Nafyalilwe ku Riga, umusumba ukalamba uwa mu Latvia. Bamayo e bakushishe ine na bakalamba bandi abanakashi. Nangu ca kuti bamayo ni baKatolika, twaleya fye ku mapepo pa maholide. Nalishibe ukuti kwaliba umuntu uwacila bonse, nomba apo nali umwaice, kwali ifingi ifyalelenga ukuti nilabikako sana amano.

Ilyo nalekula, bamayo balimwene ukuti nalitemenwe ukupangulula ifintu e lyo no kufibika pamo na kabili. Bamayo balesakamikwa sana nga bansha neka pa ng’anda pantu twalikwete ifintu ifingi ifyo balemona ukutila kuti napangulula. E co balimpeele utushimbi ukuti ndepangamo ifyo nalefwaya nga natutantika pamo. Naleumfwa bwino ukututantika e lyo no kutupangulula. Ifi fine e fyo natemenwe no kwensha honda. Bamayo balinembeshe mu cangalo ca kwensha amahonda ico beta ati Zelta Mopēds (The Golden Moped). Natendekelepo ukucofa utucinga utwapala amahonda e lyo pa numa, nale-ensha amahonda.

Nalishibe bwangu ukucofa incinga kabili tapakokwele, nalebutusha kabili nale-ensha bubi bubi. Nalicimfishe imiku itatu ilyo kwali icangalo ca kucimfyanya ukucofa amacinga, e lyo imiku ibili, naliwinine icikombe ca kucofa amacinga mu musumba wa Baltic.

Pali ilya nshita, ilyo natemenwe sana ifyo nalecita, Evija (uwaishileba umwina mwandi) asangile ulupapulo lwa ba Nte ulwakwete ku mpela apakwipushisha isambililo lya Baibolo. Alilembeele ba Nte ukwipusha isambililo lya Baibolo. Tapakokwele, ba Nte babili balimutandalile kabili balitendeke ukusambilila Baibolo nankwe. Nshalemukaanya ukusambilila, lelo ine pali ilya nshita nshatemenwe ifya kwa Lesa.

Mu kupita kwa nshita, ba Nte balinjipwishe nga kuti natemwa ukusangwapo pe sambililo. Nalisumine kabili nalitemenwe  ifyo naumfwile. Nalitemenwe sana ilyo naumfwile ifyo Baibolo ilanda pa kuleta paradaise pano calo. Ku ca kumwenako, balimbelengele pa Amalumbo 37:10, 11 apatila: “Pashala fye panono no mubifi takabepo; awe ukalolekesha apo aali, no kusanga talipo. Lelo abafuuka e bakekala mu calo, kabili bakasekelela nga nshi pantu umutende ukafula.” Ala nalitemenwe pali ifi naumfwile!

Nalitampile ukutemwa sana ifya kwa Lesa no kumona ubufi ubwingi ubo aba mapepo babepa. Naleumfwa bwino ifyo nalesambilila muli Baibolo pantu fyaleumfwika ukuti fya cine.

Apo nalitwalilile ukusambilila Baibolo, nalishibe ifyo Yehova amona ubumi ukuti bwalicindama. (Amalumbo 36:9) Ici calengele ntontonkanyepo sana pa kwensha honda pantu nshalefwaya ukubika ubumi bwandi mu kapoosa mweo. Lelo ico nalefwaisha, kulumbanya Yehova. E ico nangu ca kuti ukwensha honda kwalilengele nalumbuka, natendeke ukumona ukuti takwacindeme.

Mu 1996, nalisangilwe ku kulongana kukalamba ukwa fyalo ifingi mu Tallinn, ku Estonia. Uko twalonganine kwali fye mupepi na ku cibansa twale-esensha amahonda. Pali uku kulongana, nalimwene ifyo ba Nte abafumine mu fyalo fyalekanalekana baikatana. Ku ca kumwenako, ilyo Nte umo alufishe icikwama, namwene kwati capwa tacimone. Tapakokwele, Nte umo alisangile ici icikwama no kumubwesesha ukwabula ukubulamo nangu cimo. Ala nalipapile! Nalishibe ukuti ba Nte balakonka sana ifyo Baibolo ilanda. Ine na Evija twalitwalilile ukusambilila Baibolo, kabili mu 1997, twalibatishiwe no kuba Inte sha kwa Yehova.

Abanandi bamo balifwa pa mulandu wa kwensha amahonda bubi bubi. Ilyo nalesambilila Baibolo, nalyumfwikishe ukuti mfwile ukusunga bwino ubumi ubo Yehova ampeela. Ukwishiba ifi e kwalenga mbeko na buno bushiku.

Ine na Evija twalikwete ishuko lya kubombela pa maofeshi ya Nte sha kwa Yehova pa myaka 4, mu Riga. Pali ino nshita tulomfwa bwino ukukusha no kwafwa umwana wesu Alise ukutemwa Yehova. Nalikwata ne shuko lya kubombako ubushiku bumo mu mulungu pa maofeshi ya bakapilibula, ukulungisha imyotoka ne fintu fimbi nga fyaonaika. Ndomfwa bwino ukuti imilimo naishibe ilyo nali umwaice, ndaibomfya na ino ine inshita. Ncili nalitemwa ukupangulula e lyo no kubika pamo ifintu na kabili.

Ndomfwa bwino ukushimikila pali Lesa capamo no lupwa kabili ndatasha Yehova ukuti nalisambilila icine. Na cine, ubulayo bwa kuti kukaba paradaise, bwalyalwile ubumi bwandi.