No. Baebol i talem se yumi mas prea long God nomo, tru long nem blong Jisas. Jisas i talem long ol disaepol blong hem se: “ From samting ya, taem yufala i prea, yufala i mas prea olsem:‘Papa blong mifala long heven, plis yu mekem we nem blong yu i tabu.’” (Matiu 6:9, Baebol Long Bislama) Hem i neva talem long ol disaepol blong hem blong prea i go long ol tabu man, long enjel, no i go long wan narafala.

 Jisas i talem long ol disaepol blong hem tu se: “Mi nao rod ya, mo mi mi stamba blong trutok, mo mi stamba blong laef. I no gat man i save kam long Papa blong mi, sipos mi mi no tekem hem i kam.” (Jon 14:6, BLB) Jisas nomo we God i jusum hem blong i joenem yumi wetem God.—Hibrus 7:25.

?Be olsem wanem sipos mi prea long God mo ol tabu man tu?

 Long wan loa long Ten Komanmen, God i se: “Mi mi MASTA mo mi God blong yufala, mi wan jalus God.” (Eksodas 20:5, New American Bible) ?Olsem wanem God i jalus? Futnot long Baebol ya New American Bible i eksplenem se tok ya i min se “hem i wantem se wosip i mas go long hem wan nomo.” Yes, God i wantem se wosip mo prea blong yumi i go long hem nomo.—Aesea 48:11.

 Taem yumi prea i go long wan narafala man, wan tabu man, no wan enjel, yumi agensem God. Taem aposol Jon i wantem bodaon long wan enjel, enjel ya i talem long hem se: “No, yu no mekem olsem. Yumitu wetem ol brata blong yu we oli witnes long tok we Jisas i talemaot, yumi evriwan i man blong wok nomo. Yu mekem wosip long God.”—Revelesen 19:10, NAB.