INSHITA imbi ilyo ba Toñi baile ku ng’anda ya uyu mwanakashi, na kabili alibakalipiile. Bushe ba Toñi bacitile shani? Ba Toñi batile: “Kwena tacaweme, tapali ifyo nacitile ifyalengele bansaalule.” Na lyo line ba Toñi balilombele ubwelelo na kabili, baebele uyu mwanakashi ukuti balishibe ifyo alecula.

Nga ni mwe mwali ba Toñi, bushe nga mwacitile shani? Bushe nga mwalifililwe ukuilama? Ukwabula no kutwishika, tacayanguka ukuilama nga ca kuti ica musango uyu cacitika. Nga batukalifya, cilafya ukuilama.

Baibolo ilakoselesha Abena Kristu ukuba abafuuka. Na kuba Icebo ca kwa Lesa cilampanya ukufuuka ku kuba na mano. Umusambi Yakobo atile: “Nani uwa mano kabili uwa mucetekanya muli imwe? Lekeni alange ukuti wa mano kabili wa mucetekanya ku micitile yakwe iisuma iimonekela mu fyo acita mu bufuuke ubufuma mu mano.” (Yako. 3:13) Ni mu nshila nshi ukuba uwafuuka kulangila ukuti twaliba na mano ayafuma ku muulu? Finshi fingatwafwa ukuba abafuuka?

Nga tuli abafuuka kuti twalenga umuntu anasha ubukali. “Ukwasuka ukwafuuka kunasha ubukali, lelo amashiwi ya kukalifya yalenga umuntu ukukalipa.”—Amapi. 15:1.

Nga ca kuti umuntu atukalifya e lyo twayasuka mu bukali, cikaba kwati twabika parafini pa mulilo. (Amapi. 26:21) Lelo nga twayasuka no mutima uwafuuka ilingi line ifintu tafibipa. No muntu uufulilwe alanashako ubukali.

Ifi fine e fyo ba Toñi bacitile. Ilyo uyu mwanakashi amwene ifyo ba Toñi bali abafuuka pa kwasuka, atendeke ukulila. Uyu mwanakashi alibalondolwelele ukuti alikwete amafya ayengi kabili na mu lupwa lwakwe mwali amafya. Ba Toñi balishimikile uyu mwanakashi imbila nsuma kabili balitendeke no kumusambilisha Baibolo. Icalengele ifi fyonse ni co ba Toñi bali abafuuka kabili bali aba mutende.

Nga tuli abafuuka tukaba ne nsansa. “Balipaalwa abafuuka, pantu bakapyana isonde.”—Mat. 5:5.

Mulandu nshi abafuuka babela ne nsansa? Abengi abali abakali, pali ino nshita baliba ne nsansa pantu balisambilila ukuba abafuuka. Apo nomba baliba ne mibele isuma ubumi bwabo bwaliwaminako, kabili balishiba ukuti ku ntanshi bakapokelela amapaalo. (Kol. 3:12) Ba Adolfo, bakangalila wa muputule abekala ku Spain, balebusha ifyo bali ilyo bashilasambilila icine.

Ba Adolfo batile: “Nali fye cimbi cimbi. Nalekalipa bwangu sana, ica kuti nangu banandi balentiina pantu nali uwa cilumba kabili uwa lubuli. Bushiku bumo kwali ifyacitike ifyalengele njaluke. Abo nalelwa nabo balindashile imyele imiku 6 kabili umulopa walisuumine sana ica kuti no kufwa nga nalifwile.”

Pali ino nshita, ba Adolfo balasambilisha abantu ukuba abafuuka kabili ifyo bacita na fyo filasambilisha abantu ukuba abafuuka. Abantu abengi tababatiina pantu nomba baliba ne mibele iisuma. Ba Adolfo balandile abati nomba baliba ne nsansa pa fyo bayaluka. Na kabili balatasha Yehova pa fyo abafwa ukuba abafuuka.

Nga tuli abafuuka tukalalenga Yehova akalesekelela. “We mwana wandi, ube na mano, kabili ulenge umutima wandi ukusekelela, pa kuti njasuke uulenseebanya.”—Amapi. 27:11.

Yehova balamuseebanya kuli Satana Kaseebanya, umulwani wakwe umukalamba. Lesa kuti akalipa pa fyo Satana amuseebanya, lelo Baibolo itila Yehova ‘alakokola ukukalipa.’ (Ukufu. 34:6) Nga tulekokola ukukalipa nga fintu Lesa aba kabili twaba abafuuka, tukaba na mano kabili tukalenga Yehova akalesekelela nga nshi.—Efes. 5:1.

Icalo twikalamo calibipa. Kuti twakumana na bantu “aba mataki, aba matutumuko, aba miponto, . . . aba lwambo, abashailama, abankalwe.” (2 Tim. 3:2, 3) Na lyo line ifi tafilingile ukulenga Abena Kristu ukukanaba abafuuka. Icebo ca kwa Lesa citweba ukuti “amano ayafuma ku muulu . . . yalenga umuntu . . . ukuba uwa mutende, uushipampamina fye pa cintu cimo.” (Yako. 3:17) Nga tuli aba mutende kabili nga tatupampamina fye pa cintu cimo, tukalalanga ukuti twaliba na mano ayafuma kuli Lesa. Aya amano yakalenga tukaleba abafuuka nga batukalifya kabili yakalenga tukapalame sana kuli Yehova uwakwatisha amano.