Si Maria Isabel sarong maigot na hoben na parahayag sa siyudad nin San Bernardo sa nasyon nin Chile sa Amerika del Sur. Siya asin an saiyang pamilya kabilang sa grupong etniko na Mapuche. Entusiyastikong sinusuportaran kan bilog na pamilya an mga paghihinguwa na makabilog nin bagong kongregasyon sa lengguwaheng Mapuche, na inaapod man na Mapudungun.

Kan ipaisi na an Memoryal kan kagadanan ni Cristo gigibuhon man sa lengguwaheng Mapudungun asin na may inimprentang 2,000 na imbitasyon sa Memoryal sa lengguwaheng iyan tanganing idistribuwir, napaisip si Maria Isabel. Ano an magigibo niya tanganing makatabang? Ginirumdom niya an mga eksperyensiya kan ibang mga hoben na Saksi na nagin mapanggana sa paghuhulit sa mga kaklase asin paratukdo. Ipinakipag-ulay niya iyan sa saiyang mga magurang, asin napagdesisyonan ninda na magibo nin plano si Maria Isabel tanganing madistribuwir an mga imbitasyon sa eskuwelahan. Ano an nahaman niyang plano?

Inot, naghagad si Maria Isabel nin permiso sa mga namamahala sa eskuwelahan tanganing magpaskil nin imbitasyon sa may pinakalaugan kan eskuwelahan. Tinugutan ninda siya asin inumaw sa saiyang inisyatiba. Sarong aldaw sa roll call pag aga, gamit an loudspeaker ipinaisi pa kan prinsipal kan eskuwelahan an manungod sa imbitasyon!

Dangan, nakiulay si Maria Isabel na bisitahon an gabos na kuwarto kan klase. Kan tugutan siya kan mga paratukdo, hinapot niya an kada klase kun sairisay sa sainda an Mapuche. “Sa isip ko, may mga 10 o 15 estudyante hali sa mga pamilyang Mapuche sa bilog na eskuwelahan,” an sabi niya, “pero mas dakul pa palan—nakadistribuwir ako nin 150 imbitasyon!”

Sarong babayi na nakahiling kan nakapaskil na imbitasyon sa may pinakalaugan kan eskuwelahan an naghapot kun kiisay siya makikipag-ulay dapit sa okasyon. Imahinara an pagkabigla niya kan itukdo siya sa sarong dies anyos na aking babayi! “An inaasahan niya saro na dakula na,” an nakangirit na sabi ni Maria Isabel. Pagkatapos magtao nin imbitasyon asin halipot na paliwanag, hinagad ni Maria Isabel an adres kan babayi tanganing mabisita ninda ini kan saiyang mga magurang asin makaulay nin urog pa dapit sa Kahadian nin Diyos. Naugmang marhay an 20 parahayag sa lengguwaheng Mapudungun na mahiling an babaying iyan pati an 26 na iba pang interesadong Mapuche na presente sa Memoryal. An grupong iyan saro nang nag-uuswag na kongregasyon ngunyan!

Ano man an saimong edad, puwede mo man daw gibuhon an arog kaiyan na inisyatiba tanganing imbitaran an mga kapwa estudyante o katrabaho na umatender sa Memoryal, pampublikong pahayag, o pandistritong kumbensiyon? Taano ta dai magsiyasat sa satong mga publikasyon tanganing makahanap nin mga eksperyensiya na makakatabang sa saimo kun paano magigin mapanggana sa siring na plano? Siring man, mamibi para sa banal na espiritu ni Jehova na tabangan ka na magkaigwa nin kusog nin buot na magtaram dapit sa saiya. (Luc. 11:13) Kun gigibuhon mo iyan, ika man puwede nanggad masorpresa asin maparigon kan mga resulta kan saimong plinanong marhay na paghihinguwa.