Dɛlfinin mɔ e kɛnnin i ndɛ ndɛ akpasua ng’ɔ sinnin lɛ nun’n seli kɛ i wla m’ɔ boli i wun ti’n, blɛ kwlaa nun’n, ɔ kunndɛli kɛ ɔ́ nɔ́n nzan. Biblu’n seman kɛ nán e nɔn nzan. Sanngɛ ɔ se kɛ: “Nán kɔ nzannunmunfuɛ’m be wun.” (Nyanndra Mun 23:20) Be nga be nɔn nzan dan’n, blɛ sunman’n be ɲan tukpacɛ wie mun. Yɛ be nin be wiengu’m be tranman klanman. Kpɛkun, be nun sunman be wu. Sɛ sran’m be nanti afɔtuɛ nga Biblu’n man’n su’n, sa kɛ ngalɛ sa’n su ɲanman be.

I sɔ yɛ Dɛlfinin yoli-ɔ. Ɔ seli kɛ: “N wunnin i wlɛ kɛ nán nzan mɔ ń nɔ́n’n i ti yɛ n su sa’n wíe-ɔ. N fali afɔtuɛ ng’ɔ o Filipfuɛ Mun 4: 6, 7 nun’n su. Ɔ se kɛ: ‘Nán amun koko sa fi su, sanngɛ sa’n kwlaa nun nin like kwlaa ng’ɔ mian amun’n, an kan kle Nyanmiɛn.’ Kɔnguɛ kwlaa’n, kɛ min akunndan sanngan mɔ min wla bo min wun’n, n srɛ Ɲanmiɛn tankaan kpa. Sa kwlaa ng’ɔ o min su’n, n koko kle i. Sɛ min awlɛn yɛ ɔ beli min klun o, annzɛ sɛ sran wie yɛ ɔ yoli min sa wie o, annzɛ kusu sɛ min sa sin yɛ ɔ bubu min o, n kɛn i kwlaa sɔ’n kle i. Yɛ n srɛ i kɛ ɔ uka min naan n wun min wun fɛ. Kɛ n jaso nglɛmun’n, n mian min ɲin naan m’an buman sa sɔ’m be akunndan kun. Ɲanmiɛn mɔ n srɛ i’n ti’n, min ɲin tranman like nga n lemɛn i’n su. Sanngɛ, like nga n le i’n su yɛ min ɲin tran-ɔn. N fali ajalɛ kɛ n nɔnman nzan kun mlɔnmlɔn.  Afin, aunjuɛ nga Ɲanmiɛn maan n ɲɛn i’n, ɔ ti min cinnjin dan. N kunndɛman kɛ ɔ fi min sa.”

Bla nin bian kunndɛlɛ sukusuku’n ti’n, sa sunman ɲan sran mun. Sanngɛ, afɔtuɛ nga Biblu’n man’n kwla uka e naan sa sɔ’m b’a ɲanman e. I wie yɛle kɛ, Biblu’n wla e fanngan kɛ nán e tra ndalie, yɛ nán e nian bla nin bian nna nga be fa fite nzra nun’n. Be flɛ gbanflɛn kun kɛ Samiɛli. Ɔ seli kɛ: “N klo ndalie tralɛ. Wie liɛ’n, nán kɛ n klo bla’n ti-ɔ, sanngɛ n se min wun kɛ ɔ klo min sa. Ɔ maan, e nin i e tra ndalie.” Samiɛli wunnin kɛ blɛ sunman’n sran’m be se kɛ ɔ klo ndalie tralɛ. Sanngɛ, wie liɛ’n nán kɛ i sɔ yɛ i waan ɔ́ yó-ɔ. Ɔ maan, ɔ wa fali ajalɛ kɛ ɔ́ trá ndalie kpa siɛn’n. Sanngɛ, ɔ wunnin kɛ i sɔ yolɛ’n timan kpa. Ɔ seli kɛ: “Nán ayeliɛ kpa-ɔ. Afin ɔ yo maan sran’n bu i ngunmin i wun akunndan dan.”

Samiɛli kanngannin ndɛ akpasua kun nun jw.org su. Ndɛ akpasua sɔ’n ti gbanflɛn nin talua’m be liɛ. Ɔ buli ndɛ ng’ɔ o Nyanndra Mun 20:11 nun’n i akunndan. Ndɛ mma sɔ’n se kɛ: “Bakan nga i nzuɛn’n ko yo kpa b’ɔ ko yo nanwlɛfuɛ’n, ɔ fia-man.” Samiɛli wunnin i wlɛ kɛ i ayeliɛ’n timan su. Ɔ seli kɛ: “N wunnin i wlɛ kɛ sran ng’ɔ tra ndalie’n, ɔ kwlá yoman bian annzɛ bla kpa. Sɛ n ja bla’n wafa nga i sɔ kwla yo min yi’n, n buli i akunndan. N wunnin kɛ min ayeliɛ sɔ’n ti tɛ. N klo ndalie tralɛ. Sanngɛ, nɛ́n i sɔ’n ti yɛ ɔ ti kpa-ɔ.” Samiɛli kacili i sa. Yɛle kɛ w’a traman ndalie kun. I sɔ’n ti’n, w’a kunndɛman bla sukusuku.

Bian kun mɔ be flɛ i kɛ Antonio’n, ɔ le bla yɛ ɔ klo i kpa. Sanngɛ, ɔ nian bla nin bian nna nga be fa fite nzra nun’n titi. Ɔ seli kɛ, kɛ ɔ buli ndɛ ng’ɔ o 1 Piɛr 5:8 nun’n i su akunndan’n, ɔ yoli i ye kpa. Ndɛ mma sɔ’n se kɛ: “An sasa amun wun, an nian-nian! Afin mmusu’m be si Satan b’ɔ ti amun kpɔfuɛ’n, ɔ ti kɛ asɔmɔli b’ɔ wlan-wlan ɔ kpan kunndɛ nnɛn’n sa.” Antonio seli kɛ: “Andɛ’n, e kwla wun bla nin bian nna nga be fa fite nzra nun’n lika kwlakwla. Yɛ i sɔ like kusu’n, kɛ sran kun ko nian’n, ɔ jasomɛn i ti nun le. Biblu’n nun ndɛ mma sɔ’n ukali min naan m’an si sran ng’ɔ kunndɛ kɛ n niɛn i sɔ like’n. Ɔ fata kɛ min wla kpɛn su titi kɛ Satan yɛ maan sran’m be yo i sɔ ninnge mun-ɔn. Siɛn’n, n wun i wlɛ kɛ saan Zoova kunngba cɛ yɛ ɔ kwla uka min naan m’an ‘sasa min wun,’ naan min ɲin w’a tran ninnge nga be ti kpa’n be su, naan kusu min nin min yi e afiɛn w’a saciman-ɔn.” Ɲanmiɛn Ndɛ’n ukali Antonio. Ɔ maan, ɔ kwla wlɛli i nzuɛn tɛ’n, i ase. I sɔ m’ɔ yoli ti’n, sa wie’m b’a ɲɛnmɛn i.

Nanwlɛ, Biblu’n man e afɔtuɛ kpanngban naan sa sunman b’a ɲanman e. ?Sanngɛ, sɛ sa kun o e su w’a cɛ’n, Biblu’n kwla uka e? Maan e nian wafa nga Biblu’n kwla uka e naan y’a wun e su sa’m be trawlɛ’n.