon natua-tua na asing, lomo do roha ni Saksi Jahowa asa denggan masa depan ni ianakkonna. Diajarhon nasida do akka na denggan tu ianakkonna, songon akka keterampilan, songon dia marpangalaho na denggan, dohot haporseaon ni nasida. Porsea do Saksi Jahowa, poda na sian Bibel do na dumenggan na boi mambahen ngolu ni nasida gabe lam denggan. I do alana, berupaya do akka Saksi mangurupi ianakkonna marsiajar Bibel jala rap beribadat dohot ianakkonna. (5 Musa 6:6, 7) Alani i molo dung magodang ianakkonna i, nasida sandiri do na mamillit lao mangihutton agama ni natua-tuana manang na dang.

Adong do Saksi Jahowa na tardidi tikki poso-poso?

Dang adong. Alana dang songon i na diajarhon di Bibel. Adong do dipaboa di Bibel taringot halak Kristen di abad na parjolo. Andorang so tardidi nasida, jolo dibege nasida do barita na uli i, dijalo, dung i bertobat. (Ulaon ni Apostel 2:14, 22, 38, 41) Jadi andorang so tardidi sasahalak, ikkon jolo diattusi ibana do aha na diajarhon Bibel, dihaporseai, dung i boi ma ibana mambahen keputusan lao mangihutton aha naung diparsiajari. Molo poso-poso, pasti dang boi dope mangulahon i.

Molo dung lam magodang ianakkon, ikkon nasida sandiri do na ikkon mambahen keputusan lao tardidi. Alai andorang so tardidi, ikkon diboto ibana do na serius do keputusan na lao dibahen ibana i.

Gabe sogo do roha ni Saksi Jahowa tu ianakkonna molo dang olo tardidi?

Daong. Memang lungun do roha ni nasida. Alai toktong do holong roha ni nasida tu ianakkonna i. Jala nang pe dang olo ianakkonna i gabe Saksi Jahowa, dang gabe didok nasida na so ianakkonna i.

Ganup halak ikkon mambahen keputusan lao tardidi manang na dang. Dang soal sadia umurna

Boasa diboan Saksi Jahowa ianakkonna marbarita?

Adong do alasanna boasa diboan hami ianakkonnami marbarita. a

Didok di Bibel, ikkon diajari natua-tua do ianakkonna taringot Debata dohot carana manomba Ibana. (Epesus 6:4) Sada cara lao manomba Debata, i ma pasahatton barita na uli na sian Bibel tu akka halak. I do alana diboan Saksi ianakkonna marbarita. Alana massai rikkot do on di nasida.—Rom 10:9, 10; Heber 13:15.
Dipaboa do di Bibel songon dia akka dakdanak asa boi “mamuji goar ni Jahowa”. (Psalmen 148:12, 13, Bibel siganup ari) Sada caratta lao mamuji Debata, i ma paboahon taringot Ibana tu akka halak. b
Godang do laba na dapot ni akka dakdanak molo rap marbarita dohot natua-tuana. Boi ma diboto nasida songon dia cara berkomunikasi na denggan tu manang ise pe. Boi ma muse diparsiajari nasida songon di asa parduli tu na asing, sopan, burju, jala dang egois. Asing ni i, gabe lam godang ma muse na diboto nasida taringot isi ni Bibel, na boi mambahen lam togu haporseaon ni nasida.

Dohot do Saksi Jahowa mangarayahon akka ari raya?

Dang dohot Saksi Jahowa mangarayahon akka ari raya ni agama, manang perayaan na asing na so dihalomohon Debata. c (2 Korint 6:14-17; Epesus 5:10) Uppamana, dang dohot nasida mangarayahon ulang tahun manang mangarayahon Natal. Alana, dang sesuai i tu na diajarhon Bibel.

Nang pe songon i, las do rohanami rap marpungu dohot akka keluarga jala mangalehon hadiah tu ianakkonnami. Dang ikkon di ari tertentu dilehon hami hadiah tu ianakkonnami. Alai boi do i dilehon hami manang sadihari pe.

Lomo do roha ni Saksi mangalehon hadiah tu ianakkonna

Aha do na didok akka anak ni Saksi Jahowa?

“Ala marbarita, gabe huboto ma songon dia mangargai halak na asing, dang soal aha haporseaon ni nasida manang songon dia sikap ni nasida tu au. Asing ni i muse, ala marbarita jotjot do au pajuppang dohot akka halak na olo paboahon masalah ni nasida tu au. Jadi, dang gabe holan dirikku sandiri be na hupikkiri. Alai, gabe huboto ma songon dia asa parduli tu halak na asing.”—Si Tara. d
“Dang hea dipaksa natua-tuakku au asa gabe Saksi. Didok nasida, ikkon au sandiri do na mambahen keputusan. Molo husukkun tu omakku taringot ajaran ni Saksi, didok ibana do tu au, ‘Nga hea dilului ho alusna?’ Alani i, gabe au sandiri ma na mangalului alusna. Ujungna, au sandiri do na mambahen keputusan asa gabe Saksi, dang ala na mangihutton agama ni natua-tuakku.”—Si Ellie.
“Nang pe dang dohot au mangarayahon Natal, dang hea rugi huhilala. Ganup ari sabtu dohot ari minggu, godang do kegiatan na huulahon rap dohot akka dongan Saksi na asing. Jotjot do hami rap mangan, rap mardalani, jala rap marmeam. Gariada didok dongan sasikkolakku do, unggodang do kegiatan na huulahon sian kegiatan na diulahon nasida.”—Si Melissa.
“Sipata, olo do lungun rohakku ala dang dohot au mangarayahon Natal, nang pe huboto alasanna boasa dang dirayahon Saksi i. Alai asa unang lungun rohakku, ditogihon natua-tuakku ma akka dongan dohot keluarga asa ro marmeam tu jabunami. Jala olo do nasida mangalehon hadiah tu au.”—Si Miguel.

a Biasana, rap do anak ni Saksi marbarita dohot natua-tuana manang rap dohot na asing na boi dihaporseai nasida.

b Adong do dipaboa di Bibel akka dakdanak na mambahen las roha ni Debata, ala dipaboa nasida haporseaonna tu halak na asing.—2 Raja-Raja 5:1-3; Mateus 21:15, 16; Lukas 2:42, 46, 47.

c Ida ma artikel “Boasa Dang Dirayahon Saksi Jahowa Akka Ari Raya?”

d Piga-piga goar nungnga digatti.