Kɛ amun kan amun klun ndɛ kle amun mma mun mɔ be kusu be kan be liɛ’n kle amun’n, yɛ be kwla se kɛ amun nin be koko yalɛ kpa-ɔ.

Kɛ ɔ yo naan siɛ nin niɛn’m be nin be mma nga b’a yo gbanflɛn annzɛ talua’n be koko yalɛ’n, ɔ timan pɔpɔ. Fluwa kun seli kɛ: ‘Kɛ ba’m be te yo kaan’n, be kan be klun ndɛ kle be si nin be nin mun. Sanngɛ, kɛ bé ɲín bé kɔ́’n, be tɛmɛn i sɔ yo kun. Ɔ maan, be si nin be nin’m be siman be klun ndɛ kun.’ Sanngɛ, blɛ sɔ’n nun yɛ ɔ ti cinnjin kpa kɛ siɛ nin niɛn’m be nin be koko yalɛ-ɔ.

Blɛ kwlaa nga i nun yɛ amun wa’n waan ɔ́ kókó yalɛ’n, maan an sie amun su. Kannzɛ ɔ wie kɔnguɛ afiɛn o, maan amun yo sɔ.

“Wie liɛ’n, ɔ yo e kɛ e se i kɛ: ‘E o wa nglɛmun lelee, w’a kanman ndɛ. ?Dɔ nga su yɛ á kúnndɛ kókó yalɛ-ɔ?’ ?Sanngɛ, sɛ e wa’n kunndɛ kɛ ɔ́ kán ndɛ klé e’n, ngue ti yɛ é kó íjɔ i-ɔ? ?Nɛ́n i sɔ yɛ siɛ nin niɛn’m be kwlaa be kunndɛ-ɔ?”​—Liza.

“Kɛ n la ndɛ’n, ɔ yo min fɛ. Sanngɛ wie liɛ’n, kɔnguɛ mbluniɛn nun yɛ e nin min mma gbanflɛn nin talua mun e koko yalɛ kpa-ɔ.”​—Ɛlibɛɛ.

NDƐ NGA BIBLU’N KAN’N: “Nán maan sran fi bu i bɔbɔ i wun akunndan, sanngɛ maan ɔ bu i wiengu akunndan titi.”—1 Korɛntifuɛ Mun 10:24.

An fa amun su sie ndɛ ng’ɔ kan’n i bo kpa. Siɛ kun seli kɛ: “Wie liɛ’n, kɛ min mma’m bé kán ndɛ klé min’n, nn ń bú like uflɛ akunndan. Be wun i wlɛ kɛ n faman min su sieman be nuan bo.”

Sɛ televiziɔn’n annzɛ amun pɔɔtablu’n i ti yɛ amun kwlá sieman amun su ndɛ nga amun wa’n kan’n i bo’n, maan amun nuɛn i. Kannzɛ bɔbɔ ɔ yo amun kɛ ndɛ nga ba’n su kan’n timan cinnjin’n, sanngɛ amun fa amun su sie i nuan bo.

“Ɔ fata kɛ e kle e mma mun kɛ be ndɛ lo e. Sɛ y’a yoman sɔ’n, be su kanman be klun ndɛ kleman e. Annzɛ kusu bé kán klé sran uflɛ.”​—Maranda.

“Sɛ ndɛ nga amun wa’n kan’n timan su’n, nán amun kpalo i nuan ndɛ.”​—Antonin.

NDƐ NGA BIBLU’N KAN’N: “Ɔ fata kɛ amun sie amun su be tie ndɛ mun kpa.”—Liki 8:18.

Nán amun minndɛ blɛ trele kun. Wie liɛ’n, nán blɛ mɔ siɛ’n annzɛ niɛn’n nin ba’n be ɲin ta be wiengu ɲrun’n, yɛ ba’n kɛn i klun ndɛ-ɔ.

“Ɔ ju wie’n, e nin e wa’n e fa loto e kɔ wlanwlanlɛ. Kɛ ɔ ti e wun lɛ, mɔ e ɲin taman e wiengu ɲrun’n, ɔ nin e koko yalɛ kpa.”​—Nikɔlu.

Kɛ amún dí like’n, amun nin amun wa’n be kwla koko yalɛ wie.

“Sa ng’ɔ ju e su cɛn ba kun nun’n, i kpa o, i tɛ o, kɛ é dí like nnɔsua’n, e tinuntinun e kan. Kɛ e yo sɔ’n, e afiɛn mantan kpa. Yɛ e si kɛ sɛ sa wie o e su’n, e le sran m’ɔ kwla uka e-ɔ.”​—Robinin.

NDƐ NGA BIBLU’N KAN’N: “Sɛ be kan ndɛ be kle amun’n, maan amun ti i kpa. Nán maan sran fi kpli kan ndɛ.”​—Zaki 1:19.