IFILANGA UKUTI KWALIBA KABUMBA
Ifyo Balunshi Abonka Amenshi mu Fisabo Bacita
Onse uwaeshapo ukwipaya lunshi alishiba ifyo cayafya ukucita ifi. Utu tushishi tulangufyanya sana ukwima pa kuti betwipaya.
Basayantisiti basanga ukuti balunshi abonka amenshi mu fisabo bapilibuka kwati ni filya indeke sha nkondo shipilibuka, lelo bena bapilibuka mu kukapakapa kwa linso. Profesa Michael Dickinson alandile ati, “Ilyo bafyalwa fye bapupuka nga balunshi abakalamba. Kuti caba kwati akanya bakabika mu ndeke ya nkondo kabili nakeshiba kale ne fya kwensha iyo ndeke.”
Abafwailisha pa fintu balikopele aba balunshi kabili basangile ukuti bapampaila amapindo imiku 200 muli sekondi imo. Basangile ukuti nga bapampaila amapindo umuku umo kuti baishiba ifya kucita pa kuti bafuma apali ubwafya.
Bushe bangufyanya shani ukufuma apali ubwafya? Abafwailisha basanga ukuti aba balunshi kuti bayangufyanya ukufuma apali ubwafya imiku 50 ukucila ifyo ilinso likapa. Profesa Dickinson atile: “Mu nshita fye iinono uyu lunshi alacitapo fimo pa kuti eshibe ukulefuma ubwafya kabili aleshiba uko alingile ukupupukila pa kuti apusuke.”
Basayantisiti balafwaya ukwishiba ifyo kabongobongo akanono sana aka uyu lunshi kalenga alecita ifi.
Lunshi uonka amenshi mu fisabo alapilibuka mu kukapakapa kwa linso pa kuti bemwipaya
Muletipo shani? Bushe uyu lunshi akwete fye aya amano umwine? Nelyo kwali uwalengele akwete?
Nalimo Kuti Mwatemwako ne fi
LOLENI!
Amapindo ya Fyuni Ifilelemba
Ilyo bapangile indeke ifi, amafuta ayo babomfya mu ndeke ayo bashabomfeshe mu mwaka umo yalifikile amalita 7,600.
LOLENI!
Ifilenga Bamakanta Belapunkana pa Kupupuka
Bushe bamakanta nga balepupuka bacita shani pa kuti bepunkana?