Bisan tuod ang Bibliya wala maggamit sa pulong “aborsiyon,” daghang teksto niini ang naghatag natog ideya kon unsay hunahuna sa Diyos bahin sa kinabuhi sa tawo, apil nianang sa wala pa matawo nga bata.

 Ang kinabuhi maoy regalo gikan sa Diyos. (Genesis 9:6; Salmo 36:9) Para niya, bililhon ang kinabuhi sa tanan, lakip sa bata nga naa pa sa tiyan. Busa kon tuyoon ang pagpa-abort sa bata, sama kanag pagpatay.

 Ang Balaod sa Diyos ngadto sa mga Israelinhon nag-ingon: “Kon may mga tawo nga nag-away ug napasakitan nila ang usa ka mabdos ug nakaanak siyag ahat apan buhi ra ang inahan ug bata, kinahanglang bayran sa nakasala ang danyos nga pangayoon sa bana; ug kinahanglang bayran niya kini base sa desisyon sa mga maghuhukom. Apan kon dunay mamatay nila, nan siya magbayad ug kinabuhi para sa kinabuhi.”—Exodo 21:22, 23. a

•  Kanus-a magsugod ang kinabuhi sa tawo?

•  Mapasaylo ba sa Diyos ang usa nga nakahimog aborsiyon?

•  Sayop ba ang aborsiyon kon nameligro ang kinabuhi sa inahan o sa bata?

 Para sa Diyos, ang kinabuhi sa tawo magsugod dihang siya naa pa sa tiyan sa iyang inahan. Gipakita sa Diyos diha sa iyang Pulong, ang Bibliya, nga giisip na niya ang wala pa matawo nga bata ingong tawo. Konsideraha ang pipila ka pananglitan nga nagpakita nga sa panan-aw sa Diyos parehas ra ang bata nga naa pa sa tiyan ug ang bata nga natawo na.

•   Ubos sa paggiya sa balaang espiritu, si Haring David miingon sa Diyos: “Nakita ko nimo bisan niadtong binhi pa ko sa tagoangkan.” (Salmo 139:16) Tawo na ang pag-isip sa Diyos kang David bisan dihang wala pa kini matawo.

•   Dugang pa, ang Diyos nahibalo nga naa siyay espesyal nga katuyoan para kang propetang Jeremias sa wala pa kini matawo. Ang Diyos miingon kaniya: “Sa wala pa ka nako umola diha sa tagoangkan nakaila na ko nimo, ug sa wala pa ka matawo gibalaan na ka nako. Gihimo ka nakong propeta sa kanasoran.”—Jeremias 1:5.

•   Si Lucas, nga usa ka magsusulat sa Bibliya ug doktor, parehas rag gigamit nga pulong para sa bata nga naa pa sa tiyan sa inahan ug sa bata nga natawo na.—Lucas 1:41; 2:12, 16.

 Kadtong nakahimog aborsiyon mahimong pasayloon sa Diyos. Kon karon ila nang gidawat ang panglantaw sa Diyos sa kinabuhi, dili sila angayng malumsan sa pagbating sad-an. “Si Jehova maluluy-on ug mabination . . . Sama ka layo sa sidlakan gikan sa kasadpan, ingon usab niana ka layo nga gibutang niya ang atong kalapasan gikan kanato.” b (Salmo 103:8-12) Pasayloon ni Jehova ang tanan nga kinasingkasing nga naghinulsol sa ilang nangaging mga sala, apil ang aborsiyon.—Salmo 86:5.

 Base sa giingon sa Bibliya bahin sa kinabuhi sa bata nga wala pa matawo, sayop ang pagpa-abort bisan pa sa posibleng komplikasyon sa inahan o sa anak.

 Komosta man kon panahon sa pagpanganak, motungha ang emerhensiya ug kinahanglang mopili kon kinabuhi ba sa inahan o sa anak ang luwason? Sa maong kahimtang, kadtong naa sa maong situwasyon kinahanglang modesisyon kon kang kinsang kinabuhi ang luwason.