Ang Bibliya wala direktang maghisgot bahin sa pornograpiya, cybersex, o sa susamang mga buhat. Hinuon, tin-aw gayong gipakita sa Bibliya kon unsay pagbati sa Diyos labot sa mga buhat nga nagpasiugda sa pagpakigsekso gawas sa kaminyoon o sa hiwi nga panglantaw bahin sa pakigsekso. Tagda kining mga tekstoha:

•   “Busa, patya ang inyong mga sangkap sa lawas nga anaa sa yuta maylabot sa pakighilawas, kahugawan, seksuwal nga gana.” (Colosas 3:5) Inay patyon ang sayop nga mga tinguha, ang pagtan-awg pornograpiya makapukaw hinuon niini. Kini makapahimo sa usa nga mahugaw sa panan-aw sa Diyos.

•   “Ang matag usa nga magpadayon sa pagtan-aw sa usa ka babaye aron sa pagbaton ug kaibog kaniya nakapanapaw na uban kaniya diha sa iyang kasingkasing.” (Mateo 5:28) Ang mga hulagway sa law-ayng seksuwal nga mga buhat magpukaw sa sayop nga panghunahuna nga mosangpot sa sayop nga mga buhat.

•   “Ang pakighilawas ug ang tanang matang sa kahugawan o kadalo dili gayod angay hisgotan sa inyong taliwala.” (Efeso 5:3) Kita dili gani angayng maghisgot ug imoral nga mga buhat ingong pakatawa, labaw na ang pagtan-aw o pagbasa bahin niini.

•   “Dayag ang mga buhat sa unod, ug kini mao ang pakighilawas, kahugawan, . . . ug mga butang nga sama niini. Mahitungod niining mga butanga pasidan-an ko kamo, ingon sa pagpasidaan ko na kaninyo, nga kadtong nagabuhat sa maong mga butang dili makapanunod sa gingharian sa Diyos.” (Galacia 5:19-21) Kadtong nagtan-awg pornograpiya o nakigbahin sa cybersex, phone sex, o sexting giisip sa Diyos nga mahugaw, o imoral. Kon kita nagahimo sa maong mga butang, kita bug-os nga mawad-an sa pag-uyon sa Diyos.