Namundag ako sa Ciudad Obregón na nasa norteng parte kan Mexico, asin ikalima sa siyam na aki. Nakaistar kami harayo sa sentro kan siyudad, na diyan igwa si Tatay nin sadit na farm. Magayon an kamugtakan mi duman, asin nagkakasararo saka maugma an pamilya mi. Nakakamundo, kan singko anyos pa sana ako, binagyo an samong farm kaya naglipat kami sa ibang banwa.

 Nagdakula an nagaganar ni Tatay. Pero kasabay kaiyan, nagin paraburat siya. Naapektaran kaiyan an pag-ibanan ninda ni Nanay asin pati kaming mga aki. Nagpuon kami kan mga kuya ko na magsigarilyo, na iniikit mi ki Tatay. Sais anyos pa sana ako kaidto kan maburat ako sa inot na pagkakataon. Dai nahaloy, nagsuwayan an mga magurang ko asin naggrabe an mga bisyo ko.

 Kan makisaruan si Nanay sa ibang lalaki, iiniba niya kami saiya. Dai man siya tinatawan nin kuwarta kan kasaruan niya, saka dai man igo sa samo an ginaganar niya. Kaya kun ano-anong trabaho an ginibo ming magturugang, pero haros dai man iyan nagkanigo para sa samong panginot na mga pangangaipo. Nagsa-shine ako nin sapatos saka nagtitinda nin tinapay, diyaryo, chewing gum, asin iba pa. Naglilibot man ako sa siyudad para maghanap nin kakanon sa mga basurahan kan mga mayaman.

 Kan diyes anyos ako, inalok ako nin sarong lalaki na magtrabaho saiya sa tambakan nin basura kan siyudad. Inako ko iyan, nagpundo sa pag-eskuwela, asin naghali sa harong. Mayo pang sarong dolyar an ibinabayad niya sako kada aldaw asin tinatawan niya ako nin kakanon na nakua sa basurahan. Nag-istar ako sa barong-barong na ginibo ko gamit an mga materyales na nakua ko sa tambakan. Malaswa magtaram saka imoral an mga tawong nakakaibanan ko. Dakul sainda an mga adik saka buratsero. Iyan an pinakamiserableng parte kan buhay ko, saka naghihibi asin nagtatakig ako sa takot burubanggi. Huli sa pagigin pobre saka kulang an inadalan, ikinakasupog ko an sadiri ko. Mga tulong taon akong nag-istar sa tambakan, dangan naglipat ako sa ibang estado sa Mexico. Nagtrabaho ako sa mga uma, asin diyan nangungua ako nin mga burak saka gapas, nagtitipon nin tubo, saka nag-aani nin patatas.

 Pakalihis nin apat na taon, nagbalik ako sa Ciudad Obregón. Pinaistar ako sa sainda kan saro sa mga tiya ko na sarong albularyo. Nagpuon akong bangunguton asin na-depress na marhay kaya naiisip ko nang maghugot. Sarong banggi, namibi ako sa Diyos: “Lord, kun talagang totoo ka, gusto takang mabisto, saka paglilingkudan taka sagkod lamang. Kun igwa man nin tunay na relihiyon, gusto kong manumpungan iyan.”

 Puon pa kaidto, interesado na ako na makanuod dapit sa Diyos. Dawa kan aki pa ako, nagsisimba ako sa manlain-lain na sekta, pero nadisganar sana ako sainda gabos. Mayo man sindang gayong sinasabi manungod sa Bibliya, ni nakatabang man sinda sako na mapaniguan an sakong espirituwal na pangangaipo. May mga makikuwarta, an iba man imoral an mga miyembro.

 Kan 19 anyos ako, sinabi sa sako kan saro sa mga bayaw ko na ipinahiling sa saiya kan mga Saksi ni Jehova an sinasabi kan Bibliya dapit sa paggamit nin mga imahen sa pagsamba. Binasa niya sa sako an Exodo 20:4, 5. Sinasabi diyan na dai kita dapat gumibo nin inukit na mga imahen. Mababasa sa bersikulo 5: “Dai ka magduko sa sainda o matentaran na maglingkod sa sainda, huling ako, si Jehova na saimong Diyos, sarong Diyos na naghahagad na ako sana an sambahon.” (NWT) Dangan hinapot ako kan bayaw ko, “Kun ginagamit nin Diyos an mga imahen tanganing magmilagro o kun gusto niyang gamiton ta an mga iyan sa pagsamba, taano ta ipinagbawal niya iyan?” Napaisip ako kaiyan. Tapos, nagkapirang beses pa kaming nag-ulay dapit sa Bibliya. Sa sobrang enjoy ko sa pag-uulay mi, garo madalion sana an oras.

 Kan huri, iiniba niya ako sa pagtiripon kan mga Saksi ni Jehova. Talagang napahanga ako sa mga nahiling saka nadangog ko duman. Maski mga aki nakikikabtang sa programa asin mahusay na nagtataram sa stage! Naisip ko, ‘Magayunon talaga an pagsasanay na nakukua kan mga tawo digdi!’ Dawa halaba an buhok ko saka bakong maayos an itsura, mabuot akong pig-welcome kan mga Saksi. Inimbitaran pa ngani ako nin sarong pamilya na mamanggi sainda pagkatapos kan pagtiripon!

 Sa pag-adal ko nin Bibliya kaiba kan mga Saksi, nanudan ko na si Jehova Diyos sarong mamumuton na Ama na nagmamalasakit sa sato mayaman man kita o pobre, ano man an estado ta sa sosyedad, lahi, o inadalan. Talagang mayo siyang pinapalain. (Gibo 10:34, 35) Napaniguan man giraray an sakong espirituwal na pangangaipo. Maugma na ako asin dai ko na namamating may kulang sa buhay ko.

 Dakulaon an ipinagbago kan buhay ko! Bako na akong parasigarilyo, paraburat, saka malaswang magtaram. Nahali an kulog nin buot na dara-dara ko puon kan aki pa ako, pati man an mga bangungot na naeeksperyensiyahan ko. Dai ko na man namamatian na mayo akong halaga huli sa mga inagihan ko kan aki pa ako asin sa kakulangan ko nin inadalan.

 Igwa ako nin marahayon na agom na namumutan si Jehova asin dakulang suporta sa sako. Naglilingkod ako ngunyan bilang nagbibiyaheng paraataman nin mga Saksi ni Jehova, na nagbibisita sa mga kongregasyon para magpakusog asin magtukdo sa sakong mga kapagtubod na garo ko na mga tugang. Salamat sa nakakapaumay na epekto kan Bibliya asin sa marahayon na edukasyon na itinatao sa sato nin Diyos, dai ko na ikinakasupog an sadiri ko.