ICO MUFWILE UKWISHIBA

Abantu abengi basanga ukuti, ukufika bwangu nga pali uko baleya, kulalenga belaumfwa sana ububi. Na kabili nga ca kuti umuntu tacelwa, abantu bambi balamucindika. Cinshi twalandila ifi?

Nga tamulecelwa, abantu bakalamona ukuti mulabika amano ku fintu. Nga tamucelwa, abantu bakamona ukuti mulabika amano ku fyo mucita kabili tamuleka ifili fyonse fyalenga mwafilwa ukubomba imilimo mukwete.

Nga tamucelwa abantu bakamucetekela. Apo abantu abengi pali ino nshita tabafikilisha ifyo balaya, abantu balacindika sana umuntu ufikilisha ifyo alaya. Balupwa ne fibusa balacindika sana umuntu uo bacetekela. Abakalamba ba ncito balatemwa sana ababomfi abashicelwa ukufika pa ncito kabili abapwisha bwangu ukubomba imilimo. Ababomfi ababa ifi, limo balabafolesha ne ndalama ishingi kabili balabacetekela.

IFYO BAIBOLO ILANDA

Muli Baibolo mwaliba Amalembo ayalanda pa kusunga inshita. Ku ca kumwenako, Baibolo itila: “Fyonse filecitika bwino bwino kabili ukwabula icimfulunganya.” (1 Abena Korinti 14:40) Abantu nga bapangana inshita ya kukumana pa cifulo cimo, cilawama nga ca kuti bonse basunga inshita. Baibolo ilanda no kuti: “Icintu conse calikwata inshita ya ciko, kwaba ne nshita ku mulandu onse mwi samba lya muulu.” (Lukala Milandu 3:1) Icikomo cakonkapo cilanda no kuti kwaliba “inshita ya kulimba ne nshita ya kunukula icalimbilwe.” (Lukala Milandu 3:2) Pa kuti abalimi bakalobolole ifisabo ifisuma kabili ifingi, balingile ukubyala imbuto pa nshita yalinga. Kanshi kuti twatila umulimi alingile ukulasunga inshita pa kuti akasombole bwino.

Baibolo yalilanda no mulandu umbi uo tufwile ukulasungila inshita. Ilanda ukuti ukucita ifi kulanga ukuti twalicindika bambi kabili tatufwaya ukubapoosele inshita. (Abena Filipi 2:3, 4) Nomba umuntu uulenga bambi ukulamulolela lyonse, alapoosela abo bantu inshita.

“Tamubika fye amano ku fyo mule­fwaya fye mwe bene, lelo mulabika amano na ku fyo bambi bafwaya.”—Abena Filipi 2:4.

IFYO BAIBOLO ILANDA

Baibolo itila tufwile ukulapekanishisha libela ifintu. (Amapinda 21:5) Nga ca kuti lyonse mulacelwa, ninshi nalimo icilenga ni co mulakwata ifya kucita ifingi. Mulingile ukuleka ukucita fimo ifimupoosela inshita ifyo mulemona ukuti tafyacindama sana. Mulebangilila nga pali uko muleya kabili muleshako inshita iikalamba iya kucita ifyo mupangile. Ici cikalenga mwilacelwa nangu kwaba ifyo mushacilaenekela pamo nga imfula nelyo kwafula sana ba motoka ica kuti motoka munininemo yalaenda fye panono panono.

Baibolo itweba no kuti tulingile ukwishiba ifyo tushingacita. (Amapinda 11:2) Ilyo mushilasumina ukucita fimo nelyo ukuya kumo, mufwile ukumona nga kuti mwakumanisha ukucita ifyo mwalaya. Nga mulesumina fye ukucita fyonse, mukalanaka sana no kumfwa ububi kabili mukalalenga abantu bambi nabo baleumfwa sana ububi.

Baibolo ilanda no kuti mufwile ukulabomfya bwino inshita. (Abena Efese 5:15, 16) Mulingile ukulabika sana amano ku ficindeme sana. (Abena Filipi 1:10) Ku ca kumwenako, nga muninine muli motoka ya cintubwingi nelyo mulelolela bambi, kuti mwabomfya iyo inshita ukubelenga ifyo mulingile ukubelenga nelyo ukupekanya ifyo mwalabomba muli ubo ubushiku.

“Amapange ya wacincila yamulenga ukubomba bwino.”—Amapinda 21:5.