BIFO we oli sanem wan buk blong transletem, Raeting Dipatmen blong ol Witnes blong Jehova long Amerika i folem wan gudfala plan, i mekem ol risej, mo raetemdaon wanem we oli faenem. Mo long sem taem, oli jekem blong mekem sua se ol tok we i stap long Inglis oli stret, oli klia, mo ol man oli stap yusum. *

Biaen, Raeting Dipatmen i sanem buk ya i go long plante handred transleta we oli stap long fulwol blong oli tanem. Plante long olgeta oli laef mo mekem wok blong translesen long ples we ol man oli toktok lanwis ya we oli transletem. Bighaf blong olgeta oli transletem ol buk i go long prapa lanwis blong olgeta. Ol transleta ya oli mas save gud Inglis mo prapa lanwis blong olgeta.

?Ol transleta oli mekem wok ya olsem wanem?

Geraint, wan transleta long Briten i talem se: “Mifala i wok olsem wan tim. Taswe, i impoten we mifala i wok gud tugeta. Mifala evriwan i toktok gud tugeta blong winim ol problem blong translesen. Taem mifala i mekem olsem, mifala i no lukluk nomo wanwan wod, be mifala i lukluk long grup blong ol wod. Mifala i traehad blong kasem save ful mining blong atikol, mo tingbaot ol man we atikol ya i go long olgeta.”

?Wanem mak blong ol transleta?

“Mak blong mifala i blong mekem se olgeta we oli rid, oli harem se atikol ya i kamaot stret long lanwis blong olgeta i no wan  translesen nomo. Blong mekem olsem, mifala i traehad blong yusum ol tok we ol man ples oli save long hem mo oli stap yusum. Long rod ya, bambae man i glad blong ridim, mo bambae hem i gohed nomo blong ridim olsem we hem i stap kakae wan gudfala kakae we i isi blong solemdaon.”

?From wanem i gud blong laef long ples we oli toktok lanwis ya?

“Taem mifala i laef long sem ples we ol man oli toktok lanwis we mifala i tanem, hemia i givhan long mifala blong tanem ol tok long fasin we oli kasemsave long hem. Mo tu, mifala i save yusum sam tok blong luk sipos ol man ples oli kasemsave, i klia, mo i tajem hat. Hemia i givhan long mifala blong yusum ol tok we mining blong olgeta i stret folem Inglis.”

?Olsem wanem yufala i wok?

“Wan tim i wok long wan projek. Fastaem, wanwan long olgeta i ridim long Inglis blong i kasemsave filing we i stap, mo blong luk se atikol ya i go long hu mo from wanem oli raetem. Blong givhan long mifala, mifala i askem ol kwestin olsem: ‘?Oli wokem atikol ya blong wanem? ?Wanem bigfala mesej long atikol ya? ?Bambae mi lanem wanem long atikol ya?’ Hemia i givhan long mifala blong tingbaot sam narafala samting taem mifala i stap transletem wan atikol.

“Biaen, olgeta long tim oli storian tugeta mo serem ol tingting blong olgeta. Nao oli askem se, ?mifala i kasem save gud long atikol ya? ?Olsem wanem mifala i save mekem i sem mak long Inglis? Mak blong mifala i blong mekem se olgeta we oli ridim wan atikol, oli gat sem filing olsem olgeta we oli ridim atikol ya long Inglis.”

?Olsem wanem olgeta long tim oli wok gud tugeta?

“Mak blong mifala i blong mekem se taem man i ridim wan haf, be kwiktaem nomo hem i kasem save long hem. Blong mekem olsem, mifala i ridim bakegen mo bakegen ol haf we mifala i tanem finis long bigfala voes.

“Transleta i taepem wan paragraf long kompiuta blong hem, mo mifala i folem long kompiuta blong mifala. Mifala i jekem blong luk sipos mifala i no ademap no tekemaot sam toktok. Mo mifala i jekem tu sipos toktok, speling, mo grama we oli yusum i stret. Biaen wan long olgeta i ridim paragraf ya wetem bigfala voes. Sipos hem i mestem taem i rid, mifala i traem blong faenemaot  from wanem hem i mekem olsem. Afta we mifala i transletem wan atikol, wan long tim i ridim bakegen long bigfala voes, mo tufala narawan i traem blong faenemaot ol haf we i no klia, nao oli save mekem i kam gud moa.”

?Wan bigfala wok ya?

“Yes, mo long en blong dei mifala i taet. Long nekis moning mifala i lukluk tru long atikol ya bakegen, taem tingting i fres. Sam wik biaen, Raeting Dipatmen i sanem ol jenis we oli mekem long Inglis. Afta we mifala i mekem ol jenis ya, mifala i ridim bakegen, mo jekem sipos i klia mo i isi blong kasemsave.

?Wanem ol tul long kompiuta we yufala yusum?

“Kompiuta i no save tekem ples blong ol transleta. Be ol Witnes blong Jehova oli wokem sam tul long kompiuta we i givhan blong mekem wok blong translesen i isi. Wan long ol tul ya, hemia diksonari we mifala i putum ol tok we mifala i yusum oltaem. Narawan, hem i wan tul we i givhan long mifala blong mekem risej long ol samting we mifala transletem finis, mo i givhan tu blong luk olsem wanem mifala i bin transletem sam toktok we i had blong transletem.”

?Yu harem olsem wanem long wok ya?

“Mifala i luk wok ya olsem wan presen we mifala i givim long ol man. Taswe mifala i mekem gud wok ya blong ol man oli save harem gud blong ridim, mo i save givhan long olgeta. Mifala i glad taem ol magasin no wan haf long websaet i tajem hat blong olgeta  we oli ridim, mo i mekem laef blong olgeta i kam gud moa.”

Raon long wol, plante milian man oli stap ridim ol buk blong ol Witnes blong Jehova long prapa lanwis blong olgeta, mo hemia i givhan bigwan long olgeta. Ol advaes we oli faenem long ol buk, video, mo long websaet ya jw.org, oli stanap long Baebol. Mo tu, God we nem blong hem Jehova, i talem long yumi se, hem i wantem mesej blong hem i kasem “olgeta blong evri kala, mo kantri, mo laen, mo lanwis.”—Revelesen 14:6. *