Biblu’n seli kɛ mɛn’n i awieliɛ blɛ’n nun’n, tukpacɛ nga be sa ndɛndɛ’n bé jú. (Lik 21:11) Sanngɛ w’a seman kɛ Ɲanmiɛn yɛ ɔ su fa tukpacɛ sɔ mun tu e fɔ-ɔ. I kpa bɔbɔ’n, kɛ ɔ́ wá síe asiɛ’n, ɔ́ wá núnnún tukpacɛ wafawafa’m be kwlaa.

•  ?Biblu’n dun mmua kannin tukpacɛ nga be sa ndɛndɛ’n be ndɛ?

•  ?Ɲanmiɛn w’a fa tukpacɛ w’a tu sran’m be fɔ le?

•  ?Tukpacɛ nga be sa ndɛndɛ mɔ e wun be andɛ’n, Ɲanmiɛn fa be tu e fɔ?

•  ?Tukpacɛ nga be sa ndɛndɛ’n bé wíe cɛn kun?

•  Biblu’n nun ndɛ mma wie mɔ be kan tukpacɛ’n i ndɛ’n

 Biblu’n w’a kanman tukpacɛ kɛ koronavirisi, SIDA annzɛ glipu Ɛspaɲɔlu’n sa’n, be ndɛ trele. Sanngɛ ɔ seli kɛ “tukpacɛ m’ɔ sa ndɛndɛ’n” nin ‘tukpacɛ tɛtɛ’m’ bé jú. (Liki 21:11; Sa Nglo Yilɛ 6:8) Tukpacɛ sɔ’m be o nzɔliɛ ng’ɔ kle kɛ e o “mɛn’n i awieliɛ blɛ nun’n” i nun. Yɛ be kle kɛ ɔ ka kan’n, mɛn’n núnnún.—2 Timote 3:1; Matie 24:3.

 Biblu’n nun’n, ɔ ju wie’n Ɲanmiɛn fali tukpacɛ tuli sran’m be fɔ. Sanngɛ w’a yomɛn i sɔ kpɛ kaka. I wie yɛle kɛ ɔ yoli maan kokowe’n yoli sran wie mun. (Kalɛ 12:1-16; 2 Famiɛn Mun 5:20-27; 2 Be Nyoliɛ 26:16-21) Sanngɛ kɛ Ɲanmiɛn yoli sɔ’n, w’a faman tukpacɛ’n w’a yiman be nga b’a yoman sa’n be su wie. Saan be nga be yoli ɲin kekle i su’n be ngunmin yɛ ɔ fali tukpacɛ’n tuli be fɔ-ɔ.

 Cɛcɛ. Sran wie’m be waan Ɲanmiɛn fa tukpacɛ nga be sa ndɛndɛ’n annzɛ tukpacɛ uflɛ wie mun fa tu sran’m be fɔ. Sanngɛ Biblu’n kleman sɔ. ?Ngue ti yɛ e se sɔ-ɔ?

 I kun yɛle kɛ laa nun’n, tukpacɛ tɔli Ɲanmiɛn i sufuɛ kpa’m be su wie. Yɛ andɛ bɔbɔ’n, ɔ to fuanman be. I wie yɛle kɛ Timote m’ɔ yoli Ɲanmiɛn i sufuɛ kpa’n, ɔ ‘tɔli tukpacɛ tikatika.’ (1 Timote 5:23) Sanngɛ Biblu’n w’a seman kɛ kɛ mɔ Ɲanmiɛn i klun jɔmɛn i wun’n, i ti yɛ ɔ tɔli tukpacɛ-ɔ. Andɛ kusu’n, Ɲanmiɛn sufuɛ kpa’m be tɔ tukpacɛ wie. Kpɛ sunman’n, sanvuɛsa yɛ ɔ ɲan be-ɔ afin blɛ kekle nin sa wie mɔ b’a sunnzunman’n be ju sran kwlaa su.—Akunndanfuɛ’n 9:11.

 Ng’ɔ o su ekun’n yɛle kɛ Biblu’n kle kɛ blɛ nga Ɲanmiɛn wá tú klunwifuɛ’m be fɔ’n ɔ nin-a juman. I kpa bɔbɔ’n, e o “delɛ blɛ’n nun.” Blɛ sɔ’n nun’n, Ɲanmiɛn yia sran’m be kwlaa kɛ be fa be wun be mɛntɛn i naan ɔ de be. (2 Korɛntifuɛ Mun 6:2) Like kun mɔ Ɲanmiɛn yo fa yia sran mun’n, yɛle kɛ ɔ yo maan mɛn wunmuan’n nun’n be bo jasin fɛ kun. Jasin fɛ sɔ’n yɛle “Ɲanmiɛn i Famiɛn dilɛ’n i jasin fɛ’n.”​—Matie 24:14.

 Ɛɛn. Biblu’n se kɛ ɔ ka kan’n, sran fi su tɔman tukpacɛ kun. Kɛ Ɲanmiɛn wá síe asiɛ’n, ɔ́ núnnún tukpacɛ wafawafa kwlaa. (Ezai 33:24; 35:5, 6) Ɔ́ yó maan tukpacɛ’n nin ɲrɛnnɛn’n nin wie’n be su tranman lɛ kun. (Sa Nglo Yilɛ 21:4) Yɛ ɔ́ yó maan be nga be wuli’n bé sá be sin nguan nun ekun, be su tɔman tukpacɛ kun, yɛ bé trán fɛfɛ asiɛ’n su tititi.—Jue Mun 37:29; Sa Nga Be Yoli’n 24:15.

 Sa Nglo Yilɛ 6:8: “N wunnin nnɛn kpanngɔ kun. W’a kpa fuai kɛ sran mɔ tukpacɛ w’a ti i kpa’n sa. Be flɛ sran ng’ɔ ti su’n kɛ Wie. Yɛ Ndia’n su i su koko kpa. Yɛ be mɛnnin i atin kɛ ɔ fa [...] tukpacɛ tɛ [...] ɔ fa kun asiɛ’n [...] i sufuɛ mun.”

 Like nga ndɛ sɔ’n kle e’n: Sran nnan nga be ti nnɛn kpanngɔ’m be su’n, be su ndɛ nga Sa Nglo Yilɛ fluwa’n kan’n ɔ kle kɛ tukpacɛ nga be sa ndɛndɛ’n bé jú e blɛ liɛ nga nun.