Si Sister Cecilia Alvarez, nga taga-Argentina, nakasinatig grabeng mga problema sa panglawas sukad siya natawo. Niadtong Mayo 18, 1994 ang iyang unang operasyon, 16 ka adlaw pa lang human siya gipanganak. Gioperahan sa mga doktor sa Argentina ang depekto sa iyang dugokan (spine). Sulod sa 25 ka tuig sukad adto, si Cecilia naoperahan pag 42 ka beses ug ang kadaghanan niini gihimo niadtong bata pa siya. Niining tuiga, bag-o lang siyang gioperahan sa iyang wala nga bat-ang. Sama sa tanan niyang operasyon, kini walay pag-abonog dugo.

Si Cecilia miangkon: “Makapa-stress kaayo nga makaagig daghang operasyon ug paagi sa pagtambal.” Pero misalig siya kang Jehova ug naningkamot nga magpabiling positibo. Uban sa tabang sa iyang ginikanan, gipaningkamotan niya nga sundon ang giingon sa mga doktor. “Importante kaayo nga maandam ang akong lawas sa dili pa ang operasyon,” miingon si Cecilia. “Apil niini ang erythropoietin treatment, pagtomar ug mga tambal nga makatabang sa pagdaghan sa red blood cell, ug kinahanglan sab kong mokaon ug mga pagkaon nga daghag iron.”

Si Cecilia miingon bahin sa mga medical team nga mitabang niya sa daghang tuig: “Gipabilhan gyod nako ang ilang trabaho, dili lang tungod kay giluwas nila ang akong kinabuhi kondili gitahod sab nila ang akong desisyon nga dili magpaabonog dugo.”

Ang mga doktor ni Cecilia dako sab ug pagtahod niya ug sa mga igsoon nga mitabang niya. Si Dr. Ernesto Bersusky, kanhing head doctor sa spinal pathology sa Juan P. Garrahan Children’s Hospital sa Buenos Aires ug daghang beses nga apil sa team nga nag-opera kang Cecilia, nahinumdom: “Sa daghang beses nga nakauban nako si Cecilia, nakita nako kon unsa siya ka determinado ug mapatin-aw niyag maayo ang iyang gituohan. Pirme sab nakong ipatin-aw niya kon unsay akong himoon ug pasaligan siya nga dili gyod siya abonohag dugo.”

Si Dr. Susana Ciruzzi, abogado ug membro sa bioethics committee sa Juan P. Garrahan Children’s Hospital, miingon: “Dunay maayong kooperasyon tali sa mga Saksi ni Jehova ug sa medical staff. Ingong mga doktor, nakauban na namo ang mga Saksi ni Jehova ug andam ming mohimog mga kausaban—dili lang sa among panghunahuna kondili sa amo pong mga pamaagi sa pagtambal ug kahibalo sa siyensiya—maong nakahimo mig laing mga pamaagi nga kapuli sa pag-abonog dugo.”

Gawas pa sa ekspertong mga doktor, nagpasalamat sab si Cecilia sa suporta sa mga igsoon. Siya miingon: “Mapasalamaton kaayo ko sa Hospital Liaison Committee (HLC) ug sa Patient Visitation Group. Bisag naa silay mga pamilya ug ubang responsibilidad, andam silang mohatag sa ilang panahon ug kusog. Gipabilhan gyod nako ang ilang tabang.”

Si Cecilia 25 anyos na karon, ug bisag pirmeng magsakit iyang lawas ug nag-wheelchair na, positibo gihapon siya. Gani, siya miingon: “Para nako, ang akong lisod nga mga eksperyensiya nakatabang nga maugmad ang maayong personalidad ug Kristohanong mga hiyas.”

Siya mipadayon: “Human sa usa sa mga operasyon, usa ka membro sa HLC ang miduaw nako ug gihisgotan niya ang Proverbio 10:22: ‘Ang panalangin ni Jehova mao ang makapadato, ug dili niya kini dugangan ug [permanenteng] kasakit.’ Ganahan kaayo ko ani nga teksto ug pirme nako ning hinumdoman.”

Niadtong Mayo 1, 2019, si sister Cecilia nakadawat ug espesyal nga panalangin dihang natudlo siya ingong regular payunir. Klaro nga gihupay ug gipalig-on gyod ni Jehova ang atong minahal nga igsoon. Ingong resulta, si Cecilia malipayong nagsangyaw sa makapahupayng mensahe sa Pulong sa Diyos ngadto sa uban.

Makasalig ta nga si Jehova padayong maghupay natong tanan sa atong mga problema sama sa iyang gihimo kang Cecilia.​—2 Corinto 1:4.