•  Taano ta dai ako makapokus?

•  Kun paano mas makakapokus

•  An sinasabi kan ibang tin-edyer

 “Mahilig ako kaidto magbasa nin mga libro, pero bako na ngunyan. Dawa ngani haralabang paragraph, hugak na akong basahon.”—Elaine.

 “Pag nahahaluyan ako sa paghiling nin sarong video, pigpa-fast forward ko na iyan.”—Miranda.

 “Dawa may ginigibo akong importanteng bagay, pag nagtanog an cellphone ko, an naiisip ko na, ‘Si’say an nag-text sako?’”—Jane.

 Nagigin masakit daw magpokus huli sa teknolohiya? Sabi kan iba, iyo. “Mantang mas parati kitang nag-i-Internet, mas nasasanay ta man an satong hutok na ma-distract—marikas saka pasil na maproseso an impormasyon pero dai man nakakapokus,” an sabi kan awtor asin management consultant na si Nicholas Carr. a

 Pag-isipan an tulong sitwasyon kun sain posibleng maulang an saimong pokus huli sa teknolohiya.

•   Pag nakikipag-ulay. “Dawa ngani kaatubang na an kaulay,” an naobserbaran nin sarong hoben na si Maria, “an mga tawo nagte-text pa man giraray o naggi-games o nagtse-check sa social media sa phone ninda—mayo talaga an atensiyon ninda sa kaulay ninda.”

•   Pag nasa klase. “Sinasabi kan kadaklan na estudyante na pag nasa klase sinda, ginagamit ninda an saindang gadyet para mag-text, mag-browse, o magbasa saka maghiling nin kun ano-ano,” an sabi kan libro na Digital Kids, asin ginagamit ninda an saindang mga gadyet “para sa mga bagay na mayo man nin koneksiyon sa pagklase.”

•   Pag nag-aadal. “Masakiton para sako na dai maghiling sa cellphone pag nagpaparatanog iyan,” an sabi kan 22 anyos na si Chris. Kun saro kang estudyante, an sarong oras na paggibo nin assignment puwedeng magin tulong oras o labi pa kun nadi-distract ka kan saimong mga gadyet.

 Tandaan: Masasakitan kang magpokus kun tutugutan mong ma-distract ka asin makontrol kan teknolohiya.

•   Pag nakikipag-ulay. Sinasabi kan Bibliya: “[Tawan] nindo nin atensiyon bako sana an sadiri nindong kapakanan, kundi an kapakanan man kan iba.” (Filipos 2:4) Magpahiling nin konsiderasyon paagi sa pagdangog na marhay. Maghiling sa mata kan kaulay mo, saka dai ka magpa-distract sa mga gadyet mo.

   “Pag may kaulay ka, dai magparahiling sa cellphone mo. Magpahiling nin respeto sa kaulay mo paagi sa pagtao saiya kan saimong bilog na atensiyon.”—Thomas.

   TIP: Pag nakikipag-ulay, puwede mong itago an cellphone mo. Uyon sa mga parasiyasat, pag nahihiling mo an cellphone mo, mas dakula an posibilidad na mawara an pokus mo, dahil inaasahan mo na igwa diyan na makakaisturbo saimo.

•   Pag nasa klase. Sinasabi kan Bibliya: “Tawan nindo nin atensiyon kun paano kamo nagdadangog.” (Lucas 8:18) Makakatabang an prinsipyong iyan kun itinutugot kan saindong eskuwelahan na mag-Internet mantang nasa klase. Dai mag-check nin messages, mag-games, o mag-chat online sa panahon na dapat nakapokus kamo sa pag-adal.

   “Pagmaigutan na magin atentibo sa klase. Mag-take note. Kun posible, magtukaw sa inutan tanganing dai ka ma-distract.”—Karen.

   TIP: Mag-take note sa papel imbes na sa gadyet. Ipinapahiling kaya kan research na mas makakapokus ka saka mas magigirumduman mo an mga nanudan mo kun iyan an gigibuhon mo.

•   Pag nag-aadal. Sinasabi kan Bibliya: “Magkua ka nin kadunungan, magkua ka nin pakasabot.” (Talinhaga 4:5) An buot sabihon, kaipuhan na masabutan mong marhay an pinag-aadalan mo imbes na basta sana magkua nin impormasyon para lang makapasar sa test.

   “Pag nag-aadal ako, ibinubugtak ko sa airplane mode an tablet ko para makapokus. Dai ko hinihiling an mga notification. Kun may naisip akong kaipuhan kong tandaan, isinusurat ko iyan.”—Chris.

   TIP: Mag-adal sa lugar na makakapokus ka. Pagdanayon iyan na malinig saka maayos.