LUZIA A FEÑKE A ABO YA MBO NGAL. Éyoñ a mbe mongô, a nga bi ôkone ba loone na poliomyélite. Ôkon ôte wo ji’a kôéban, a wo nambe minsise ya nyul. Éyoñ a nga bi mimbu 16, minga éziñe ya vôme Luzia a mbe a saék a nga jô nye na, “Zambe a nga foñesô wo a bo na ô tabe éyem amu ô mbe ô bo’o nyia wôé melo ô bo’o fe mbia be mam.” Abui mimbu mi lôteya ve Luzia a ngenan a simesan aval ane jam ete e nga taé nye nlem.

ÉYOÑE DAMARIS A NGA YEME NA A BILI CANCER E BOO, ésa a nga sili nye na: “Za jam ô nga bo na ô bi aval ôkone di? Ô nga yiane bo mbia jam. Nde Zambe a foñesô wo amu jam ete.” Mejô mete me nga balé Damaris.

Ôsimesane ya na Zambe a foñesô bia a zene y’akon wo so ôteñ. Kalate Manners and Customs of Bible Lands a jô na, abui bôte ya éyoñe Krist e mbe é buni’i na “môt a kon amu mam abé émien a te bo, nge bebiaé bé, a na ôkon ô ne fonos ya mam abé.” Medieval Medicine and the Plague a jô na, melu kôa “abui bôt é mbe é buni’i na Zambe a mbe a so’o mbia be mam asu na a foñesô bôt amu minseme miap.” Nde ñhe, éyoñe bemillion be bôte be nga wu mesi ya Europe amu ébubua ôkon é nga bobane ntete mimbu 14, ye Zambe nnye a nga tyi’i mbia be bôte mejô? Nge na, ye ôkon ôte ô nga so amu angengeme, ane beyeme mam be nga su’ulane yen? Bôte béziñe be ne ñhe sili bebiene na, ye e ne fo’o été na Zambe a belan akone na, a foñesô bôt amu minseme miap? *

BI TAME FAS: Nge ôkon a minju’u mi mbe asu na Zambe a foñesô bia, amu jé Yésus a nga saé minkôkon? Ye nalé a nji ye bo ve ane a tebe ntyi’an a zôsô Zambe ngame yat? (Matthieu 4:23, 24) Yésus a vo’o wosan a mimboane mi Zambe. A nga jô na: “Me abo mam a nye’e melu mese” a na, “Ane Tate a nga tiñeti ma, aval ete me abo.”​—Jean 8:29; 14:31.

Kalate Zambe a kobô ne sañesañ. Yéhôva Zambe a ne “te k’ékotekot.” (Deutéronome 32:4, Mfefé Nkôñelan) Éve’an é ne na, Zambe a vo’o bo na avion a ku a wôé abui bôt teke étom, fo’o ve amu a mbe a kômbô’ô foñesô môte wua a mbe avion été! Zôsôa môt Abraham, môt a mbe a wulu ba’aba’ a Zambe, a nga jô a lat a zôsô Zambe na, Zambe a vo’o “jiane bôt be ne zôsô ba be ba be ne abé nsamba wua.” A nga jô na nalé a ne “teke bebé” be nye. (Metata’a 18:23, 25) Kalate Zambe a jô fe na, “É bo’o Zambe ôyape na, a bo abé”; a vo’o “bo mbia jam.”​—Job 34:10-12.

Minju’u bia tôbane mie mi nji so amu Zambe a foñesô bia amu nsem éziñ. Yésus émien a nga kobô ajô ete éyoñe ba be beyé’é bé be nga tôbane môt éziñ a nga bialé a to ndim. Bia lañe na: “Éyoñ a nga lôte zen, a nga yene môt a nga bialé ndim. Ane beyé’é bé be nga sili nye na, A Rabbi, za a nga bo abé, ye môte nyô, ye bebiaé bé, amu a nga bialé ndim? Yésus a nga yalane na, Sa môte nyô a nga bo abé, sa ke bebiaé bé: ve amu mimboane mi Zambe mi aye yené be nye.”​—Jean 9:1-3.

Amu bivuse bi asimesane bôte be nga to be bili, beyé’é be Yésus be nga yiane bo fe’e ne vema éyoñe Yésus a nga jô be na, sa ke môt ate nge bebiaé bé mbe be nga bo nsem avale ya na a tôbane mbia jam. Nge ô vaa na Yésus a nga saé ndindim ôte, a nga liti fe a zen éte na, ñye’elane ya na  minju’u mi ne fonos ja so be Zambe ô nji bo été. (Jean 9:6, 7) Den, bôte ba tôbane minju’u ya ôkon be ne bi ngule nyule mfa’a ya yeme na, sa ke Zambe nnye a bo na be kon.

Mintilane mia ve bia ndi nleme na

• “Amu Zambe a se ngule ya yene meve’ele ya abé, a émien a ne te ve’ele môt.” (JACQUES 1:13) Ve, “mbia be mam” ma tibili môt a binam den a nto mintete mimbu, ane akon, mintaé, a awu, bi mbeme man.

• Yésus Krist a nga “saé bôte bese be nga kon.” (MATTHIEU 8:16) Éyoñ a nga saé bôte bese be nga zu be nye, Mone Zambe a nga liti mam Éjôé Zambe ja ye bo asu bôte ya si se.

• “A [Zambe] ye fimi mili’i mese mise map; a awu de aye fe bo; nalé fe ôlun vi aye fe bo, nge ñyôn, nge mintaé: mame ya ôsu me lôteya.”​—NLITAN 21:3-5.

Nde ñhe, amu jé émo minlañ ja juk, a tôban abime nju’u di? Bôt be faseya éyalane ya ñsili ôte den a nga ke mintete mimbu. Nge sa ke Zambe nnye a be’e ayeme ya été, za nnye a be’e de? Nlô ajô wo tôñe valé wo zu ve éyalane ya minsili mite.