Yes, from we God nomo i naf blong givim ol beswan samting blong givhan long yumi. Baebol i talem se: “God . . . i stap leftemap tingting blong ol man we oli harem nogud.”—2 Korin 7:6.

•   Paoa. God i save ‘mekem yu yu strong.’ Maet hem i no tekemaot olgeta problem blong yu, be taem yu askem long hem blong i givim paoa long yu blong winim ol problem ya, bambae hem i ansa long yu. (Filipae 4:13) Yu save sua se hem i rere blong lesin long yu, from we Baebol i talem se: “Jehova i stap klosap long ol man we tingting blong olgeta i kam nogud, i stap sevem ol man we tingting blong olgeta i foldaon olgeta.” (Ol Sam 34:18, NW) I tru, God i save harem prea blong yu, nating se yu no naf blong talemaot olgeta filing blong yu long hem.—Rom 8:26, 27.

•   Eksampol blong sam gudfala man. Wan man blong raetem Sam, i prea long God se: “Tingting blong mi i foldaon we i foldaon olgeta, be mi mi stap krae i kam long yu.” Man ya i winim tingting we i foldaon, from we hem i tingbaot se God i no stap panisim yumi from ol sin blong yumi. Hem i talem long God se: “?Sipos yu yu stap raetemdaon ol sin blong mifala, hu bambae i save stanap long fes blong yu, we yu yu no save jajem hem? Be yu yu stap fogivim mifala, yu stap tekemaot ol sin blong mifala, nao mifala i stap bodaon long yu, mifala i stap ona long yu.”—Ol Sam 130:1, 3, 4.

•   Hop. God i leftemap tingting blong yumi, be i no hemia nomo. Hem i promes tu se bambae hem i tekemaot olgeta problem we oli stap mekem tingting blong man i foldaon. Taem bambae hem i mekem promes ya i kamtru, “ol samting ya we i hapen bifo, bambae ol man oli no moa save tingbaot stori blong olgeta, bambae i lus olgeta.”—Aesea 65:17.

Makemgud: Ol Witnes blong Jehova oli luksave ol samting ya we God i givim blong givhan long olgeta. Mo tu, oli go luk ol dokta blong man we tingting blong hem i foldaon, blong kasem tritmen. (Mak 2:17) Be oli no stap leftemap wan tritmen se i gud moa long narawan. Oli ting se olgeta man wanwan oli mas mekem prapa desisen blong olgeta long bisnes ya.