Plante taosen yia finis, i no gat wan man we i save ansa blong kwestin ya, taswe plante milian man oli ded from ol sik. Sloslo, ol saentis oli faenemaot trutok ya se ol jem nao oli stamba blong ol sik. Trutok ya i givhan blong oli blokem plante sik, mo tu, blong wokem meresin blong winim ol sik. Mo naoia plante bilian man oli save gat gudfala helt mo laef longtaem.

?Be olsem wanem long ol narafala impoten kwestin? ?Ansa blong ol kwestin ya i save givhan long yu olsem wanem?

• ?God hem i hu?

• ?Hu ya Jisas Kraes?

• ?Wanem ya Kingdom blong God?

• ?Wanem bambae i hapen long fiuja?

Plante milian man oli faenemaot ansa blong ol kwestin ya, mo samting ya i mekem laef blong olgeta i kamgud moa. Ol ansa ya oli save givhan long yu tu.

Maet yu stap tingting se, ‘?Olsem wanem man i save faenemaot trutok long wan samting?’ Antap long hemia, naoia i had moa blong faenemaot trutok long plante samting. ?From wanem?

Plante man oli no trastem ol gavman, ol bisnes, mo ol nius long televisen o niuspepa. I had blong oli save sipos ol tok ya i tru o i kamaot long prapa tingting blong ol man nomo, oli haedem sam save, o oli stap giaman. From samting ya, plante man oli gat defdefren tingting se wanem save nao i tru, mo oli no sua se bambae i givhan long olgeta.

Nating se i had, be yu save faenem yet, ansa blong ol impoten kwestin long laef. Blong faenem, yu folem sem rod nomo we yu folem blong faenem ansa blong ol narafala kwestin we oli no impoten tumas.

Blong talem stret, evri dei yumi stap lukaotem trutok. Traem tingbaot Jesika, we i talem se: “Smol gel blong mi i nogud long pinat, mo wan smol haf blong pinat nomo i save kilim hem i ded.” Taswe, taem Jesika i go pem ol kakae, hem i mas save sipos ol kakae ya i stret long gel blong hem. Hem i se: “Fastaem mi ridim ol save long paket blong faenemaot wanem i stap insaed long kakae ya. Mo tu, mi ring long faktri we i wokem kakae ya, blong jekem se oli no mestem wan smol pis blong pinat i go insaed. Mi mekem sam narafala risej tu blong meksua se mi save trastem kampani we i rerem kakae ya.”

Maet rod we yu folem blong faenem trutok i no had tumas olsem rod we Jesika i folem, be yu save mekem sem mak olsem hem, blong faenem ansa blong ol kwestin we yu yu gat:

• Kasem ol save we i tru.

• Mekem risej.

• Meksua se yu save trastem ples we yu karem ol save long hem.

?Olsem wanem rod ya i save givhan long yu blong yu faenem ol tru ansa long ol bigfala kwestin long laef?

Taem Jesika i stap lukaotem trutok blong Baebol, hem i folem semfala rod we hem i bin folem blong lukaotem kakae blong gel blong hem. Hem i se: “Taem mi ridim gud Baebol mo mi mekem risej, hemia i givhan long mi blong mi faenem trutok.” Olsem Jesika, plante milian man oli faenem ansa we Baebol i talem long ol kwestin ya:

• ?From wanem yumi laef?

• ?Wanem i hapen taem man i ded?

• ?From wanem ol man oli safa?

• ?God bambae i mekem wanem blong finisim ol trabol?

• ?Olsem wanem blong mekem famle i hapi?

Yu save faenem stret ansa blong ol kwestin ya mo sam narafala kwestin, sipos yu ridim Baebol mo yu yusum websaet ya jw.org blong mekem risej.