Nakuliile mu musumba wa Alicante, mu Spain. Mu lupwa lwesu tatwaleumfwana, ne ci calengele ndesangwa sana mu misebo. Mupepi na pa ng’anda pa mwesu, pali apo balewamisha amatayala. Naishileba cibusa wa ba José María, abalebombela pali ici cifulo. Ba José María bali aba nsansa sana kabili tabali nga balupwa wandi abashambikileko amano. Nangu ca kuti balincilileko imyaka 20, bali ni bacibusa wandi sana pantu nga ndi na mafya, baleba kwati ni munyinane uo nafyalwa nankwe inda imo.

Pali iyi nshita, ba José María balesambilila Baibolo ne Nte sha kwa Yehova. Nalimwene ukuti balitemenwe sana ukusambilila Baibolo, kabili balenjebako ifyo balesambilila mu Baibolo. Nauleumfwa ifyo balenshimikilako, lelo nshalebikako sana amano. Apo nali umwaice, nalebika fye amano ku fintu fimbi. Na lyo line, ifintu fyali no kwaluka.

Nshifwaya ukulandapo sana pa busanso bwa pa musebo ubo nasangilwemo. Ifyo ningalanda fye fya kuti, naliilekeleshe kabili ifyo nacitile pali bulya bushiku fya buwelewele. Ilyo nali mu busanso bwa pa musebo, ifintu fyalyalwike. Nali fye umulumendo uwa maka, lelo nalilemene kabili balintekele mu cipatala. Calingafishe sana ukusumina ukuti nalilemene. Nalemona fye kwati no kufwa kwawama.

Ba José María balishile mu kumpempula ku cipatala kabili balyebeleko na ba Nte bambi ukuti baleisa mu kumpempula. Ala naletemwa sana pa fyo balempempula. Ilyo nafumine fye mu cipatala, nalitendeke ukusambilila Baibolo. Nalisambilile ico abantu baculila, ico bafwila, ne co Lesa asuminishisha ifyabipa ukulacitika. Nalisambilile na pa fyo Lesa alaya abantu ukuti mu calo cipya abantu bakapwililika kabili takwakabe uukalatila: “Nindwala.” (Esaya 33:24) Ilyo nasambilile pali ifi, nalimwene ukuti kanshi ifintu fikaba bwino ku ntanshi.

Ilyo nafumine mu cipatala, nalitwalilile ukusambilila Baibolo kabili nalishibe ifintu ifingi ica kuti natendeke no kulongana e lyo no kushimikila imbila nsuma na ba Nte. Pa kuya mu kulongana na pa kushimikila, naleya ne ncinga iyendelapo abalemana. Nabatishiwe pa 5 November, mu 1988, ninshi ndi ne myaka 20. Yehova Lesa alilenga naba ne nsansa. Finshi nali no kulacita pa kulanga ukuti ndatasha pa fyo ancitila?

Nalishibe ukuti nangu ca kuti nalilemana, nalingile ukulabombela Yehova. Nalefwaisha ukulunduluka. (1 Timote 4:15) Pa kubala, tacayangwike pantu balupwa lwandi tabatemenwe ifi nabatishiwe no kuba Inte ya kwa Yehova, lelo ba Nte banandi balenkoselesha. Balengafwa pa kuti ndelongana no kushimikila lyonse.

Mu kuya kwa nshita, nalishibe ukuti nalingile ukulasungilwa ku cipatala uko baali no kulansakamana. Ilyo nafwailishepo, nasangile icifulo uko basungila abalemana ku Valencia, apali amakilomita 160 ukufuma ku Alicante. Uku e ko naba ukufika na lelo.

Nangu ca kuti nshenda, nalitwalilila ukubombela Yehova. Nabomfeshe indalama ubuteko bupeela abalemana ne ndalama shimbi isho ubuteko bwafwilisha abantu, ku kushita kompyuta iyo bambikila mupepi no busanshi bwandi. Nalishitile na foni. E ico cila bushiku ulucelo, abasunga abalwele balanjashisha kompyuta na foni. Pa kubomfya kompyuta, kwaliba ako ntinikilako akaba pa cilefulefu. Ndabomfya na akamuti akaibela ako mbika mu kanwa pa kutinika kompyuta e lyo na pa kutinika amanambala ya foni.

Busuma nshi nasanga mu kubomfya kompyuta na foni? Ndabomfya kompyuta na foni ukuya pa Webu saiti yesu iya www.mt711.com e lyo na pa LAIBRARE YA PA INTANETI. Ala kompyuta na foni filangafwa sana! Ilingi line ndabelenga e lyo no kufwailisha ifyebo fyaba mu mpapulo shilanda pali Baibolo pa maawala ayengi pa kuti ntwalilile ukwishibilapo na fimbi pali Lesa e lyo na pa mibele yakwe. Nga ca kuti natalalilwa nelyo naumfwa ububi, ndasanga ifyebo fimo pa Webu saiti ifilenga naumfwako bwino.

Kompyuta nakwata ilalenga ndekutika ku ma programu ya pa kulongana e lyo no kwasukapo. Limo limo, ndasukapo, ndapepako amapepo, ndalanda amalyashi, e lyo no kubelengako Ulupungu lwa kwa Kalinda nga ca kuti bambika pa ba kubelenga. Nangu ca kuti nshiya ku kulongana, ng’umfwa fye kwati ndabako.

Nshiya mu kushimikila pa mayanda ya bantu nga fintu ba Nte abengi bacita, lelo ici tacalenga ndeikala fye. Ndabomfya kompyuta na foni pa kushimikila imbila nsuma. Ndomfwa bwino ukushimikila abantu ukubomfya foni, ne ci calilenga baeluda banjeba ukulatungulula bamunyina ifya kushimikila pa mafoni. Bamunyinefwe abakalamba na balwalilila aba kuti tabenda, nabo bene balabomfya amafoni pa kushimikila imbila nsuma.

Na lyo line, nshikalila fye ukulabomfya kompyuta  na foni. Cila bushiku, ba Nte balesa mu kumpempula. Balesa na balupwa lwabo ne fibusa fyabo abo basambilila nabo Baibolo. Ilingi line beba ine ukusambilisha aba bantu Baibolo. Pa nshita shimo, bamo balantandalila pa kuti twakwatila capamo amapepo ya lupwa. Ndatemwa sana abaice nga baikala mupepi na ine kabili ndatemwa ukumfwa nga balelondolola pa calenga batemwe Yehova.

Ndomfwa bwino sana abantu abengi nga balentandalila. Abantu abengi abafuma ukutali na mupepi balesa sana mu kuntandalila, ne ci cilapapusha sana abansakamana pa cifulo naba. Ndatasha sana Yehova cila bushiku pa kuba na bamunyinane abantemwa kabili abansakamana.

Umuntu nga amposha no kunjipusha ifyo ndi, njasuka fye ukuti “Kulila buleca!” Na lyo line, nalishiba ukuti te ine neka ndwalilila. Nangu ca kuti tulakwata amafya ayalekanalekana, fwe Bena Kristu bonse twaba pa bulwi, “ubulwi ubusuma ubwa citetekelo.” (1 Timote 6:12) Cinshi calenga ntwalilile ukubombela Yehova nangu ca kuti nalikwata amafya pa myaka iingi? Ni co ndapepa cila bushiku no kutasha Yehova pa fyo alenga naba ne nsansa. Ndabombesha na mu mulimo wa kwa Lesa, uungafwa ukulabika amano ku mapaalo ayo Lesa atulaya.

Ilingi line ndatontonkanya pa fyo cikaba mu calo cipya na pa fyo nkalabutuka no kutolauka. Inshita shimo ndeba ba José María, abalwala ubulebe pali ino nshita ukuti, tukalabutuka ulubilo bonse pa kuti tukamone uukalacimfya. Nga nabepusha uukalacimfya, balaseka sana kabili batila fye, “uuli onse kuti acimfya. Icawama fye ca kuti bonse babili tukaba mu Paradaise, umo tukalabutuka ulubilo.”

Ifintu tafyawama ifi nalemana. Nalishiba ukuti ifyo nacitile ilyo nali umulumendo fya buwelewele kabili e fyalenga ndecula. Na lyo line, ndatasha Yehova ukuti tandekelesha. Alimpeela ifintu ifingi pamo nga bamunyinane abengi abo nongana nabo, alilenga natwalilila ukuba uwa mweo, alilenga ndeba ne nsansa pa fyo ngafwa abantu kabili alilenga naba ne subilo lya kuti ifintu fikawama ku ntanshi. Kanshi kuti nalanda ifyo ng’umfwa mu mashiwi fye ayanono aya kuti, Yehova alimpeela ifintu ifingi ifyo nshaleenekela.