Kɛ e janvuɛ kun i ti nun ko sanngan’n, e kwla bu i kɛ e kwlá yoman like fi e fa ukɛmɛn i. Sanngɛ e kwla kle kɛ e janvuɛ’n i ndɛ lo e. Yɛle kɛ e kwla ukɛ i naan w’a jrɛn i su sa’n i ɲrun kekle. ?Wafa sɛ?

“Sɛ be kan ndɛ be kle amun’n, maan amun ti i kpa.”—ZAKI 1:19.

Wafa nga e kwla uka e janvuɛ’n i kpa’n, i kun yɛle kɛ sɛ ɔ kunndɛ kɛ ɔ́ kán ndɛ wie klé e’n, maan e sie e su i nuan bo. Ɔ timan cinnjin kɛ ndɛ kwlaa ng’ɔ́ kán klé e’n, e bua nun. Maan e kle i kɛ e tie i ndɛ’n sakpa yɛ maan e si i aunnvɔɛ. Asa’n, e kle kɛ e wun i su sa’n i wlɛ. Kpɛkun, nán e kpɛ i nuan ndɛ yɛ nán e kpli e di i jɔlɛ. Maan ɔ tran e klun kɛ ɔ kwla kan ndɛ wie m’ɔ w’a bumɛn i sin mɔ kwla yo i nsisɔ.—Zɔbu 6:2, 3.

“Amun fɔnvɔ be.”—1 TESALONIKIFUƐ MUN 5:14.

E janvuɛ’n i wla kwla bo i wun yɛ ɔ kwla bu i kɛ ɔ nunman sran nun kun. Kannzɛ bɔbɔ e wunman ndɛ trele nga é kán klé i’n, sanngɛ maan e kle i kɛ i ndɛ lo e. I sɔ’n fɔ́nvɔ i kpɛkun ɔ́ wlɛ́ i fanngan.

“Janvuɛ kpa’n, ɔ kle kɛ ɔ klo sran blɛ kwlaa nun.”—ƝANNDRA MUN 17:17.

Maan e yo ninnge trele wie mun fa uka e janvuɛ’n. Nán e bu i kɛ e si like nga e kwla yo mɛn i’n. Sanngɛ e usɛ i bɔbɔ naan ɔ kan like nga e kwla yo’n. Sɛ e janvuɛ’n kwlá kanman like trele ng’ɔ kunndɛ kɛ e yo mɛn i’n i ndɛ’n, maan e se i kɛ e kunndɛ kɛ e nin  é yó ninnge wie mun likawlɛ. I wie yɛle kɛ e kwla ko wlanwlan kanngan. Annzɛ e kwla se kɛ i kɛ e kunndɛ kɛ é kó dí gua mɛ́n i, annzɛ é yó i sua’n nun yɛinyɛin. Asa’n e kwla ukɛ i junman uflɛ wie i dilɛ’n nun.—Galasifuɛ Mun 6:2.

“Amun tra amun awlɛn.”—1 TESALONIKIFUƐ MUN 5:14.

Nán blɛ kwlaa nun yɛ e janvuɛ’n kúnndɛ kɛ ɔ́ kán ndɛ klé e-ɔ. Sanngɛ maan e yo naan e janvuɛ’n wun i wlɛ i kɛ blɛ kwlaa ng’ɔ kunndɛ kɛ ɔ́ kán ndɛ klé e’n, é síe e su i nuan bo. I tukpacɛ’n ti’n, ɔ kwla kan ndɛ wie annzɛ ɔ kwla yo sa wie m’ɔ kwla lo e ngasi-ɔ. Sɛ e nuan sɛli su kɛ é yó ninnge wie mun likawlɛ’n, i sin’n ɔ kwla se kɛ ɔ yoman wie kun. Asa’n, ɔ kwla fa ya. Ɔ maan kɛ é úkɛ i’n, maan e tra e awlɛn yɛ e kle i kɛ i ndɛ lo e.—Ɲanndra Mun 18:24.

Be flɛ bla kun kɛ Fara. a I janvuɛ kun kpinndinman. Tukpacɛ ng’ɔ o i wun’n ti’n, ɔ ju wie’n ɔ di aliɛ sinnzin su. Asa’n i wla bo i wun dan yɛ like fi yolɛ yomɛn i fɛ. Fara seli kɛ: “N kle i titi kɛ n ti janvuɛ kun m’ɔ kwla lafi i su-ɔ. Kannzɛ bɔbɔ n kwlá yoman naan i su sa’n w’a wie’n, sanngɛ n sie min su i nuan bo titi. Ɔ ju wie’n like ng’ɔ kunndɛ’n, yɛle kɛ sran kun sie i su i nuan bo. Kɛ ɔ ko wie ijɔ’n kpɛkun i wun w’a fɛ i feke.”

Be flɛ bian kun kɛ Yainin. Tukpacɛ ng’ɔ o i wun’n ti’n, i wla bo i wun tratra su yɛ like wie fi yolɛ yomɛn i fɛ. Ɔ seli kɛ: “Min janvuɛ kun kleli titi kɛ ɔ klo sran yɛ ɔ wla sran fanngan. Ɔ yiali min i awlo lɔ naan e ko di aliɛ fɛfɛ kpa kun. Blɛ sɔ’n nun mɔ min klun ti jɔwa’n, n kwla kannin min klun ndɛ n kleli i. Yɛ i sɔ’n ukali min kpa!”

Be flɛ bian kun kɛ Zakɔbu. Tukpacɛ ng’ɔ o i yi’n i wun’n ti’n, i wla bo i wun dan yɛ like wie fi yolɛ yomɛn i fɛ. Ɔ seli kɛ: “Awlɛn tralɛ’n ti cinnjin kpa. Kɛ min yi yo like wie m’ɔ lo min ngasi’n, n se min wun kɛ tukpacɛ ng’ɔ o i wun’n ti yɛ ɔ yo sɔ-ɔ, naan i sɔ’n kleman kɛ ɔ timan kpa. I sɔ’n ti’n, n fɛmɛn i wun ya yɛ n kle i kɛ i ndɛ lo min.”

Be flɛ bian kun kɛ Anri. Tukpacɛ ng’ɔ o i wun’n ti’n, i wla bo i wun dan. Ɔ seli kɛ: “Min yi suannin min bo yɛ ɔ fɔnvɔli min kpa. Kɛ min wla bo min wun tratra su’n, ɔ seman min kɛ saan fii n yo like nga n kunndɛman kɛ ń yó’n. Wie liɛ’n, ɔ kwlá yoman ninnge ng’ɔ klo be yolɛ’n. Min yi kleli kɛ ɔ bumɛn i ngunmin i wun akunndan, yɛ i klun ti ufue dan. I kwlaa sɔ’n ti’n, n klo i kpa.”