•  An simbag kan Bibliya

•  Paano nagin posible na mangaki an sarong birhen?

•  Ano an katuyuhan kan pangangaki nin sarong birhen?

•  Nagdanay daw na birhen si Maria?

•  An pangangaki daw nin sarong birhen ki Jesus iyo an inaapod na “Immaculada Concepcion”?

•  Ano an dapat na magin pagmansay ta ki Maria?

 Sinasabi kan Bibliya na si Maria, na ina ni Jesus, nagkaigwa nin daing kaagid na pribilehiyo na ipangaki si Jesus kan siya birhen pa. Ihinula kan Bibliya an milagrong ini sa libro nin Isaias, asin sinambit an kautuban kaiyan sa Ebanghelyo ni Mateo asin Lucas.

 Sa sarong propesiya manungod sa pagkamundag kan Mesiyas, ihinula ni Isaias: ‘Uya! An mabining babayi mangingidam asin mangangaki nin sarong lalaki.’ (Isaias 7:14) Sa irarom kan pasabong nin Diyos, sinabi kan kagsurat kan Ebanghelyo na si Mateo na an propesiyang iyan ni Isaias nanunungod sa pangingidam ni Maria ki Jesus. Pagkatapos maisaysay na si Maria milagrosong nagbados, idinagdag pa ni Mateo: “An gabos na ini talagang nangyari tanganing mautob an itinaram ni Jehova paagi sa saiyang propeta, na an sabi: ‘Hilinga! An birhen a magbabados saka mangangaki nin sarong aking lalaki, asin papangaranan ninda siyang Emmanuel,’ na an buot sabihon, ‘Yaon sa Sato an Diyos.’”—Mateo 1:22, 23.

 Isinaysay man kan kagsurat kan Ebanghelyo na si Lucas an milagrosong pagbabados ni Maria. Isinurat niya na isinugo nin Diyos an anghel na si Gabriel “sa sarong birhen na may kasunduan nang magpakasal sa sarong lalaki na an pangaran Jose, na gikan sa pamilya ni David, asin Maria an pangaran kan birhen.” (Lucas 1:26, 27) Kinumpirmar ni Maria na saro siyang birhen. Kan madangog niya na siya an magigin ina ni Jesus, an Mesiyas, naghapot si Maria: “Paano mangyayari ini, mantang dai man ako nakikidurog sa sarong lalaki?”—Lucas 1:34.

 An pagbabados ni Maria nangyari paagi sa banal na espiritu, na iyo an aktibong kapangyarihan nin Diyos. (Mateo 1:18) Sinabi ki Maria: “An banal na espiritu madatong sa saimo, asin an kapangyarihan kan Kahuruhalangkawi malindong sa saimo. Asin huli kaiyan an saro na mamumundag aapudon na banal, Aki nin Diyos.” b (Lucas 1:35) Milagrosong ibinalyo kan Diyos an buhay kan saiyang Aki sa matris ni Maria, na nagpangyari saiyang mangidam.

 Ginibo nin Diyos na maipangaki si Jesus nin sarong birhen tanganing magkaigwa nin perpektong hawak nin tawo si Jesus tangani na mailigtas niya an katawuhan sa kasalan asin kagadanan. (Juan 3:16; Hebreo 10:5) Ibinalyo nin Diyos an buhay ni Jesus sa matris ni Maria. Mantang nasa matris, malinaw na iningatan kan banal na espiritu nin Diyos an nagdadakulang embrayo tanganing dai iyan maapektaran sa ano man na paagi kan pagkabakong perpekto nin tawo.—Lucas 1:35.

 Kaya si Jesus ipinangaki na sarong perpektong tawo, na kapareho ni Adan kan ini dai pa nagkasala. May koneksiyon ki Jesus, an Bibliya nagsasabi: “Dai siya nakaginibo nin kasalan.” (1 Pedro 2:22) Bilang sarong perpektong tawo, mababayadan ni Jesus an pantubos na kaipuhan tanganing mabalukat an mga tawo sa kasalan asin kagadanan.—1 Corinto 15:21, 22; 1 Timoteo 2:5, 6.

 Dai itinutukdo kan Bibliya na si Maria nagdanay na birhen o birhen sa bilog niyang buhay. Imbes, ipinapahiling kan Bibliya na si Maria nagkaigwa pa nin ibang mga aki.—Mateo 12:46; Marcos 6:3; Lucas 2:7; Juan 7:5.

 Bako. Uyon sa New Catholic Encyclopedia, an doktrina nin Immaculada Concepcion iyo “an pagtubod na si Birhen Maria dai nagmana kan ORIHINAL NA KASALAN puon pa sa kapinunan kan saiyang buhay, buot sabihon, puon pa kan siya ipangidam. An gabos na iba pa sa katawuhan nagmana kan naturalesa nin tawo na kontaminado nin kasalan . . . Pero si Maria, paagi sa daing kaagid na GRASYA, naingatan na dai lamang madigtaan kan orihinal na kasalan.” c

 Sa kabaliktaran, dai itinutukdo kan Bibliya na si Maria dai nagmana kan orihinal na kasalan. (Salmo 51:5; Roma 5:12) Sa katunayan, an pagdulot ni Maria kan nakakatubos sa kasalan na atang na hinahagad kan Katugunan ni Moises sa mga ina sarong patunay na siya makasalan. (Levitico 12:2-8; Lucas 2:21-24) Sinabi kan New Catholic Encyclopedia: “An Kasuratan mayo nin malinaw na itinutukdo manungod sa Immaculada Concepcion . . . [Iyan] katukduan na ginibo kan Simbahan.”

 Nagpahiling si Maria nin marahay na halimbawa nin pagtubod, pagkamasinunod, kapakumbabaan, asin hararom na pagkamuot sa Diyos. Kabilang siya sa mga maimbod na dapat tang arugon.—Hebreo 6:12.

 Pero sa ibong kan saiyang daing kaagid na papel bilang ina ni Jesus, dai itinutukdo kan Bibliya na dapat tang sambahon si Maria o na mamibi kita saiya. Dai tinawan ni Jesus nin espesyal na onra an saiyang ina, ni pinagbutan man niyang gibuhon iyan kan saiyang mga parasunod. Sa katunayan, apuwera sa mga rekord kan Ebanghelyo asin sa sarong beses na pagsambit ki Maria sa libro nin Gibo, dai na siya nasambitan sa natatadang 22 na libro kan inaapod na Bagong Tipan.—Gibo 1:14.

 Mayong ebidensiya sa Bibliya na si Maria nag-ako nin espesyal na atensiyon—ni sinamba man—kan mga Kristiyano kaidtong inot na siglo. Imbes, itinutukdo kan Bibliya sa mga Kristiyano na an Diyos sana an dapat sambahon.—Mateo 4:10.