Makasaysayan an 2020 pangrehiyon na kumbensiyon—iyan an kainot-inuti tang pambilog na kinaban na kumbensiyon na irinekord asin mahihiling sa Internet! Pero an kadaklan sa mga tugang ta sa Malawi saka Mozambique nasubaybayan an kumbensiyon dawa mayong Internet. Paano iyan nangyari?

 Inaprubaran kan Coordinators’ Committee saka Teaching Committee kan Namamahalang Grupo na i-broadcast an kumbensiyon sa telebisyon asin radyo sa Malawi saka Mozambique. Taano ta kinaipuhan gibuhon ini? An Malawi an saro sa pinakamahal an singil sa Internet sa bilog na kinaban, kaya kakadikit sanang Saksi an kayang makapag-Internet. Ini an sinabi ni William Chumbi, sarong miyembro kan Komite kan Sangay sa Malawi: “An radyo saka telebisyon sana an paagi para maipaabot sa mga tugang an espirituwal na kakanon na ini.” Sinabi man ni Luka Sibeko, na miyembro man kan Komite kan Sangay sa Malawi: “Kun bakong paagi sa TV o radyo, dikit lang kutang tugang sa teritoryo kan samong sangay an nakinabang sa kumbensiyon.” Sa Mozambique man, dikit lang na tugang an kayang magkaigwa nin mga electronic device, lalo na nin Internet.

 Dahil sa COVID-19 na pandemya, may mga istasyon nin telebisyon saka radyo na nagbo-broadcast na nin mga pagtiripon kan kongregasyon. a Nakipag-ulay an mga tugang sa mga istasyon na ini para mag-request nin dagdag na airtime para sa pag-broadcast kan kumbensiyon.

 Sa Malawi, may nagin problema an mga tugang. Sa parati, sagkod sarong oras sanang airtime an itinatao kan mga istasyon sa kada kostumer. Naghahadit an mga istasyon na tibaad magsawa an mga parasubaybay kun halawig an mga programa. Pero ipinaliwanag kan satong mga brother na an satong gibuhon sarong serbisyo publiko. Dawa sa panahon nin lockdown, ipinapaabot ta sa publiko an nakakarangang maugmang bareta hali sa Bibliya, na makakatabang sa mga tawo na magin marahay na namamanwaan asin magkaigwa nin maugmang pamilya. Huli kaiyan, inaprubaran kan istasyon an request kan mga brother para sa dagdag na airtime.

 Sa Malawi, pig-broadcast an kumbensiyon nin sarong istasyon nin telebisyon saka sarong istasyon nin radyo na puwedeng mahiling asin madangog nin minilyon na tawo sa bilog na nasyon. Sa Mozambique, pig-broadcast an kumbensiyon nin sarong istasyon nin telebisyon asin nin 85 istasyon nin radyo.

 Sa duwang nasyon na iyan, $28,227 b an ginastos sa pag-broadcast kan kumbensiyon paagi sa telebisyon asin haros $20,000 sa pag-broadcast paagi sa radyo. Iba-iba an singil kan mga istasyon nin radyo—puon $15 sa sadit na istasyon sagkod $2,777 sa istasyon na madadangog sa bilog na nasyon.

 Pinagmaigutan kan mga brother na magamit sa pinakamarahay na paagi an mga donasyon. Halimbawa, sa Malawi, nagibo nindang makakua nin mga diskuwento, asin may nagtugot pa ngani na tawan sinda nin 30 porsiyentong diskuwento. Uminabot nin $1,711 an natipid dahil sa mga diskuwento. Sa Mozambique, may mga istasyon na nagtugot na babaan an presyo huling bisto kita sa pagigin onesto asin nasa oras kun magbayad.

 Naapresyar na marhay kan satong mga tugang na mahiling o madangog an kumbensiyon sa lokal na mga istasyon. Si Patrick, na sarong elder sa Malawi, nagsabi: “Nagpapasalamat kami sa Namamahalang Grupo sa gabos na ginibo ninda para sa samo ngunyan na pandemya.” Si Isaac, na taga Malawi man, nagsabi: “Mayo kaming ibang gadyet, kaya nagpapasalamat kaming marhay sa espesyal na probisyon kan organisasyon ni Jehova na madangog an kumbensiyon sa radyo. Huli kaini, nakinabang sa kumbensiyon an bilog na pamilya mi. Para samo, patunay ini kan pagkamuot ni Jehova sa saiyang mga lingkod.”

 An 2020 kumbensiyon an pinakainot na kumbensiyon nin sarong parahayag sa Mozambique. Sinabi niya: “An areglo na mahiling an kumbensiyon sa TV nagpagirumdom sa sako na si Jehova an Diyos na makakamhan sa gabos. Dai nakaulang an pandemya para maitao niya sato an espirituwal na kakanon, asin itinao niya iyan sako sa mismong sala mi. Nahiling ko an pagkamuot kan mga lingkod ni Jehova sa lambang saro. Kumbinsido ako na ini an tunay na relihiyon.”

 An elder na si Wyson nagsabi: “Gusto kong ipahayag an pasasalamat ko sa pag-ataman sa samo kan maimbod na uripon sa panahon kan pandemya. An probisyon na ini na masubaybayan an kumbensiyon paagi sa radyo asin TV nakatabang sa dakul sa samo na makinabang sa programa dawa nasasakitan kami sa pinansiyal sa tios na parteng ini kan kinaban.”

 An 2021 pangrehiyon na kumbensiyon iinareglo giraray kan Coordinators’ Committee saka Teaching Committee na i-broadcast sa telebisyon asin radyo sa nagkapirang komunidad. Sain ta kinukua an panggastos sa pag-broadcast na iyan? Paagi sa mga donasyon sa pambilog na kinaban na gibuhon. An kadaklan sa mga donasyon na iyan nareresibi sa mga paaging mahihiling sa donate.mt711.com. Salamat sa saindong bulaos na mga donasyon.