Ilyo abena Israele bali mupepi sana no kwingila mu calo ca Bulayo imyaka nalimo 3,500 iyapita, Lesa alandile ukuti ali no kubacingilila ku “malwele yonse ayabipa” ayo baishibe ilyo bali mu Egupti. (Amalango 7:15) Cimo ico acitile, alibapeele amafunde ayalelanda pa busaka e lyo na yalelanda pa fyo bali no kucita pa kuti umuntu nga alwala tambukisheko bambi. Ku ca kumwenako:

•   Lesa alibapeele ifunde lya kuti balingile ukulasamba no kulawasha ifya kufwala.—Ubwina Lebi 15:4-27.

•   Ilyo Lesa alelanda pa busali, abebele ukuti: “Ku nse ya nkambi kukabe incende iyabelama, kabili e ko mukaleya. Kabili mukabomfye ica kwimbilako pamo ne fisolobelo fyenu, nomba ilyo mwasunsumana ku nse, mukembe ne cilindi no kupilibuka no kushiika pa busali.”—Amalango 23:12, 13.

•   Nga baishiba ukuti umuntu nalwala ubulwele ubwambukila, balemutalusha ku bashilwele no kulolela ukuti akapole. Nga apola, ilyo ashilabwelela mu nkambi alingile intanshi ukucapa ica kufwala cakwe no kusamba mu menshi pa kuti bamumone ukuti ‘nasanguluka.’—Ubwina Lebi 14:8, 9.

•   Umuntu nga akumya ku citumbi balemufumisha kunse ya nkambi.—Ubwina Lebi 5:2, 3; Impendwa 19:16.

 Ifyo Lesa alandile mu Mafunde apeele abena Israele akale sana, e fyo na basambilila pa bumi muno nshiku basanga ukutila e fyo tulingile ukucita pa kuti tuicingilile ku malwele.

 Inko shimbi ishaliko pali ilya nshita tashalekonka amafunde yalanda pa busaka ayo abena Israele balekonka. Ku ca kumwenako:

•   Balepoosa ifisoso mu misebo. Apo amenshi balebomfya yali ayakowela kabili ifya kulya balelya na fyo tafyaleba ifya busaka, abantu abengi balelwala kabili utunya utwingi twalefwa.

•   Badokota ba ku kale baishibe fye ifinono nelyo tabaishibe nangu fimo pa tushishi utuleta amalwele. Pa kufwaya ukuposha amalwele, abena Egupti balyeseshe ukubomfya ifintu pamo nga umulopa wa kwa mulinso, amafi ya cuni beta ukuti Pelican, koswe uwafwa, imisu, no mukate uwabola. Balebomfya no busali bwa bantu ne nama pa kundapa amalwele.

•   Abena Egupti ba ku kale balelwala pa mulandu wa kuti mu menshi ya mu mumana wa Naelo na yali mu mifolo bapatwile ukufuma muli uyu mumana, mwali sana utushishi. Ici e calelenga abana abanono sana abengi balefwa ku bulwele bwa kupolomya, e lyo na malwele yambi ayesako pa mulandu wa kuti mu fya kulya muli utushishi utulwalika.

 Abena Israele bena tabalelwala sana nga filya abantu bambi abaliko pali ilya nshita balelwala, pantu bena balekonka amafunde ayo Lesa abapeele ayalelanda pa busaka.