Baebol nomo i save givhan long yu blong kasem save ol tijing blong hem. Nating se laef blong yu i olsem wanem, be ol tok blong God “oli no strong tumas, mo oli no stap longwe” long yu nating.—Dutronome 30:11.

?Wanem blong mekem?

1.   Gat stret tingting. Yu mas luksave se Baebol hem i Tok blong God mo gat tingting daon from we God i agensem man we i flas. (1 Tesalonaeka 2:13; Jemes 4:6) Taswe, yu no mas bilivim ol enikaen tok. God i wantem se yu “yusum gud tingting” blong yu.—Rom 12:1, 2.

2.   Prea from waes. Ol Proveb 3:5 i se: “I nogud yu ting se save ya blong yu naoia hem i naf blong givhan long yu.” Taswe yu mas “gohed blong askem long God” blong i givim waes long yu blong kasem save long Baebol.—Jemes 1:5.

3.   Stadi oltaem. Yu save kasem plante gudfala frut sipos yu stadi oltaem long Baebol i bitim we yu stadi wanwan taem nomo.—Josua 1:8.

4.   Stadi long ol wanwan poen. Sipos yu yusum Baebol blong stadi long wan topik no wan poen, hemia rod we i moa gud blong halpem yu blong lanem ol trutok blong Baebol. Taem yu stadi, i gud yu lanem ol “stamba tijing” fastaem, biaen yu ‘gohed blong stadi long ol dip save.’ (Hibrus 6:1, 2, Easy-to-Read Version) Nao bambae yu faenemaot se yu save skelem wan vas wetem wan narafala vas mo tu bae yu luk se plante haf long Baebol oli joen gud tugeta, iven ol haf we oli “had tumas blong kasem save long olgeta.”—2 Pita 3:16.

5.   Askem help long narafala. Baebol i leftemap tingting blong yumi blong letem ol narafala we oli kasem save long Baebol, oli halpem yumi. (Ol Wok 8:30, 31) Ol Witnes blong Jehova oli folem fasin blong ol Kristin bifo blong mekem fri Baebol stadi. Oli yusum ol refrens blong ol vas blong halpem ol man blong kasem save long samting we Baebol i rili tijim.—Ol Wok 17:2, 3.

Samting we yu no nidim

1.   Hae save no hae edukesen. Tingbaot ol 12 aposol blong Jisas. Taem oli kasem save long ol Tok blong Baebol, oli tijim ol narafala long hem, nating se sam man oli talem se, oli “no skul gud” mo oli “man olbaot nomo.”—Ol Wok 4:13.

2.   Mane. Yu save lanem samting we Baebol i tijim we yu no pem. Jisas i talem long ol disaepol blong hem se: “Yufala i kasem fri nomo, mo yufala i mas givim fri nomo.”—Matiu 10:8.