Fifti yia bifo, 583 Witnes blong Jehova oli mekem wan trip blong ten wik blong goraon long wol. Be oli no olsem ol narafala turis. Bigfala risen blong trip ya i blong joen wetem ol narafala Witnes long asembli ya “Gud Nius Blong Olwe,” long 1963. From we oli go long bitim 20 kantri, oli putum nem blong asembli ya se “Raon Long Wol” Asembli.

Long bighaf blong ol asembli ya, Nathan Knorr we i kam long wol hedkwota blong ol Witnes blong Jehova, i givim tok ya “Taem God i King Long Fulwol.” Hem i tokbaot olsem wanem wol ya we i stap kam moa nogud, i defren olgeta long nambawan Paradaes we Baebol i promes se bambae i kam. Long fulwol, 580,509 man oli lesin long tok ya.

Ol asembli ya oli stat long Milwaukee, Wisconsin, Yunaeted Stet. Afta, olgeta we oli go long ol asembli ya oli go long is. Afta long asembli long New York, oli go long Inglan, Swiden, Jemani, mo Itali. Long evri ples, oli gat janis blong talemaot gud nius we i stap long Baebol.

Plante man oli glad tumas se ol Witnes oli kam luk olgeta. Wan yangfala woman long Stockholm, Swiden, i talem se: “Long ful laef blong mi, bambae mi no fogetem visit blong yufala. . . . Yufala i mekem bigfala trip ya blong kam storian wetem mi long bilif blong yufala long God. Mi mi gat bigfala respek long yufala.”

Olgeta we oli mekem trip ya, oli harem nogud taem oli kasem Athens, Gris, from we ol lida blong jos oli putum presa long ol man blong gavman, nao gavman i kanselem pemit blong mekem asembli long Panathinaikos Stadium. Be hemia i no stopem ol Witnes we oli gat strong tingting. Long en blong Ogis, klosap 10,000 man oli harem program blong asembli, samfala long haos blong ol man, mo samfala long kongregesen blong olgeta.

Afta we asembli long Athens i finis, oli go long Lebanon, Jodan, Isrel, mo Saepras. Ol Witnes oli tekem olgeta oli go long haos blong olgeta, mo samtaem i gat sam fani samting we oli hapen. Long Nicosia, Saepras, wan brata i tokbaot samting we i hapen long sus blong hem, i se: “Evri taem we mi kambak long haos [we mi stap slip long hem] mo tekemaot sus . . . , sus blong mi i lus . . . , !be faef minit biaen, sus i kambak mo i saengud from we oli polisim!”

Lashaf blong trip ya hemia long Esia mo Pasifik. Oli go long India, Bema (naoia Mianma), Taelan, Hong Kong, Singapo, Filipin, Indonesia, Ostrelia, Taewan, Japan, Niusilan, Fiji, mo Koria. Plante taosen Witnes long ol ples ya oli joen wetem olgeta we oli kam long ol narafala kantri. Plante man oli jenisim program blong olgeta blong kam long asembli ya, speseli wan yangfala kapol blong Yokosuka, Japan, we tufala i rere blong mared. Taem man ya i askem bos blong hem blong givim sam spel long hem blong go long asembli long Kyoto, bos i talem se oli givim spel olsem blong berem dedman mo blong go long ol mared nomo. Ale kapol ya i seftem taem blong mared blong tufala i kam klosap moa. !Afta oli go long asembli long Kyoto!

Trip ya i finis long stat blong Septemba wetem ol asembli long Hawai mo California, Yunaeted Stet. Long laswan asembli long Pasadena, California, i gat plante moa man i bitim wanem we oli ekspektem. From samting ya, afta we asembli i finis, ol trak oli fasfas gud long rod. Nating se i olsem, niuspepa i talemaot tok blong jif blong polis se: “Mi neva luk wan bigfala asembli we fasin blong ol man i gud olsem.”

Ol blesing we yumi kasem long ol asembli ya oli stap longtaem. Long asembli ya, oli soemaot wan niufala buk we i eksplenem Baebol, “All Scripture Is Inspired of God and Beneficial,” mo ol Witnes blong Jehova oli yusum yet long ol miting blong olgeta.

Wan niufala singsing tu i kamaot long asembli long New York. Wan Witnes, Harold King, we oli letem hem i kam fri long prisen long Jaena long 1963, hem nao i wokem singsing ya we nem blong hem “Long Olgeta Doa Wanwan.” Harold King i wokem singsing ya taem hem i stap hem wan long wan rum long prisen, mo hem i wan singsing yet blong ol Witnes blong Jehova, we nem blong hem naoia se “Long Olgeta Haos Wanwan.”

Tede, ol asembli blong ol Witnes blong Jehova oli defren olgeta. Oli mekem long plante moa ples long ol stadium o haos we oli smol moa, hemia i mekem se oli no nidim blong travel longwe tumas blong go long ol asembli ya. Ol jenis ya mo sam narafala jenis oli mekem se plante moa man oli save folem gud program blong ol asembli. Bitim seven milian Witnes blong Jehova mo sam narafala oli go long ol asembli ya evri yia. ?Olsem wanem? ?Yu tu yu laekem blong joen long wan asembli long yia ya? Sipos yes, yu save faenem asembli we i klosap moa long yu.